~ Tiatoshi Longkumer (KABA)

Kechiba tanü putu nung asen Ao lanu asensortemi Nagamese jembitsü yamai jangrar? Junga reprangdangra, Ao lanurtemi English-bo onsarabo mejembir, saka Nagamese-bo kibok nunga aser kima nunga jembitsü kanga sabur, aser Nagamese/English jembidang Ao ojangtem kar aon nung metsü inoker ama tera-ra inoka amshir. 

Ao kini Nagamese yamai jembitsü sabuba ya, asen kini tanga kin mesüra oshi balala jembir  telok den junga libalirutsü bilemba shisatsü ka nungi adoker asü mesüra asenok tangar kin dang nungi shisatsü tesademba asüba agi tangar yayim bushia oa “teyongtsü oshi” (a neutral dialect) Nagamese ya jembir? Reprangdangra, Naga kin rongnung asen Ao kin-i tanga Naga kin aser tanga kintem den kibalenbua aliba ya teimtiba lir, aser ano teimba renloka odar. Angazükba agi, Kohima town anasa aliba Angami yimtsüng kar nungbo parnok yimer tetsür jubilee nung town nung alir tetsür telok lungjemer ken atendang, asen Aotsürang teimba dener ken atenba shia liasü. Aji oda, oshi balala jembir külem kibong ka kümer aliba kibongtem nung Nagamese/English ang jembir. 

Saka asen lisopurtem jenjang nungi bilemdangra, pei tetsü oshi toktsür bendanger oshi ka angateteptsü mechi nung tongti süa jembiba jagi pei ayak/maitsü jenjang ajak tepseter ta angatetdi. Anungji, oshi balala jembir kibok nung akok tashi oshi anaprongla jembitsüla aser tiyongtsü oshi, Nagamese ya kilong nungibo merüptoktsüla. Asen jala-jabasotemi Naga nunger oshi ana jembitetbaji koda senti aser tashi tulu lir. Iba ama tatishitsü süa amshitettsü kibong asen Aor lenir rongnunga lir. Anungji, item tatishitsü kibongtem nungi angazüka tanungbatemia merangtsü koda tongtibang.   

Asen Aortemi oshi ana jembir – Chungli aser Mongsen. Ano telok tila kati Changki oshi jembir. Chungli, mongsen aser changki oshi asem nungji kabosa nisung shia pei tetsü oshi lir. Saka asen kin dangi American missionary-tem arudang parnok chungli o jembir yimdak tama atong nung joko iba mapang nungjagi tenzüka chungliji asen Ao kin asoshi sabang nung amshiba oshi aküm aser tanü tashi chungli o-ji zülu-banglu aser lokti sentep-senden ajak nung jembiba oshi lir. Tangar kin danga iba oshi ya sayu aser kaketshirtemi-a iba oshi nung zünga tatidang agütsür. 

Tanü asen Aotsür-Aor rongnung oshiobenlen tebilemtsü kaji aikati Mongsen mesüra Changki-bo junga jembiteter saka Chungli-bo junga mejembiteter ta asüba ya lir. Tanü lanu asensortem asoshi dang masü tsüraburtem-a dena iba ya tebilemtsü tulu lir. Mongsen aser Engraji nung abensa jembitetakasa, chungli o nung junga mejembitetba ajanga aikati lokti sabang nung shilem magili ta asübapur jenti lir. Mongsener chanu ka ama chungli jembitsü ano mangazükdang koda timtim ajuru iba indang Dr. Wati Longchar-i pa taküm nung ajurushiba nungi lemsatepa liasü. 

Dr. Wati mongsen temeja jembiba yim ka nung soa intet. Anungji tenla kidang chungli jembia angashiba dak alaka par kidang kodanga chungli mejembidang. Pa Alongkima Govt. High School nung chungli jembir kar school nung ajuruba ajanga chungli ojang kar jembia tenzük. Item ojangtemjia temulung nung kanga shisadanger angsa chunglir denji jembi ta pai shia liasü. Saka chunglio tera jembitetbaji kanga dang jenjang tulu ta agi. Aji oda, tamalenbo asen tsüraburtemi mungdangi aotsü aser arogo nung tenzüker mapa inyaktsü atema chungli agi sarasadem asütsü masüngdangtsü ta pastorbai nangzük nungang agizük ta asüba otsü lir. Yamaji Ao oshi dang sür nung chungli junga mashiba/mejembitetba ajanga Mongsener aikati lokti sabang nung shilem junga magitedi aliba ya koda tajungba küma renlokdaktsütsü? Iba sendak nung mapa küma inyaktettsüba mera tajung kar bushitsüla. 

