~Wati Longchar (Serampore)

Naga nunger lakh 5 shi India lima yimtitem nung kaket riju balala bushidak prokshia oa züngdaki. Asen lima medical college aser technical education angazükdak/azüngdak peria makaba ajanga India len dang azüngtsüsa akümer. Kong Naga nunger telong junga lidir, yangji telungjem kümteta alir. Bendang lima student noklang aika alir asünung, oli-ora senzür, shishilembar aser mapa inyaker mapang shia timtem, lendong ajurur, talisa shiranger  mozü ki bushia arur aika timtem ajurur. Ibala mapang yariteptsü Nagaland House akatsü nüngdak ta student union balala aikati Nagaland Government dang takangba lir. Aji tim, aser kokra India city ajak nung Nagaland House yanglutet nungbo Naga nunger ajak asoshi anisüngzük tulu asütsü. Lenir tajungtemi city koba nungsa Nagaland House yanglua yutsüogo, aser yanglutsü asameyangdaki parnok ajak dang peladi.

Nokinketer sabang aser YSS  telok ana nung onük shisadangtsü atema yamai benok, “We thank all for the support and voicing out for our fellow Naga migrants with regards to the construction of Nagaland Houses in Chennai and Vellore, Tamil Nadu. Nagaland Houses will benefit every one of us, and this has been the dream for the Nagas out there for a long …. But again, in “Wider Sense,” Naga leaders should think beyond the construction of NL Houses for students and medical treatment in cities. Instead, invest resources in world-class educational institutions and hospitals in Nagaland. Then we will not need Nagaland House in cities. We want leaders who think beyond NL Houses in metro cities.”

Naga nungeri bushia aoba amai, Tamil nunger, mesüra tanga India lima balala nungi Nagaland bushia arua parnoka pei state “House” yanglutsü nüngdak ta shitettsüsa Nagaland nung medical college, educational institutions aser tanga mapa angazükdak lir mali?  Mali. Tetezü, asenok ano tangar memenep. Asenoki tangar bushia aor aser parnok dak metaloker alir, saka tangarbo asenok bushia arutsü nüngdak maka. Kechiba asenok tanü tashi iba jenjang nung alitsüsa akümer? Ochimashi aser mangdang makaba lenir nem yimsü südaktsüba ajanga ta angatettsüla. Sensaksemer kati yamai zülu, “State ka asoshi development maparen tapu balala aika inyaktsü tim, saka Medical College Nagaland state nung kabosa alitsü takangba yabo, tanga development ajak aliyonga rongdak inyaktsü mapa ka lir. India nung 542 medical colleges lir, Sikkim, Arunachal Pradesh aser Andaman Nicobar tashi nung medical college kaka lir. Karnataka nung 60, Maharashtra nung 56 tashi lir.  Technical/medical, higher education state nung tajung alitsübaji kangasa tenüngdaktsü. Itemji melena Nagaland Houses city balala nung yangluba jagi küptoktsü makok. Nagaland Govt. kübok corruption aliba agi Nagaland House-temjia junga achaayanga maintain mesüteter. Delhi nung Nagaland House RK Puram nung taaktsüka küm aika nungang renemtet. Ano Nagaland state Govt. ajanga migrant/diasporas community welfare atema policy tajung yanglutsüla…. Nagaland state’s interest promotion atema Naga diasporas/migrants dak aliba resources tap süa socio-economic development, cultural & religious interests terenlok mapatem inyaktettsü…..”  Tanga city nunga Nagaland Houses koba jenjang nung lir? Nagaland Houses city balala nung yangluba jagi  teperi masü, iba melena Mon nung Medical College foundation azünger meinyakteti aliba nungjiang yanglutsü nüngdak masü na? Iba jagi sensaker aika ajangzüktsü. Sensakeri city nung oa treatment agitsü makok aser shisa riju balala nung oa mezüngtettsü. Takar ishika dang ajangzüktsü. Anungji, maneni sensaksemer kati nenshia yamai ashi,”Tamasa asen atepzüng nung basic infrastructure aser facilities inyaker külen tanga tesem nung awa ao junger. Kokra, major cities ajak nung NL House ayutsüji kanga junger aser iba ya ajanga tajangzük aika angutsü. Saka yimkong ajungtsü (talisa sensakertem aser yimdaklirtem) ajangzüktsü tama südaktsütsüla ta bilemer.”  Tanga state nung oa Nagaland House yangluba jagi asenok tejakleni aor ta mesayur, saka meyiper ano tangar dak metaloka lir ta sayur ta angatettsüla, aser lenirtemi nüburtem, talisa yimdaklirtem, asoshi temulung magütsüba kuli sayur. Nagaland state ngur küm 60 ajunger.  Küm roker tsüngda nung Naga nunger lanur asoshi industry kwi lapoka ali? Private resort kar yanglua aliba, mesüra Hornbill festival yagi teperi asü? Küm roker nung medical college kata melapoktetba ya shiba tai? Nagaland nungbo medical minister lir mali? Lenir majungba, mangdang maka aser ochimshi mapa jenti inyakba agi tanü Nagaland jenjang iba tia nung lir. Anungji, ochishir lenir shimtsübaji nübur khuret. Nagaland tejakleni odaktsünüra ochi lenir shimdi.

*****