Nagaland Housing & Mechanical (PWD) Minister aser Mokokchung DPDB Chairman, Wb. Tongpang Ozüküm-i Jan 25 nü Mokokchung nung tang yanglutsü aliba 33/11 KV Power House Sub-Division tesem semdangogo. Iba sub-station nung 2×10 MVA transformer amenoktsü ta osang ajanga angazüker.
Minister Tongpang Ozüküm-i tanep iba tesem semdangba mapang iba mapatong asangsang akümtsüsa talisa Ministry of Power (GoI)-i melaba den Nagaland Chief Minister, power department, power grid, All Ward Union Mokokchung Town (AWUMT), ali kiburtem, district administration aser iba mapatong dak sentakba nung shirnokisa yaritepogo aser yaritepa arudar, parnok ajak dang pelaba metetdaktsü.
Mokokchung nung iba mapatong amenokba ajanga district nüburtem asoshi temoatsü asütsü imlar, ta paisa ashi. Paisa contractor Techno Power Enterprises Pvt. Ltd. ketdangsürtem dang tekaraba aser tajungtiba nung inyaktsütsü ajungshia liasü.
Tang aliba ya joko oset ajak tejen kümatokogo, anungji, iba power house sub-station amenokba ajanga light (power) agütsüba jenjang tajungba akümtsü imlar, ta Mokokchung Executive Engineer (Elect), Moameren-i iba osangbener den jembidang lemsatep.
Tang koba Mokokchung town Salangtem ward nung amenoktsü aliba 33/11 KV power house sub-station ya taküm tsünglu aruba mongpu matongdangsa renemtsütsü sentong lir, ta iba osangbeneri Techno Power Enterprises Pvt. Ltd. ketdangsür ka den jembidang pai metetdaktsü.
Tanep iba tesem semdangba mapang Mokokchung Deputy Commissioner, Limawabang Jamir, AWUMT ketdangpurtem, Power Grid aser contract agizüker Techno Power Enterprises Pvt. Ltd nungi ketdangsürtem densema liasü.
(Source: Tir Yimyim)
The Nokinketer 