            “Aori Tsüngrem dang pelatsüba kaji asenoki oshi ana jembir aser anapronglaji 95%-i angateteper” ta Rev. Bendangmeren-i shia liasü. Paisa ashir, “ Oshi anapronglaji kanga jenjang balala nung tetezü tarok. Karbo chungli oshi agi merajamtetba Mongsen oshi agi rajemteter. Ano karbo mongsen o dang nungi chungli oshiji tarokba lir. asenoki lokti nung sayutsüngidang chungli aser mongsen oshi agi jembidang tetsüdaktsü alidang chungli oshi nung lira aji amshitsüla. Saka yakta dang engraji oshi amshir….[Atangji] Ao oshi ana rongnungji ka junga jembitetra aji teperi ta nibo bilemer.” Rev. Bendang tangatetbaji, Aor lokti sabang nung jembidang chungli aser mongsena meyoktepa dang mashibaji ang shisatsü tarokba nung lemsatepteter aser ajiang jenjang tuluba lir. Tesüiba putu nunga, Aor arogo aser mungdang lenir tsürabur Rev. Riküm nungeri Mongsener arogotem nungbo Mongsen temeja agi dang sayutsüngiba aser sarasademba khuli tejangja lir. Aser yamaji yimtak alirtemia Mongsen o agi jembibajiang tain-tanur ajaki tzüra tatemba angaba otsütem lir. 

Rev. Bendang-i Chungli aser Mongsen meyoktepa amshiba yim-lenji atsünga Dr. Wati Longchar-ia yamai shia liasü, “Mongsener tsüraburi Chungli-Mongsen anaprongla meyoktepa kibong tekülem nung amshitet nung koda jungla ta bilemer.” Dr. Wati-i shisemba ama, Ao oshi angazükdakji Sunday school aser tenlaki dang masü saka tongtibangba tesemjibo kibok/kibong ya lir. Aser kibong nung kidang alir jembishinüdang aser kibok tekülem mapang agidang pei oshi agi jembitsü koda tongtipang. Kibok nung tsüraburi anir Ao oshi – chunglia aser mongsena- tsüraburi anir jembi nung dang tanuri angazüka jembitettsü. Pastor Imnatoshi, DABA aser Dr. Sentiwate tenapronglai tanurtemi pei oshi mashiba teraji tsürabur lir ta lemsatepa liasü. Pastor Toshi Longkümer yamai ashi, “Ao oshi jembitsüji tsürabur shilem ta onük ka jembi nung Ao oshi mashiba tanur indang tsürabur aika angazükba agi pei tanuri Ao oshiji tejembi ta asüyonga odang jembitsü südi ta bilemer. Anungji tanur masü tsürabur sayu tajungba ta bilemer.”   

Tanü tensa nung tesasatsükaji, tsüraburia aser lanurtemia chungli o mashi atemer Nagamese mesüra English oshi dangi meyipatoker. Rev, Bendangisa yamai shia liasü, “Tangar kin kanga tongtibang lenir kati yamai kü dang ashi, ‘Naga nunger kin shiaji reprangdangang kin kasa nisung ana külemi amendang mesüra jajadang par oshi temeja jembir. Saka Aor tangateter ana külemi amendang aser jajadang tenabo Engraji mesüra Nagamese dang jembir. Onoki Ao oshi jembitetra jenjang kanga tulu ta bilem, saka ibaji ngur onokia Ao oshi memeimi aküm.” Junga bilemdangra, asen Aori Ao mejembitetba teraji angazüknüba tanela aser pei oshi meimba tanela makaba ajanga lir.

