Dec 4, 2021 nü Mon district kübok Oting yimdak Indian sepoy-temi tai maketer nisung 15 tashi kahsetba atema kukua aitsür, ta Watsü Mungdang tir, Wt. S. Arenla Longkumer-i sangdong ka ajanga metetdaktsüogo.  

Meimchir dak maketba shisatsü dener taochi makai inyakba mapa ya tebang agi meshiteti aoksar. Iba ya tawa tasen ataloker masü saka taoba mapanga Indian sepoy-temi telungpur tenüng amer nisung rishikangshiba den nisung meyi aika tepsetogo, yimtsüngtem rungtoktsüogo, tetsür tanur dak tashiyim mapa tamajung inyakogo aser tang yaa kasaji atalokerba dang, ta Watsü Mungdang tir-isa ashi.

Naga nungeri AFSPA anema küm talangka lungkak aiter, aser tawa nisung aika tepsetba yagi ano akhi ozü mulung yirutsür aliba nung tanaben rishitsür. AFSPA tashi anar iba ama taoksatsü aser tashiyim mapa inyakba ya khenyongi magizükteter, anungji, ibai nisung ajaki sashisashia aitsütsüla, ta laisa ashi.

Iba mapa ajanga nüburtem o sepoy-tem tsüngda tamang katetba nung ongdang tulu adokdaktsüogo, aser Indian sepoy-temi otia/jakdaka meimchir temeten aser nüchiso anema inyakogo aser iba khuretji nenoki abentsü. Bangdak amertemi yaktatiba nung aibelenertem anema ochi obendang agütsütsü akanger, ta Watsü lenirisa metetdaktsü.   

“Iba tammang mapang ka nung toktsür aoba asür kinungertem, Konyak adianutem aser Naga nunger ajak den mangyim jashi aser mulungku lemsateper”, ta laisa metetdaktsü.

(Source: Tir Yimyim)