MLA Imkong L Imcheni Ajen Pok Link Road lapokba tamaitsü lungzüng ka azüngtsüdang tangokba noksa nung angur. Mokokchung, 27th November, 2021 (Photo Courtesy: Moasashi Jamir)

Nov 27 nü 28 Koridang MLA, Imkong L Imchen-i ‘Ajen Pok Link Road’ ta sür lenmang tasen ka lapoktsüogo. Iba lenmang ya Khensa yim süngküm (NH-702D) anasa nungi aibabaji Meküli yim lenjem nungto pongteta adoker. Lenmangji kilometer 5.300 shi lir.

              Iba lenmang ya Koridang Assembly Constituency ‘LADP Iconic Project’ kübok yangluba mapatong ka lir. Iba mapa ya May 13, 2021 nung tenzüka yanglu aser Nov 9, 2021 nü tembang. Iba lenmang ajanga talisa Khensa nunger lenmang aisü nung tajangzük aser terenlok angutsü imlar.

              ‘Ajen Pok Link Road’ lapokba tamaitsü lungzüng ka MLA Imkong L Imchen-i azüngtsüogo aser ibaji meshiteta Khensa Baptist Arogo Pastor, Rev. K. Temjeni sarasadem.

              Iba lenmang yanglutsüba ya Khensa Senso Mungdang 2020 küm platinum Jubilee amungba mapang lemtetba bangzüng kar renemba rongnung ka lir.

              Iba sentong nung Khensa Senso Mungdang tatong tir – Temsüchizüng, Khensa Village Council Chairman – Imtitoshi, Longritemsü Samen, Khensa Village Development Advisory Board nungi Dr. Watijungshi, Er. Imtisungzuk, Survey Committee nungi – Nengshiremba, Yimyu Baptist Arogo Pastor – Puryapang, Assoc. Pastor – Arentsaba parnoki shilem balala agia liasü.

              Sentong nung Khensa, Meküli aser Mangmetong putu yimsüsürtemianir Yimyu ward yimden aser telok balala nungi lenirtem densema liasü.