Mokokchung Senso Mungdang-i Kapayong nungi Longpakyong tashi janaona merüka amung

Mokokchung Senso Mungdang ketdangpurtemi anir lenirtem Kapayong nungi Longpakyong tashi Dec 4, 2021 anogo tolang lenmang tezülen janaona merepshia aliba, ayong nung jana intoka alibatem merüka amung.

Osangzülur-i Mokokchung Senso Mungdang tir Temjenzulu Longkumer aser tongti zülur, Imnawapang Kichu den parnok mapa inyaka aoba aser nükjidong dak sentakba nung sensaksemdang, lenmang nung senzüsempongertemi alima merüka ayutsüsa ayong menentsüba yimya ya indoktsü ashi.

“Tang Kapayong nungi aluba lenmang ya asen Aor aser Naga nüburtem ajak meyong, sorkari teyari agüja lenirtemi achaayanga yanglua menoktetba lenmang. Iba lenmang nung nübur tzükong ajak kangasa sadema aser anisüngzüka senzüsemponger. Ajioda süaka, lenmang nung senzüsempongertem aser sütoksünema kazürtemi lenmang tezülen plastic bottle, yi bottle, mica aser tanga menenmechi janaona intokba ajanga arem kangasa menentsür aser talisa ayong nung tzü tajemtsü majung kümdaktsüba ya tebilemtsü tulu ka kümadokogo”, ta MSM tiri ashi. Paisa nüburtem pei ki aser kima merüka ayuba ama tanüngba tesemtem nunga pei meyong ama anepalua merüka ayuba ajanga alima ajangzüktsü, ta shisem.

Kapayong nungi tenzüka aluba lenmang ya Yimchalu adena Tzüsanger lenmang den sentaktepa lir. Iba lenmang nung lanur züngapur’züngatsürtem aonung nikongdang sütoksenema senzütepertemi yi aser tzü bottle plastic tapu balala jenti merepshia intokba Mokokchung Senso Mungdang lenirtemi merüktetba asadang nung Beer pongdang (Can) Kg 100 tema shi aser Rum bottle zünger mezüngma nangdena bendentet.

Parnoki item janatem bendena tzü mopung memenentsüsa lemdanger rongtokba den bottle, merang aser plastic-tem gari nung Mokokchung tonga bener adoka tim intoktsü tesemtem nung intok.

Lenmang nung senzüsempongertem, benjong mapang kazüa sütoksünemertem ajaki iba lenmang tezülen menenmechi masütsü wainshin aser tangatetba alitsü nüngdaker, ta MSM ketdangpurtemisa metetdaktsü.

Mokokchung Senso Mungdang-i nübur ajaki züngzünga reprangtettsüsa merang sabang yanglur yangji temetettsü nungji “…Temesepba Chiajema senzütsü memelar…” ta züluja lir. Ajioda süaka, nüburtemi mangateti iba lenmang nung kazütepa temesepba pongdang tazüng merepshia intokba, plastic aser ki janaona posta nung sepdener arua ayong nung mereptokba aser süoshi tajung semer, gari tajung nung mener arua senzüsempongba ana yabo khenyongi meputeper aser tangatetbaji khenyongi tamashi ta sayur.

Tanü alima libajen (environment) merüka, süngdonglidong, arem aser shirurutem wazüka ayutsü indang alima tzü mopung menenba tebilemtsü indang kangasa sashia jembir aser aikati itemji merüka ayutsü atema mera agiteper ajioda süaka, tangatetba aser mapa meputepi inyaksangshiba ajanga asenok takoksa tulu mapang memenui ajangshitsüsa akümtsü.