(Nagaland Governor nem takangba kar agütsüogo)
Mon district kübok Oting yimdak Dec 4, 2021 nü India sepoy-temi tai maketer nisung aika tepsetba asoshi tejashi sayuba den AFSPA anema Ao Kaketshir Mungdang (AKM)-i Dec 6, 2021 nü ola madok lungkak aitba (silent procession) sentong ka ayongzüka kaogo.
Iba silent procession-ji Mokokchung Imkongmeren Sports Complex nungi tenzüka yimdong süa arur Mokokchung Police Point nung sentong ka agi, aji sür külen Nagaland Governor dangi züluba takangba chitti (memorandum) ka Mokokchung Deputy Commissioner office nung agütsü.
Dec 4 nü Indian sepoy-temi tai maket nisung 15 tepsetba atema kukua aitsür, Sepoy-temi iba ama shiruru ama inyaksangshiba ya civil code aser meimchir temeten anema lir, anungji, Armed Forces Special Power Act (1958)-ji tangsa tang agiintsüla, kechiyong iba ya ajanga sepoy-temi kiralongra mapa inyaka yimjung raksatsür aser state nung mekateptsü (ceasefire) aser yimjung kishi lapoka jembishinüba mapang ka lir, ta AKM-i züluba chitti nungji shia lir.
Tejak mereprangi bushisüngdangba independent judicial inquiry ka shimtsüla aser aibelenertemji tekaratiba nung temzüng kübok anir arutsüla, ta chitti nungji shia lir. Nüburtem yimjung nung alitsü asoshi nübur aliba tesem nungi security force camp ajak agiintsüla, ta AKM züluba chitti nungji shisema lir.
Tanü police point nung sentong akadangji Ao Kaketshir Mungdang (AKM) tir – Nungdokyanger Ao, Eastern Nagaland Students’ Union Mokokchung tir – Imtitochi Chang, taoba AKM tir – Aodangnok aser AKM tongti zülur – Nekmi Longkumer parnoki mapang tatsütsü agia jembi.
Tanü iba sentong nung AKM kübok unit balala den Eastern Nagaland Peoples’ Union Mokokchung-i anir tetsür telungjem (ENWOM), kaketshir telungjem (ENSUM),Watsü Mungdang aser temulunger nisung aika adenshia shilem agia liasü.
(Source: Tir yimyim)
The Nokinketer 