Nagaland Legislative Assembly Speaker, Sharingain Longkumer-i 3 buba Mokokchung town Inter-ward football tournament 4th May, 2022 nü yangi Imkongmeren sports complex Mokokchung nung meraketa tenzüktsüogo.
Iba asayamung ya Marepkong Youth Association-i “towards excellence” omen nung ajemdaker kümshi ayongzüka akar. Taküm iba asayamung nung Mokokchung town kübok ward 13-i shilem agitsü.
Mezüng pool ‘A’ nung Arkong, Kumlong, Dilong aser Tongdentsuyong ward-tem ataa lir. pool ‘B’ nung Mongsenbai, Marepkong aser Majakong. Pool ‘C’ nung Penli, Lijaba Lijen aser Aongza ward aser pool ‘D’ nung Artang, Sangtemla aser Alempang ta asayatsü lemzüka lir.
Yaküm 2021 küm Artang Ward-i champion bena lir aser runner up ji Penli ward liasü. 2020 küm alima wara aliba ajanga iba asayamung mekatet. Iba asayamung ya ward telungjem asoshi dang masü tongtibangsa Mokokchung town nung lanur football asaya luyim nung sempet aketertem ajungkettsü aser parnok nem sabang lapoktsütsü nükjidong yur ayonga akar.
Taküm iba asayamung shir ward-i champion bendir parnok nem senpet sen 50,000/- aser runner up nem 30,000/- agütsütsü aser nija senpet best goal keeper, best defender, highest scorer, player of the tournament amala shima senpettsütsü, ta tayongertem sangdongogo. Iba asayamung ya 14th May, 2022 tashi asaya-a amungtsü.
Asayamung tenzüka tanü mezüng asaya Arkong Ward o Kumlong Ward na asayaba, Arkong-i goal 4-0 agi Kumlong pur ayongayonga akok. Goal pezüji Arkong nungi jersey No. 8, Aripong, jersey No. 7, Temsutoshi, jersey No. 5, Inovi aser jersey No. 9, Nokcha parnoki minute 4, 11, 14 aser 42 nung par telok asoshi goal kaka agütsü.
Tanabuba asaya Dilong o Tongdentsuyong na asayaba goal 2-2 nung shingaia mekoki draw asü. Mezüng goal ji Tongdentsuyong nungi jersey No. 10, Opanglemzüng-i minute 28 or lia goal ka yok. Aji süaka, kopi meli-i Dilong nungi jersey No. 9, Toshiwapangi minute 29 nung goal kaji küptoka goal 1-1 kümdakja mezüng asaya tesadang tembang.
Asayartem anisüngzük agir külen, tanabuba asaya tesadang tenzüker minute 36 nung Tongdentsuyong nungi jersey No. 8, Lanusosangi goal ka idaktsü. Dilong ward-ia iba goal kaji küpzüktsü meranga asaya-a arur, tesü maongka nguteta Toshiwapang asoshi tanabuba goal ji minute 44 nung yoka iba asaya draw nung atem.
5th May, 2022 asaya yamai alitsü:
Mongsenbai Vs Marepkong @ 11:00 Am
Penli Vs Lijaba Lijen @ 12:30 Pm
Artang Vs Sangtemla @ 2:00 Pm
(Source: Tir Yimyim)
The Nokinketer 