~ Dr. R. Zülu Jamir (Kümlong)

Tanü asen aliba lima ya ‘Artificial Intelligence’, koba dang AI ta ajar, ibai ayimsünga amshiba putu tensa ka nung alir. Rarai aotsü asoshi nisung masü saka machine yoktsü renemteper. Nisung melena Office aser counter balala nung dealing assistant AI ajanga mapa inyakteper. Tatishitsü agi, nai computer shiti kar züludang attachment nung yoker ta zülur yokdang, amar attach masü yok nung AI ajanga, document attached masü, saka odang yoktsü asü masü ta asüngdanger. Meeting ka kanü nung asenoki kwi baji nung reminder yokdaktsüner set süa ayu nung mapa shitak nungji AI ajanga remind sütsütsü ta alima kanga dang efficient süa bener otetba putu ka nung alir.

Ano tanü tensa nung ‘Radio frequency Identification’ ajanga meimchir temang nung tsüjang teket ‘Chips’ inoker pei ayak (identity) kümzüka ayuba den, cash cards kecha mamshii cashless transaction küma aoba ajanga alima tesüngmangtsüka renloka aoba asen nüki angur.

Asen Naga nungera iba ama temelenshi lima ka nung alir. Süra tanü asen nüburtem koba jenjang ka nung noktaka lir? Naga  lima science & technology renlokba nung koba jenjang nung lir? Naga nunger medical health tsütsü koba tashi renloka odar? Naga nunger tazünger lanurtem sorkar mapa nung koba tashi renloka odar? Naga nunger inter-state lenmang koba tia nung lir? Naga nunger rongsen ketsüng nung koda renloka odar? Nisung aser Khrista tsüngdang koba tashi ochi nung noktaka lir aser tanela jenjang renloka odar?

Asen lima maparen ajak nung renloka odaktsüner, mangdang akaba, ochi meimba lenir shitsü nüngdak. Tanü asenoki shimtetba lenirtem ya asenok tenzükdaktsütsü aseni shimtetba lir. Saka aseni shimteter külenbo asenoki parnok tepenlak (tail) nunga kongshitettsü makok! Tanü Tsüngremi shimtetba nüburtem kong noktaka lir? Tsüngremi Israel nüburtem dang ashi, “Nenok kü nübur asütsü aser ni nenok Tsüngrem asütsü…”(Anitet 6:7).

Laishiba nung “Election” (shimtetba) indang aiben shia angur. Elect asübaji tashi amshitsü asoshi masü saka tenzüktsü, kuli asütsü, aser nübur atema pei taküm bendanga agütsütsü  asoshi shimtetba kuli tejangja angur. Kija dang masü, kin ka ajonga `Elect” asüba angur. Tsüngremi Israel kin alima dang Tematiba Tsüngrem ochi kuli asütsü balaka “elect” (shimteta) ayu. Putu balala nung  nüburtem nungi yimsüsür, chuba shimteta alima tenzükdakja aru. Yimsüsür shirnoki nübur madak tashiyim aser ochimashi yimsü asü, parnoki atsüngdok. Tsüngremi ainkar putu balala nung shimteta  Tsüngremer Ochi o bendang ayimoktsü. Tatemsa, Tsüngremer Election nükjidong atalokdaktsutsü asoshi Tsüngremi Yisu Khrista alima alangzüktsü shimtet (Luk 9:35). Tsüngremi atemzükba electionji temerük aser ochi. Pai pei asoshi masü saka tangar ajangzükdaktsütsü asoshi election atemzük. Anungji nübur rongnung nisung ka, kin ka balaka/alakteta `elect’ asübaji Tsüngremer sentong aser Tsüngrem sentong atalokdaktsütsü shimtet ta angatetdi.

Tanü asen tendaka nüburtemi lenir “elect” asübaji tim aser ya Laishibai melaba. Saka tanü asen tendak election agiba yabo, pei ajangzüktsü asoshi dangashi tangar ajangzüktsü asoshi mesüra alima tejakleni anitsübo nükjidong mangur! Naga nungeri “Nagaland for Christ” ta kera kera mekazüka ayu kechiyong Yisu metetra arishi den takar küma teti pela alitsü ama bilem! Tanü asen nüburtem Yisu manioki, mapa agi masü saka tepang aser tema tazütsü agi mekazüka ayuba agi shiranga lir.

Tsüngremer election nung asenok ya Pai shimtetba kulitem lir (1 Timothy 5:21). Yisui ashi, ‘Nenoki ni meshimtet, saka ni nenok shimtet…’ (Yohan 15:16). Asenok Yisu Khristai shimtet süra, asenokia kechi aser shiba shimer? Tanü asen Naga nungeri Yisu mekazüka ayu, saka anogoshia alima rongsen, jenjang, tashi aser konang dang shimteter. Khrista maten asen sasa shimtetbatemji shimang aser tanela anaprongla tesamai aitsüba lemang lir ta metettsüla..

Yisui Mathi 7:13-14, pai shimtetba purtem tesatemba tesamaba süngkümbongi masü, saka taküm leni aniba temesüba süngkümbongi aitsü indang shia lir. Tanü asenok amangbapurtem koba süngkümbong nung noktaktepa lir! Asen dangi election yakta arudar. Asenok kong noktaktsü renemdar? Ochishir lenir shimtsü asü, sen meimer shimtsü?

Election mopungsem ya alima yimya den kanga sütepasa arur. Candidates aser agent-temi nübur nüngdak kanga jungasa apiteta bener arur. Benjong tulu ayonga chiyungtepba den, tesüiba pututem nung nüburtemi jean pants aser jackets bulua manguba mapang item süoshi alemba indangsa jembir. Iba sülen mapang balala nung torch light, radio, tape recorder, blanket, television, refrigerator, washing machine, laptop, smart phone lemtsüba bilemteter.  Nisung karbo motor cycle aser gari tashi agütsüba kuli lir,  Aruya aliba election nungbo kechi ka alemtsü ta bilemer!

Item alima oset-tsüset yakta jena aor aser samaa adoker. Sen-ji agimadoktsü. Saka kecha dena medemdangtsü makokba jenjangji asen tanela lir.  Ochi agi dang tarutsü alima  jenjang alizüktsü akok. Ali rongsen, süong agi achiba aser aori rakpoka bener aoba nem asen tanela ayokba ya kangasa tetamatsüka ta nibo bilemer. Ibai ajanga tanela dang masü, saka lanu putu jenjang tepseter ta metetdi.

Nungtogo billionaire Jeff Bezos, shiba Amazon online shishilembaba kibur lir, pai yamai ashi, ‘ Nai ne taküm rajema meteta melira, nai na ashioktsütsüji kecha meteta mali”. Asen sasa asenji junga meteta melira, tangar tasa nung masü saka pei tasa nung samatsüji menua mali.

Khristan taküm ka ama temerük taküm shimtettsüji pei sasa shimtettsü mapa lir. Tanü nai kechi shimteter? Arung samaa aotsüba yimli dak temulung metangli, saka tatem makaba Khristar temerük aser temeshi senmang shimdi. 1 Peter 1:16, yamai ashir, ‘…Nenok temeshi liang, kechiyong ni temeshi lir’. Sen masü temeshiba lemang shimdi.

*****