Oshi ajak ya nendaka bushiba aser jembiba ajanga dang akoker. Anungji, Aor kibok ajak nung Chungli-Mongsen ya kenü nung ghonda ishikabosa bendanger oshi kecha maidaktsü jembiteptsüla. Aser ibala yimyaji Aor lokti tentet balalai kanga ajungmesotsüla. Ano kokra, Aor mapa inyakdak tesem kar lapoker, teka mapa denji külemi Ao oshi jembia angazükdak kar lapoktsüla. Talisa, kibong tekülem nung tsüraburi anir Ao Laishiba azüngba aser Ao ken atenba aser Ao o nung sarasademba yimya ya ajaki inyaktsüla ta Mr. I. Temjen Tzüdir aser Mr. Imthy Toshi Longkümer parnoki kanga nenshia shisem. “Asenok Tsüngrem tenzükertemi ano khen tetsüngi  lur kibong ajak nung tekülem agitsü tesayuba aser tajungshiba agütsütsü aser idangji ajaki Chungli oshi agi jembitsübaji kanga tongtibang ta külem tenzüker (anükla Tia) den semloker” ta  Mr. Temjen Tzüdir-i nenshia shia liasü.

Ano Mr. Imthy Toshi pa lanuwa mapang kibok nung koda Tsüngrem O aser oshi angazük iba indangji yamai lemsatepba liasü: “Onok tanur asüdang ozü tsüraburi kibong tekülem nung Lai azüngtsü chart ka yanglutsü. Anepdang aser aonung shi Lai tapu ka kasa onoki azüng. Anungji ni asoshi Ao zülutsü aser chungli jembitsü aser ano ojang taroktem angatettsü ibaji mezüng tamendakdak liasü. Asenoki tapu aika jembia sentong balala asabajia junger saka tila tanur asüba mapang nungi Laishiba züngdaktsübaji Ao jembiba aser iba den Tsüngrem O nung anitetba ka asütsü.” Rev. Bendangi ashi ama, asen oshi jembia asen tsürabur kensü nung tena kodang Tsüngrem külemdir iba anogo nung jagi Tsüngremji asen meyong ta retreta agizüktsü. Anungji, chirnurtem Ao Laishiba züngdangtsübaji ajanga Tsüngrem O metetba dang masü saka pei taso o metetba nunga renloker.  

Tanü putu yimya den peta ano tanurtemi Ao oshi angazüktsü tesem tajung kaji mobile phone nung youtube aser apps balala aser television program amshia angazükdaktsütet. Kidang kilong nung tsüraburi Ao oshi dang jembiakasa, ano TV aser mobile phone nung English aser Hindi dang jembia sentong ajak aruba ajanga tanurtemi Ao oshi dang nungibo Hindi aser English ang tera tajungba jembir ta Mr. Imliodang Aier-i lemsatepa liasü. Anungji, putu tensa den peta, “akok nungbo Ao oshi nung tanuri jangraa reprangtsüsa animation movie yanglur YouTube aser TV local channel nung yok nung  tanga oshi angazükba ama asen Ao oshijia angazükdisü ta tebilemba Mr. Imliodangi lemsatep. Mobile aser TV program ya sen-o-tsü tulu sentakba mapatem lir. Saka rongsen aika meintoki iba mesükba yimya nung inyaktettsüba sentong ka Ao Senden Literature Board (ASLB) ajanga inyakya aliba indang Mr. I. Temjen Tzüdir-isa lemsatepa liasü.

“ASLB ajanga tila tanurtem Ao oshi melamela angazüktsüren ta sür project kabo A-ü tashi nung nüngja (noun) kaka anana kar nungbo asemsem inoka ibaji olaosü (sound) koma adoktsü abensa-a inyaka tatemleni arudagi ibaji kodang renemdir renemli dang (memenui) YouTube aser mass media nung yoktsü merangdagi ibaji koktetra tia tanurtem aika asoshi Ao oshi angazüktsüren lenmang tajung asütsü”  Iba ama Ao oshi renloktsü project tajung asoshi asenok ajaki sarasadema atadi. Asen Ao oshi renloktsü asoshi mera agitsü tajungtiba shilemji na aser ni lir. Nai aser ni jaktaka Ao jembira aser Ao agi zülura idangji asen Ao oshi ainer.