(Dr. T Ao opening ceremony akümketa agitsü)
Dr. T Ao Trophy XXII buba Inter-District Football Championship tan April ita 18-29 tashi Imkongmeren Sports Complex Mokokchung nung asayatsü sentong renema lir. Iba asayamung dak sentakba nung host Mokokchung District Football Association aser tayongertem kanga mazüngi maparen balala inyakdaki, ta XII Dr. T Ao Trophy Co-convener, Imlikümzük aser MDFA tir, Meyisanger Lemtur nati April 1 nü osangbener senden ka nung metetdaktsü.
Taküm iba asayamung nung Nagaland state kübok district 16 nungi arua shilem agitsü jangjaogo. Shir district-i iba asayamung marok bendir parnok nem senpet sen 300000/- (3 lakhs) aser atongdakba nem 200000/- (2 lakhs) agütsütsü, aser semi-finalist den ano nija senpet kar dena agütsütsü, ta parnokisa shiogo.
17th April nü shilem agitsüpur ajak Mokokchung tonga arutsü, 18th April nü iba asayamung lapokba sentong tuluka agitsü saka asayajibo 19th April anepdang nungi dang tenzüktsü. Nagaland Agri Minister, G. Kaito Aye-i iba asayamung tenzüktsütsü aser April 29 nü Nagaland Chief Minister, Neiphiu Rio-i shibangtsütsü, ta MDFA lenirtemisa metetdaktsü. Asayamung lapokba sentongji yimya balaka nung akhüm keta aser tobur junga agitsü tebilemba lir, ta parnokisa ashi.
District administration den department balala aser nüburtem teyaritep nung asayamung dak sentakba maparen balala den district 16 nungi asayartem, Nagaland Football Association ketdangsürtem aser tejaokertem asoshi tanendak ki aser tanga nungdakbatem ajak renema lir, ta parnokisa shiogo.
Dr. T Ao asayamung dak sentakba nung district administration-i anir department balala den telok balala aser tangateter aikati lenmang balala nung yaritepa arudaki, anungji ajak dang pelaba MDFA tir Meyisanger-i metetdaktsü.
Tirisa nüburtem dang mepishinüba o ka ashidang, “asayamung ka ayongdangji yimya agi metokmeperi aser tashi mait karbosa alir, anungji, yamalaji kar danga ajitetra mesüra shisatsü agütsünüra, social media sabang nung masü saka tayonger den indangindanga tongtepratep nungbo kanga pelatsü aser onokia itemji akokba tashi ayimjema inyaktsü merangtsü”.
Iba asayamung Mokokchung nung anogo 10 asayadang, asayamung piyong nüburtemi awashi meteta aser pei bendanger tsüngdang yimya tajungtiba benshia asaya reprangtsü asoshi MDFA tir-isa mepishia metetdaktsü. Taküm ya Nagaland Football Association tenzüker küm 50 ajunger aser Dr. T. Ao ya mezüng NFA tir lir. Iba asayamung indang fixture anogo ishika tsüngda adoktsü, ta parnokisa shisem. Mokokchung team-a tawato training camp lapoka asaya (practice) tenzüka odaki. Yakta asayartem aser tanishirtem tenüng sangdongtsü, ta MDFA ketdangsürtemisa metetdaktsü.
(Source: Tir Yimyim)
The Nokinketer 