Mungujemba Tesayur Limasüngba indang taküm otsü kaket saya

Mar Atsongchanger-i züluba Mungujemba Tesayur ka (An unsung teacher) ta sür Pastor Limasüngba indang taküm otsü kaket ka March 17, 2022 nü Hotel Whispering Winds Mokokchung nung Ungma Baptist Arogo Pastor, Rev. Dr. Noklen Longkumer-i meshiteta sarasademer sayatsüogo.

               Iba kaket nung tsürabur Limasüngba indang taküm otsü tapu 8; yimsü tasen asoshi terenemshiba ka, Limasüngba: Deacon Takameren jabaso, mungujemba tesayur: Limasüngba, Sangtam kin asoshi missionary, grouping: Naga nüchiso asoshi, tangatettsü tasak asem ajuruba otsü, wadang tasen ka dangi, aser Limasüngba tebutsü Marchula itemji keta angutsü.

               Tsürabur Limasüngba ya Ungma nunger Takameren aser Mapurepba na jabaso tambusang lir. Pa ya tesayur, sannüker aser lokti temelenshi bener arur tetemjen nübu ka liasü.  Iba kaket jenjang 399/-, talinürtemi Mokokchung, Dimapur aser Kohima yimtitem nung tongtibang kaket ayokdak angutsü. Iba kaket dak sentakba nung nisung kari dang osang tejangjaba metetnüra iba mobile phone (8732890545) nung tongtepratep akok.   

               Pa ya shisa rajema agütsür ka, Laishiba nung ajemdaker sayutsüngir ka, pa tsüngnep lenla aisü nung lir, luyim aika nung paji tajung liasü aser pa ama nübuji aika mali, anungji, pa nungi tangazüktsü aika lir, ta Rev. Nokleni iba kaket sayatsüdang ashi. Tsürabur Limasüngba taküm otsü azüngba ajanga jenti pur temoatsü angutsü imlar, ta paisa moatsü.  

               Iba sentong nung Amenla Mar, Ex. Pastor Merentuba Longkumer, anükabang MLA Muthingnyuba Sangtam par asemi tambu Limasüngba bilemteta temenungratsüka tatalokba otsü kar lemsatep.   Semchir Oshiajem, jala L Bendangla Jamir, jabaso L. Mongkum Jamir, kaket zülur Rev. Dr. Mar Atsongchanger, MTBA Assoc. Pastor Rev. Sentimeren parnokia shilem balala agia liasü. Imlitemjen Longkumer aser pa medemeri ken tajung ka tena tesentepertem saksalemdaktsü.     

(http://www.nokinketer.com)