~ Rev. L. Lima Jamir (Dimapur)

Dr. Meyu Changkiri-i züluba onük “RSS-BJP Yimden aser Khristian Teinyaktsü” den semloka RSS-BJP koda inyaka aru tekümdangtsü kar lemsatepner. Temalen iba sentakba nung Dr. Wati Longchar-i züluba kaket, Tensa den apet Ainkar Ola, nung kanga janga züla angutsü. Tenati ashiba den semloka yangi kü tangatetba o semlak kar lemsateper. Hau, ashiba ama India nüchiso ngur külen, lokti teimbai mulungba yimden yayim benoker külenang, 2014 küm nungiang Parliament nung Hindu temejai kümtetba yimden tazüokba küboki ait ta ashitsü akok. Tanü Nagaland nung NDPP aser BJP party na lungjemer akümba yimdeni nung lir. Parnoki Nagaland küm pongu yimsüsüba mapa nung kechi terenlok mapasa inyakteta ali? Onok nem yimsüsüba menden agütsüra yamai Naga nunger asoshi inyaktsü ta nangzükba kechisa inyakteta lir? Tarutsü Naga lanur atema kechi inyakteta lir? Itemi asüngdangtsü mapangji tang ya lir. 2023 tatashim  mopung aon tenzükogo aser sen-i Naga nunger tamang atidangtsü tenzükogo. 

Political party ajak nükjidong balala yur mapa inyaker. BJP party  nükjidongji India ya Hindu Rashtra kümdaktsütsü ta asüba nükjidong nung tentet aser iba mapadong nung bener aor. Parnoki Hindu tamangba atsünga inyaktsübaji tim dang kechiaser iba nükjidong atalokdaktsütsü parnok tentet. Aseni metettsüba kaji ya: I906 küm Hindu Maha Sabha political party ya Hindu tamang yimsü ajungkettsü tentet. Parnoki Hindu tamangba yimsü wazüka ayutsü, sayutsü aser züina odaktsütsü nükjidong nung mapadong aser maparen ajak inyaka aru. RSS, Jan Sangh, BJP, VHP, Shiv Sena telok ajak ya Hindu Maha Sabha nungi jakzüka aoba aser Hindu tesayuba dak ajemdaker tentet. Hindu scripture Veda tiyongtsü südaktsür India ya Hindu country ka ta jateta yangertsüla ta asübaji parnok nükjidong tulutiba lir. Tanga political party-i India ya Hindu tamanger dang masü, tamang yimsü aika meyokteper akümba lima ka anungji minority ajak kümzüka ayutsü asoshi secular state ka atema noktaker. 

RSS-BJP teloki Bristish nunger aser Khristan missionary marudang India nunger ajak Hindu liasü ta noktaker. India nunger history memeteti India nunger ajak tanaben Hindu küma anir arutsü nükjidong nung mapadong aika inyaker. Hindu Maha Sabha tenzükdang lenir Vinayak Damodar Savarkar-i indang indanga dang India ya Hindu lima anungji Hindu dak alaka tangar ajak aener. Muslim aser Khristan lisopur masü nungji parnoki künü ashioktsür aotsü ta ashiba angur. Anungji parnoki Hindu tamang yimsü kübok India lima “single race, single culture and single religion” akümtsüla aser Hindu yimden yimsüsüba aser rongsen ketzüngsüba maparen ajak bener aotsüla ta noktak aser tanüa RSS aser BJP tangatetba lir. Parnoki Hindu yimsü ya state religion ta sangdongtsü meranger. Shirnok India nung liner parnokji Hindu akümtsüla ta notaker. Ibaji tai tangatetba ta tanga political party aser intellectual ajaki aitsür.

BJP ya RSS teloki tentetba political  party ka lir aser itemi nükjidong atalokdaktsütsü inyaker:

  1. India ya Hindu lima (Hindu state) ta agizüka, Hindu tesayuba nung yimden, Temzüng, tsüzüng-ozüng, sobaliba ajak bener aotsü noktaker. 
  • India nung tamangba balala, sobaliba balala aser oshi balala malitsü.  Ka dang alitsü. Lokti teimbai kechi benshir, tetezü Hindui, aji ajaki tashi angaa benshitsüla ta noktaker. 

Hindu yimli (Hindu Rashtra) akang akanga yangertsü asoshi BJP-i aniba sorkari itemi inyaka arudagi aser inyaktsü merangtsü.  Tatishitsü kar:

