Mokokchung Town Inter-Ward Football Tournament ayonger Marepkong Youth Association ketdangsürtem osangbener senden ka Marepkong Community hall nung akadang tangokba noksa nung angur. Mokokchung, 19th March, 2022 (Photo: http://www.nokineketer.com)

Taküm agi kümsem buba Mokokchung Town Inter-Ward Football Tournament May 4 nungi May 14, 2022 tashi Imkongmeren Sports Complex Mokokchung nung asayatsü telemtetba agiogo, ta iba asayamung ayonger Marepkong Youth Association-i 19th March nü Marepkong Community Hall nung osangbener senden ka nung metetdaktsü.

               Iba asayamung ya shitakbabo March ita 14-26 ayongtsüba renemer liasü, saka taküm Dr. T. Ao Inter-District Tournament Mokokchung nung ayongba ajanga May ita thinentsü lemtet, ta Mokokchung Town Inter-Ward Football Tournament Convener, Bendangnükshi-i metetdaktsü.

               Taküma Mokokchung town kübok ward ajaki shilem agitsü telangzüba tajung lir, ta tayongertemi shiogo. Iba asayamung shir teloki bendir senpet sen 50,000/- aser tanabuba jenjang nem 30,000/- agütsütsü. Iba den ano nija senpet kar shima agütsütsü, ta parnokisa metetdaktsü. Taküm iba asayamung nung District Sports Office-i tongti shilem agia yariteptsü lir, ta parnokisa shisem.

2025 tashi nungbo iba asayamung ya tangar teyari magii peisasa (self-financed) bener aotsü asoshi corpus fund ka tenzükogo. Iba den ano team ajak certified coach kübok tesayuba agütsüdaktsütsü nükla lir, anungji, iba dak sentakba nung ward ajak nungi nübu teshimtet/tejangrar nem training agütsütsü tebilemba lir, ta convener-sa metetdaktsü.

Iba asayamung nung ticket yokzükba tajangzükji shir team asayadir parnok den lemsa-a arur, anungji, taküma yamaji aotsü, ta tayongertemisa ashi. Form kodang nungi agütsütsü aser asayamung dak sentakba tanga nungdaktem mapatong nung osang tejangja sangdongtsü, ta parnokisa metetdaktsü.

Iba asayamung mezüngbubaji Arkong Ward-i bena lir aser tanabubaji Artang Ward-i bena lir. Iba asayamung ya Mokokchung town sasep atemabo lanur sempet sayudak tongtibang sabang ka lir, kechiyong yangi tangalen nungi asayartem anir arutsü memelar saka Mokokchung town kübok ward nung alir nisung tejangja nem dang maongka agütsür. 2020 küm alima tensa tia majungba ajanga iba asayamung mekatet.    

Iba asayamung ya tongtibangsa Mokokchung town nung lanur football asaya jangrartem aser sempet aketertem anidentsü nükla yur “towards excellence” omen dak rangloker taküm agi kümsembuba ayongzüktsü renemteper. 

(Source: Tir Yimyim)