Ongpangkong Mungdang 60 buba inti senden sentong Feb 17, 2022 nü yangi Mokokchung town hall nung “nüchiba senso” omen dak rangloker takok ngua mungogo.
Iba sentong nung tongti o jembir Nagaland University nung tesayur Prof. Lanusashi Lkr-i jembidang, nüchiso senso kaji tangar dak metaloka/nendaka aliba mesüra tangar kübok talenba nung aliba senso ka masü. Nüchiso senso kaji satok-satoka litetba, akhüm taket senso. Kodang lokti/kin ka nüchiso jenjang lateta lidir idangji iba nüchiba sensotemji parnoki yangluba sentong nung satem-satema maparen ajak inyaka tejakleni otettsü, ta metetdaktsü.
Asen kin nüburtem libaliru, inyaksangshi, shisatsü ajak ya jungjunga shisadangra, joko kangsa amoksepba kin ka kümatoker amai, senso aika pei sasa pei jenjang kaji nüchi asü masü ajia mejangjai lir. India nunger dang nungi kenü jilia (14th Aug, 1947) alima dang nüchiso sangdongbato tenübo India nunger melira asenok sasa melitettsü amai bilema jembir aika kümogo, ta paisa sasaseta ashi.
1929 Simon Commission den ajurutepdang Naga kin lenirtemi ‘kodang nenok British yimsüsüba ozü lima toktsütsüsa kümdir, tarutsü Naga kin jenjangji British nunger arudang koma nüchiso tia nung liasü, yamaji onok sasa pei temeten amshia yimsü asütsü toktsür oang, saka kodanga onok India mesüra Burma nunger nem ozü jenjang tetoktsü ta jangjajangja ashi’, item kulitem ajanga British nungeri Naga kinji India nunger ama masü kin balaka ta züngshia yimsü asüba angur, ta paisa süiren kar lemsatep.
Tanü Indian election ya Naga nunger, talisa Aor asoshi kangasa sabuba benjong ka amai kümogo, tanü Nagaland nung asenoki tanishir ta bilembatem ya shitakbabo tanishir masü politician-tem lir. Chichiba lenirjibo ochishir, lokti meima khuret bentetba, pei atema masü nübur asoshi bendanga agütsürtem dang lenir/tanishir ta ajar, ta paisa ashi.
Aor, ochishir, tasü tait, mapa meranga inyakba, nüchiso kanga meimba kin, noklang nung noklang Khristan lima to kechi aküm? Sen kanga meimba, tashi (power) aser jenjang kanga meimba aser talisa, tangar dak metaloker aliba tashitak agi asenok tanü shiranger, ta paisa shisem.
Tanü Aor aikati Ao kin tia asoshi nemjema jembiteper, Aor lungjemtsü, yanglutsü, nükla tasen, aka-a asotsü mapang ta jembir, lokti mungdangtem nung omen tajungtiba bendena o tajungtiba jembiteper, saka temelenshi tajungba mangur. Sobutsü tajung sobuba, yim süngküm aser community hall sen aika intoka tobur junga yanglutetba mesüra telok tashi amshiba jagibo kin ka/senso ka akhüm taket nüchiba senso jenjang metongtettsü, ta paisa ashi.
Tanü nüchiso senso indang jembir, saka mekümdangra aser nüchi telemtetba ka magitetra, asen maitsü (identity) dena sama-a aotsü aser asen kin ya mejangjaba kin ka akümtsü menua maka, ta paisa tekümdangtsü o ka ashi.
Naga kin nüchiso asoshi telemtetba agitsü kanga nüngdaker. Rongsen agi alizükba mesüra rongsen nung amendakba nüchiso masü saka rongsen agi malizüktetba asen Naga kin temeten, asen sobaliba tajung, ochishiba, merataket yimli dak ajemdaker yangluba jenjang nungdaker. Ao kin-a tangar dak metaloker tangar kübok alitsü melen pei sasa noktaktetba, satok-satoka litetba, rongsen agi malizüktetba ochi aser akhüm taket, nüchiba sensosanger anitettsü tanü putui akanger, ta paisa tayongzükba agütsü.
OM Bangzüng
Bangzüng pezü renem; Fazl Ali College nung commerce stream tenzüka aotsü atema tekaratiba nung shilem agia inyaktsü, OM temzüng yanglushitsü, tensa den apet kilen saru sen tera atutsü, Chubayimküm Union Mokokchung aser Ongpangkong Senso Telungjem Yisemyong na OM nung züngsem asütsü mela-a liasü.
OM ketdangpur tasen
61 buba OM mendenpur item yagi anitsü; Tir – Lipokmeren Jamir (Longsa), Tatong Tir – Lanutoba Imchen (Mangmetong), Tongti Zülur – Dr. Rongsenchiba Pongener (Longmisa), Repsem Zülur – Tekatemsü Longkumer (Küpza), Senotsü Zülur – W. Imkongnechet Ajem (Chungtia) aser Repsem Senotsü Zülur – Limatemjen Kichu (Mokokchung).
(Source: Tir Yimyim)
The Nokinketer 