Soyim Gazetted Officers’ Association (SGOA) tenzüker küm metsür pungu (25) ajungba silver jubilee sentong ka Dec 4 nü “Selfless Service” omen dak rangloker Babu Tzüpu Amphitheatre Ungma nung takok ngua mungogo.
Tongti o jembir Ungma Baptist Arogo Pastor, Rev. Dr. Noklen-i jubilee omen nung ajemdaker jembidang, pei taküm amatoker nisung ajak den tebendang makai meimtsü aser tenzüktsü asoshi tayongzükba ka agütsü.
Mapa tajungji aikati inyaker saka aikati konang nüngsang aginüa dang inyaker, anungji, mapa tajungji tangar nem memetetdaktsüi inyaktsüla, ta paisa ajungshia liasü. Tekübokba jenjang nung alirtem reprangteta yaritsüla kechiyong shitakba teyari nungdakertemji itempur lir, ta paisa shisem.
Gazetted officer-temji sorkar aser nüburtem asoshi tongshi lir, sorkar sentong ajak nenoki dang mapa küma inyaker, anungji, nenokji temelenshi bener arurtem südaktsünür aser yimertem asoshi sentong tajung yanglua tim lenmang sayutsüdaktsünür, ta paisa ayongzüka jembi. Rev. Dr. Noklen-isa SGOA jubilee nüngtem nüngo kaket adoktsü aliba ka sayatsü.
Sentong nung DIG Prison Wb. Imtiangshi Longkumer, Industries & Commerce Asst. Director Wt. S. Rarenbenla Longkumer, Ungma Village Council Chairman Wb. R Nungshilepden, taoba SGOA tir Dr. L Temjen Jamir, Jubilee Convener Prof. Temjensosang parnoki tepela o den menungraba o aser salem osang tulu bener arua lemsatep. Telok balalai kentenmenü balala ajanga tesentepertem saksalemdaktsü.
The Nokinketer 