Chiyungtsü saburtem asoshi osang tajung kaji Mokokchung town nung 19th March nü restaurant tasen ka tenüng agi “Block 2 Takeout Café Resto ” ta sür lapokogo. Iba restaurant ya Sangtemla Ward kübok Mokokchung HDFC Bank anasa lir. Iba restaurant nung continental aser Korean chiyungtsütem angutsü.
Mokokchung nung restaurant ka lapoktsübaji pa pungmang liasü aser tanü ibaji asangsang ataloker, iba ya pa koda masüba aser teinyaktsü makaba agi masü saka pai jangraba mapa ka lir, ta arishi küm 20 tain Sb. Jungshi Walling-i iba restaurant lapokba sentong nung jembidang ashi.
Süngratsü nunger Sb. Jungshiba ya Class 12 tashi zünger hotel management agi aser Rajasthan nung hotel ka nung mapa inyaktsü maongka angu, saka 2020 küm alima tensa tia majungba ajanga tsürabur alidak Mokokchung-i meyipa aru aser kidang nungi dang chiyungtsü tapu balala yanglua ki tonga bener otsüba mapa kar tenzük. Ashiko pa ya Mokokchung nungbo restaurant lapoka business inyaker rongnung tanubusang asütsü südi.
Pa ya tanubur ka dang süaka kanga meranga inyaker ka lir, ta par medemer kadi iba restaurant lapokba sentong nung jembidang ashi. Mokokchung Town Baptist Arogo, Youth Mentor, Sentikalai iba restaurant tasenba meshiteta sarasademtsü aser Tsüngrem akhümtsübua mapa meranga inyaktsü ajungshia liasü.
Iba restaurant ya Deobar dak alaka anogoshi anepdang 8:00 ako nungi aonung 9:00 ako tashi lapoktsü. Jangratemtsü aser osang tajung kaji; yangi anguba chiyungtsütem ki tonga bener arutsüba service (home delivery) dena agütsütsü, anungji, nungdakbapurtemi iba number 9774272616 nung tongteprateptsü akok.
The Nokinketer 