Rotary International District 3240 (2021-22) District Governor, Rtn. Dr. Mohan S. Konwar-i 10th May nü Rotary Club Mokokchung semdanga Rotary House nung sentong tajung ka agia liasü. Pa den Assistant District Governor, Zone IX, Rtn. Ashok Agarwal tetushi tesemdanger ka ama arua densem.
Iba sentong nung District Governor, Rtn. Dr. Mohan S. Konwar-i mapang tatsüka agia jembidang, Rotary International ya jangratemtsü lokti ka lir, kechiyong iba telok nung adenba ajanga nisung metettepa medemer yimteper, telungjem senden akar, nübur tenzüktsü maongka angur, loktiliba nem teyari agüja shilem agiteter aser lenisüba tsütsü terenlok balala angur, ta metetdaktsü.
Rotary International ajanga India lima polio tashitak samatsüba den ano alima tesem balala nung meimchir asoshi tajangzük akaba mapa tapu inyakbatem kar pai lemsatep. Iba telok nung züngsema taküm melenshidaktsüba nung shilem agia tenzüktsü asoshi paisa tayongzükba ka agütsü.
Iba sentong nung Asst. District Governor Rt. Ashok Agarwal, Rtn. Allen Mark Longkumer, Rtn. Tiarenla Jamir, Rtn. Imlimeren, Rtn. Maniraj Rai, Rtn. M.B Longkumer parnoki shilem balala agia liasü.
The Nokinketer 