Longsa Senso Moria Mission hon jubilee sentong nung Tsüngrem osang abener ABAM Executive Secretary Rev. Dr. Mar Pongen, Pastor Rev. Dr. Alemrenba, Missionary Mapula aser sentong nung tongti shilem agir kar noksa nung angur.  14.11.2021

Rev. Dr. Mar Pongen, Executive Secretary, ABAM Impur

Rev. dr. Alemrenba, Pastor Delhi Ao Baptist Arogo
Mapula, Missionary IEF
Longsa Baptist Arogo choir
Tsürabur Rev. S. Temjen (right)-i Longsa Senso Moria Mission nüngtem adokba “Tsüktetlung” ka sayatsüdang

Longsa Senso Moria Mission tenzüker küm tenem (50) ajungba jubilee mung “sentsüwangshi nüchi” dak rangloker Longsa Baptist Arogo nung Nov 13 aser 14 anogo ananü takok manung nung mungogo.

               Iba sentong nung Tsüngrem osang abener; Ao Baptist Arogo Mungdang (ABAM) Executive Secretary, Rev. Dr. Mar Pongen-i “sentsüwangshi nüchi (2 Kor. 4:17)”, IEF Missionary Wt. Mapula-i “Tsüngremer mi nung rongshidi (Zek. 13:9)” aser Delhi Ao Baptist Arogo (DABA) Pastor Rev. Dr. Alemrenba-i “ali tatem tashi Kibubar mi tsükloktsüdi” onük nung ajemdaker tayongzükba o tulu bener arua jubilee mungertem ayongzüka liasü.

               Longsa Village Council Chairman Wb. Talichuba, IDAN Chief Executive Officer Wb. Alemtemshi Jamir IAS (Retd), Horticulture Deputy Director Wb. S. Senka Jamir, Mokokchung Town Longsa Senso Telungjem tir Wb. K. Imti, Kohima Longsa Senso Telungjem tir Wb. Onen, Dimapur Longsa Senso Telungjem tir Wb. Imtizülu parnoki sentong balala nung jubilee salem o den tayongzükba o tulu lemsatep.

               Working People’s Bible College tenzüksang tsürabur Rev. S. Temjen-i jubilee nüngtem adokba nüngo kaket “Tsüktetlung” sayatsü. Iba kaket nung Longsa Senso Moria Mission-i küm tenem (1971-2021) tsüngda tenyaba mapa inyakba, Moria Mission tamendakdak aser tzüpokdak, Longsa lima arogo asendenshi milak jangruba otsütem temenungratsüka shia angutsü.     

               Sentong nung Longsa Baptist Arogo Choir-i anir telok aser kijai ken ajanga Tsüngrem osang abenba ajanga tesentepertem saksalemdaktsü. Longsa Senso Moria Mission hon jubilee ranglok nung Missionary balala yokertem den temeja sentong tajung ka agia liasü.