Chuchuyimpang Kaketshir Telongjem tenzüker küm 75 ajungba platinum jubilee sentong “mangdangsen” omen nung ajemdaker Dec 28 & 29 anogo ananü Yimkümshiba tesem Chuchuyimpang nung takok ngua mungogo.
Sentong nung tongti tejaoker, Dr. Ngangshi K Ao-i jembidang, lanurtem ya tarutsü senmangtem lir, anungji, parnok asoshi khuret abentsübaji kanga tongtibang lir, ta metetdaktsü.
Jubilee ya tesüibatem reprangshiba den tarutsü atema jembitsüba mapang ka lir. Mangdang makara kin ka samar ta ashiba ama ibaji asen atema lensanir ka südaktsütsü asoshi pai ayongzük. Tanü alima ya balaka renlokogo, anungji, tang nungi küm 25 meraa aotsü atema nükla tajung ayutsüla, aji mesüra asenoki alima tsüngkang metema moutettsü, ta paisa ashi.
NITI Aayog ajanga India nung state rongnung Nagaland ya teküboktiba state ta sangdongogo. Asen sülen statehood angurtemi asenok ajateta ogo, ibai tebilemdangtsü tulu lir, iba ama tensa ka nung tanü asenok lenisüba kanga nungdaka lir, ta paisa lanurtem den khuret kar lemsatep. Tanü joko kechi azüng ta masü saka kechi inyakteter ta asüba putu lir, ta paisa shisem.
Alima melenshidaktsünüra, mezüngbuba pei yimtsüng nungi temelenshiji tenzüktsüla, ta paisa ashi. Kechisarena ajak ya Tsüngrem dak dang tembanger, shisatsü süshia, tashitemetet süshia aser tangatetba süshia ajakji Pa tsübuba nungi dang tenzüker, anungji, lanurtemi iba tangatetbaji bushitsü asoshi paisa tayongzükba agütsü.
DABA Counselor, Dr. N. Moa Imsong-i “mangdangsen” onük nung ajemdaker jembidang, mangdang tasen ayuba jagi taküm nung tetezü agütsür, iba jagi len sayur, iba jagi nisung ka ajungmesor, anisüngzük agütsür aser taküm nung nükjidong ataloktsür, ta metetdaktsü.
Paisa mangdang ataloktsü asoshi teinyaktsü kar lemsatepdang, arogoi samaa alirtem anitenbaji mezüngbuba teinyaktsü asütsüla, kija taküm shia tangari akhümtsübuba kaka akümtsütsüla, business ajak nung ochi seret amshitsüla, chiyimer dang masü züsenteter akümtsüla, kechi mapa inyakdir ajak nung nentaka inyaktsüla, aser yimden – loktiliba – rongsenketzüng aser tanelaren tsütsü mongin/asameyanger adoktsü nükla ayutsü asoshi tayongzükba kar agütsü.
Tesülen sobaliba sentong ka agia liasü aser iba sentong nung sobaliba tetoktepba tapu balala ayonga agi. Mokokchung SP Kr. Aotula T Imchen IPS ajanga jubilee sentong shibangtsü.
The Nokinketer 