April 30 nü Nagaland Rural Development Minister, Wb. Metsübo Jamir-i Nagaland State Rural Livelihoods Mission kübok Ongpangkong North aser Kobulong Block atema ‘Start-up Village Entrepreneurship Program (SVEP)’ ta sür sentong tasen ka tenzüktsüogo.
Tanü RD block ana nung tenzüktsüba “SVEP” ya zünga Nagaland nung ibai mapatong tanabuba taren (phase II) lir. Mezüngbubaji Jakhama aser Chumukedima block nung takok ngua agiogo. SVEP sentong ajanga talisa yimdak yimtsüng nung koda masürtem nem pei jenjang yangertettsü lenmang balala sayuba den maparen tenzüka aotsü asoshi senotsü teyari aser maongka balala agütsür.
Minister Metsübo-i jembidang, iba sentong ya yimdak yimtsüng nung Self Help Group (SHG) aser entrepreneur-tem yaritsü asoshi sentong tajung ka lir, aser Mokokchung district nungbo ibai mezüng block ana nung tenzüker, anungji, telungjem nung tatishitsü tajung sayua meranga inyaktsü ajungshia liasü.
Shirnokisa mapa tasen inyakdir, nüburtemi aginüba ama aser chinüba ama kanga junga yanglutsüla, kechi inyak nung na aser nüburtem sakuku tajangzük angutsü, itemji kanga junga asadanger dang mapa tenzüktsü asoshi paisa ayongzük. Iba mapatong asenoki angateta inyakra yimdak yimtsüng nung rongsenkettsüng aser nüburtem jenjang ajungkettsü imlar, ta paisa ashi.
Mapa ka tenzükdangli majungtsü ama süra tezütanger ano mapa tangaka tenzükdangli, ta asünungbo nübu, mapang, shisatsü aser rongsen laluba den asenoki inyakba mapa kecha nunga takok mangutsü. Anungji, kechi mapa inyakdir nükjidong tajung yur inyaktsü asoshi paisa shisem.
Iba sentong nung Joint Secretary & Mission Director NSRLM – Imtimenla, Mokokchung DC – Shashank Pratap Singh IAS, Project Director DRDA & DMMU, NSRLM Mokokchung – Toshimongla Kichu, Sungratsü village council chairman – Takachiba, Ungma village council chairman – Nungshilepden, ADPM, NSRLM Mokokchung – Moatoshi, Mukhya Sevika DRDA Mokokchung – Senyangerla parnoki shilem balala agi. SHG Ungma-i sobaliba ken ajanga tesentepertem saksalemdaktsü.
The Nokinketer 