(Shashank Pratap Singh IAS-i Mkg D.C mapa agizüker)
Mokokchung Deputy Commissioner, Limawabang Jamir NCS den tepila sentong ka March 30 nü Mokokchung D.C Bungalow nung temenungratsüka agiogo. Pa Mokokchung nung DC küm 2 sür ita 4 shi inyaker tangji pa promotion nung education department kübok secretary mapa inyaki Kohima-i aor.
Limawabang-i tepila o jembidang, pa Mokokchung-i D.C mapa inyaki arudang mezüngbo kanga ratamataa aru, kechiyong Aor ka süaka bendanglima dang soa intet, aji saka, liyonga arudang nüburtemi maparen ajak nung shisatsü den nungita yariba ajanga sobaliba aser libaliruba nung tangazükba jenti ngur yangi nungi apusor, ta pelaba lemsatep.
Pa Mokokchung-i posting arur külen ita 2 dang lirbo corona wara ya aruatok, aji oda, wara tesashi liaka, nüburtem amalitep ajanga iba tongpangji koka aruogo, item ajakji nüburtem teyaritep ajanga liasü, ta paisa tenüng sanga ashi.
Iba den ano Covid-19 ajanga alima tensa tia mesüngjemba mapang Aor legislator par 10 den külem administrator-tem, staff-tem, Dobashi-tem, mulungtet telok Ao Senden-i anir telok balalai amalitepa nungitba asoshi parnok ajak dang pelaba metetdaktsü.
Iba Covid-19 wara ajanga state nung health sector tsütsü lenla aika nung kanga renlokogo. Aji oda, Mokokchung nung ano health sector tsütsü tajungba renloka aotsü wadang aika ajiteter, anungji, Mokokchung CMO aser MS-i anir tang dang nungi tajungba inyaktsü ajungshir, ta paisa ashi.
Nisungtem office balalai arubaji tapi agi marur, pa/la mapa kar mesüra tebilemtsü kar atemabo arur, anungji, parnok denji akok tashi o tajung agi jembitsüla aser par nungdak ataloktsütsü merangtsüla, ta paisa shisem. Tanübo akhi tensa ama masü kanga süngjema kümogo, anungji, sorkar tenzüker ajaki nübur meranga tenzüktsü asoshi paisa tayongzükba agütsü.
Pa Mokokchung D.C inyakba mapang koda nüburtemi maparen ajak nung pa den amalitepa nungita yaritep, kasaji DC tasenba dena lidaktsünür, ta paisa mepishia metetdaktsü.
Paisa D.C tasenba nem inyakdaktsünüba wadang ka lemsatepdang, Mokokchung nung tzü agi anüngba ya ulura, anungji, iba dak sentakba nung PHE department aser mulungtet telok balala den sensaksemer nübur tzüra atemtsüsa mapatong kar inyakdaktsünür, ta mepishia metetdaktsü.
Iba sentong nung DPDB tenüng nung DFO Dr. Sentitula (IFoS), Ao Senden tir Chubawati, All Ward Union Mokokchung Town tir Limanungsang Kichu, DC staff tenüng nung Accountant Aoneken, Dobashi tenüng nung PA to DC Lipoknükshi, aser Outpost administrator ajak tenüng nung ADC Mangkolemba Dharam Raj IAS-i jembi. Mokokchung DC tasenba Shashank Pratap Singh IAS-ia mapa agizükba o tatsüka jembi. Mokokchung DC tasenba ya ADC & MMC Administrator inyaka liasü.
Mokokchung Town Baptist Arogo Pastor, Rev. Ponen Longchar den temoatsü meshia sarasademer sentong tenzük aser Ungma Baptist Arogo Pastor, Rev. Dr. Noklen Longkumer-i tenüngsang agüja sarasademer tembang.
The Nokinketer 