  1. India nüchiso ngur Temzüng nung “secular democratic country” ta agizüka bener aruba ya magizüker.  “Secular” ta zülua alibaji endoktsü asoshi noktaker. Yongji Jammu & Kashmir nung Article 370 koba ajanga Muslim nunger kümzüka ayutsü asoshi tangar dang ali mayoktsü ta aliba agienogo. (Nagaland aser tanga tribal statetem menua mali ta tetsübu o aika jembia arudagi).
  • Kaket riju Hindu tamangba atsünga Vedas national book ama agizüka school ajak nung sayutsü merangar. 
  • India lima ajak ka küma lungjemdaktsütsü aser alima dang Indiai iba tetsü oshi ya jembir ta sayutsü asoshi Hindi oshi angazükdaktsütsü aser jembidaktsütsü terenemba lir. Anungji Hindi class X tashi compulsory kümdaktsütsü nükjidong lir
  • CAA (or CAB) ajanga temeküt linüktem – Bangladesh, Pakistan, Afghanistan nungi rishikangshi asüba  ajanga Hindu, Jain, Buddhist, Christian aser Sikh küm trok tejaklen nungi Indiai  arua alir, parnok India senso kümdaktsütsü melar. Muslim nungerbo iba nungji medendaktsür. Ano India ajunga nung Uniform Civil Code, koba Hindu tamangba yimsüi melaba ama benoktsü meranger. 
  • Tanga yimsü mamangdaktsütsü asoshi anti-conversion law state yanglutsü.
  • Alima dang India ya Hindu country tulutiba ka ta sayutsü atema, aser alima ajak nungi arua reprangdaktsütsü, külemtsü asoshi Ram tekülem ki yangludagi.
  • Iba den Muslim nunger madak tashiyim amshitsü, amokmerentsü asoshi nashi political symbol ka tamang yimsü den sendaktepa tsüngrem amai kümdaktsür külen, nashi metepsettsü, shi mayoktsü, nashi shi machitsü ta state aika nung ozüng yanglu aser iba ozüng dak ajemdaker Muslim nunger aika tepsetogo, aika dak zükogo. Nisung dang nungi nashi ambulance tongtibangba kümogo. Ano Muslim o Hindu na tsüngda kibalembu nokdangtsü atema “Love Jihad” ta, Muslim yimsü amangdaktsütsü mechi kibong akümba ta aija rishikangshiba, tepsetba osang aika azünger.  Item ajak ya Hindu Rashtra ta sayutsü atema inyaker.  Shiv Sena lenir Thackeray-i India lima Muslim nunger yimjung nung linera, parnoki mapa asem inyaktsüla (a) Hindu nungeri ama tetsür ka ka dang agitsüla aser tanur aika masotsü atema family planning amshitsüla (b) Nashi metepsetsüla ta Muslimi noktaktsüla, aser (c) Hindu yimsü ya India nunger tamangba yimsü ta agizüktsüla.

BJP party ka kanga kara ainer. 1952 mezüngbuba tatashim toktep nung Hindu Maha Sabha party-i tata menden 4 aser Jan Sangh-i 3 dang ngutet. Mapang talangka dang Hindu party-i yimsü mesüteti arur, India Hindu yimli küboki aitdaktsünera asentenshitsü nüngdak ta sür Atal Bihari Vajpayee tekolak sür BJP 1980 nung akangshia tenzükshir aruba, 2014 küm BJP kisüngi tata menden 282 ngutet, aser 2019 nungbo 303 ngutet. 2014 küm nungibo BJP party-i India ajunga züp ta arakmoka yur, Parliament nunga tatartemi Sri Ram aser Bharath Matha, tetezü India Hindu empire küboki aitogo ta ashiba temaitsü shia tata menden agizükba tenangzüktepba Parliament nung agiba nguogo.

Wati Longchar-i ashi ama, 2014 nungi RSS nung züngsem süa aruba minister tiemba, tat. agi, minister ajak agi 53 aser item rongnung 38 Hindu hard core ta ashir. Muslim shirnoki Sri Ram ta mashi, parnokji aitsüba aser sensamasatsüba osang nguogo. Alima dang India ya Hindu lima, Hindu yimsü amangertemi yimsü asür ta sayutsü asoshi Hindu sadhu, RSS nunga züngsem süa arurtem aika dang shimtetogo;  sadhu-i asemba süoshi dang aikati asemer, sadhu-i pangsemo talanglang ayuba ama 2019 tanaben PM Modi adokerbo pa tereprangtsüa Hindu sadhu ama dang angutsü (pa Gujarat nung CM asüdang aser tang noksa medemdangang). Ashiko taruba tatashim nungjibo PM-i anir tata menden tokteper aika sadhu ama dang angutsü. Anungji 1952 nungi kanga dang meranga inyaka aruba, 2014 nungiang Hindu party temeja tenteti India azüoka yutetogo. 

Yamaji Hindu yimsü media ajanga sangdongba, shisashiba azüoka ayuba, yoga, astrology, nashi ambulance a.a. jembiba mapang ka lir. Lokti nung ochi mapa mapatem ajanga Nagaland state  asen pei sasa menoktaktetba state ka asünungji BJP külemtsüsa akümer. Sen mechi political part manger-mesangwa nung melenshir. Tzümetsüng tulu nungoka aruba ama “Hindu” No.1, tanga shilu, oshi, yimsü nüngdak mali, anungji tashi mangartem merenshiang, rishikangshiang, rongdokjang, tepsetang ta Government tashi nung inyaka arudang, Nagaland nungi MP ka-ana oa noktakdang, India ya shilu aikati akümba kong ochi, sobaliba aser tamang yimsü aika lir, item ajakji wazüka ayutsü tim ta shitetba party ka nüngdak. Anungji Nagaland tejakleni odaktsütsü atema ochi shir aser mangdang tejangja akar shimtsüba tang ya mapang tajung. Kechi party aseni yarir aji metetdi. Asen meyongnem meyokli, saka Naga lima tarutsü jenjang nükla repranger asen senti meyoknemji agütsüdi.