Mon district kübok Oting yimdak Indian sepoy-temi nisung aika kaseta südaktsüba mangyim jashi nung Ao Senden-a adener aser parnok puküma aser nungitba tamaitsü sayua Dec 6 nü Mokokchung district rangben nung anepdang 6:00 nungi anüngdang 12:00 ako tashi mokdanga mungtsüogo. Mulungku tamaitsü sayua Ao Senden office nung wako tanak songa liasü.
Iba mokdang sentong timtem kecha mataloki takok ngua tembangogo. Kasa mokdangji Mokokchung town nung dang takok ngua among masü saka Tuli, Mangkolemba aser Changtongya town-tem nunga kanga metsünga reta amungba osang ajanga angazüker. Iba mokdang nung All Ward Union Mokokchung Town lenirtemia Ao Senden den yaritepa liasü.
Asen state nung Armed Forces (Special Powers) Act, 1958 ya aliba ajanga Indian sepoy-temi tashiyim aser azütokshiba mapa aika inyaka arudaki, anungji, iba ya yakta agiintsüla aser iba dak sentakba nung Naga nunger ajak lungjemer noktaktsüla, ta Ao Senden lenirtemi iba osangbener den jembidang ashi. AFSPA atema ya asenoki shimtetba tatar-temi tatar salang nung benoka jembitsüla aser iba ya agiintsü asoshi telemtetba agitsüla, ta parnokisa tebilemba ka lemsatep.
AFSPA ozüng anar Indian sepoy-temi 1994 Dec ita Mokokchung town nunga azütokshiba aser tashiyim mapa inyakogo, yamaji tanga district nunga atalokba osang lir aser tang ya Oting yimdak Konyak nunger dak ataloker. AFSPA ali tashi iba ama mapa ya ataloktsübasa, anungji, iba ozüng tamajung anema noktaktsübaji tang ya mapang tetemsü lir aser iba ozüng anema Ao Senden-ia telemtetba kar agitsü tebilemba lir, ta parnokisa metetdaktsü.
“Tanü Konyak nunger dak atalokba ya parnok kisüng khuret masü, ibai Naga nunger songjen tebilemtsü lir, anungji, Naga nunger lungjemer noktaktsüla”, ta Ao Senden lenirtemisa metetdaktsü.
Tanü alima yimjung kishi lapoker Govt of India den Naga yimden tebilemtsü dak sentakba nung teti asoshi political solution jembiba mapang ka nung, iba ama azütokshiba ya ajak asoshi tia kanga maka, ta parnokisa tesasaba olen ka metetdaktsü. Aji oda, State Govt.-i iba dak sentakba nung tekaratiba nung mera kar agitsüla, ta parnokisa shisem.
Tanü iba mokdang sentong nung All Ward Union Mokokchung Town den Aor Telongjem Mokokchung town, Mangkolemba, Changtongya aser Tuli town nung shirnokisa yaritepogo, parnok ajak dang pelaba den nüburtemi amalitepa nungitba asoshi ajak dang pelaba Ao Senden lenirtemisa metetdaktsü.
(Source: Tir Yimyim)
The Nokinketer 