~ I. Temjen Tzüdir

Tsüngrem taochi ajanga tanü aseni amangba Yisu yimsü tajung ya Naga nunger rongnungbo asen Ao limai mezüng aru. Tsüngrem tenüng sangdi. Mezüng iba yimsü tajung Molungkimong yimdak tenzük aser ibaji shiangaia nonga ta meshitettsü. Saka Dr. Clark-i anir iba yimsüji tali teküratiba nung renloka odaktsünüyong tokolak bushitepba mapang, tekong nung nok agi aleptsü tsübusetaka, pei tekong nungji meyimdanga aser tetsübu agi metsübu kümdaktsür yim tasen ka kümteta iba yimsüji mesamai ayimsünga yangertet. Tanü iba indang jembiteper.

Anungji Aolisanger Rev-tem, Pastortem, Missionary-tem aser tamanger ajak, yamai asatepa, takok intsütepa, nüngsang bushitepa makazüi Dr. Clarki kechi nükjidong nung iba yimsü asen limai bener arutsü ibaji atalokdaktsütsü atema ajaki yamai ka bilemdang nung koda?

a) Molungkimong li nung iba yimsü ya tenzük, anungji  par yimtsüng arogo 2022 küm Yisu yimsü arur küm 150 abensaba benjong amungtsüji shitak dang.

b) Molungyimsen, nüngja kija jagia Molung yim anapronglaji Molung nunger dang ta jangjangjaa angateter, tetezü Molungyimsen nungerji Molungkimong nung alirtem dangsa asüba saka Yisu yimsü tajungji mesamadaktsünüyong  yim tasenji küma aoba.  Anungji Yisu Yimsü mesamadaktsünüyong ali shi temang tashiji mapayui bendanga agütsür iba yimsüji renema bener yim tasenji  aküm asünung item nisungtemjia iba kasa Yisu yimsü arur küm 150 ajungba benjongmung amungtsüjia shitak dang.

c) Item yim ana nüburtem dangi aruba aser parnoki amangba yimsü tentetji (Molung Mission-ji) tesülen  Impuri belener atu, anungji tang Impur nung aliba amangbapur Mungdangji küm 150 abensaba benjong amumgtsübajia shitak dang.

Anungji Aor khristan tajungtem, ya shisadangdi. Dr. Clark-i bener aruba yimsü nung telemsa mali, raratep mali, khonang nüngsang bushitepbaa mali, tuluba, tama ta sünüba-a mali saka “Khrista nung ka dang aser tamanger ajakji kotaki tudaktsünür”. Anungji Molungkimonga, Molungyimsena aser ABAM  ajak 2022 küm Ao Limai Khrista Yimsü Tajung Arur Küm 150 Abensaba “WASÜMUNG” (Jubilee) kodang mungnüdir mungdaktsütsüla.

Yamaji mesüra tang jembitepba aser osang kaket balala zülutepba sasepbo asen limai Yisu yimsü tajung arur küm 149 tashi arudang Aor tamanger rongnung (Baptist) telemsa melii aruba küm 150 abensadangbo Aor rongnung telemsa lir alitsü amai reprangteter aser aji shiri tashi mangai tekong meranga adokdaktsüdir pa/la aser parnok dak Tsüngremer lung jagi aontsü aser itemji ajasaa aotsü. Anungji “Nisung tsüngdang shitak mesükba lenmang ka lir aser iba tatembangji tasüba” iba orenji ajaki bilemtetdi.

*****