~ Sashikümla Longkumer 

Alima nung tanü meimchir rajang kümdaktsüba ayawara tulutibaji chiyungtsü, chi makaba wara masü saka ochi wara ya lir. Alima kaji sen kisüng agi masü, political party kisüngi masü, saka ochi agi dang terenlok bener arutsütsü akok. Ruling party nung liakasa, sen aika centre nungi yokakasa, lenir aser nübur dak ochi makara teraksa dang bener arutsütsü. Ochimashi mapa ajanga tanü India nung terenlok maparen Nagaland teküboktiba jenjang nung lir ta asübaji, sen manguba agi masü, saka ochi makaba ajanga ta metetdi. Ochi nung rongsen ketdangsüba ajanga dang Nagaland yanglushitettsü.

Tanü nürburtem tiaji reprangdangra ochishir tezüleni yoker tiyazür metendaktsüba putu, tiyazü agi ochi kümdaktsür ochi nempangba putu, ochi jembitsü, inyaktsü, takümi lia sayutsü melena yazüyaponga tim masüba maparen jenti inyakba angur. Ochi dang jembira aser inyakra tangar kodanga memeneptsü ta election mapang jembiba, aser development mapa  sen makara meinyaktettsü. Ochi shia dang kilenzüng mesüra population agütsü nung asenok subsidy, schemes balala nung tangar memeneper ta, election mapang kodang tongdir ochishia dang inyakdi asü nungbo electoral roll nung tangar memeneper ta tanü asen aliba putu ka lir. Politics nung ochi nung noktakra kodanga takok mangutsü ta aiben jembir. Yamaji tangar meneptsü merangdang, tashiyim agi takok angutsü merangdang aiben ochi ajempanga yutsür. Tanü alima kin balala reprandangra, ochi nung noktaker lenir aikati alima tejakleni aniba azünger aser ochimashi yimsüsür kübok azüdokshi aser pei nübur tajemrep tia nung yudaktsüba angur. Asenok tera sadema, tangar den tokteptsü merangdang mesüra yakta ajangzüktsü merangdang asenoki ochiji amongdoka doktsür ta metetdi.

Mika 1:1 “Ochi inyaktsü asoshi Kibubai akanger” nung ajemdaker  2023 general election  nükla nung iba omen  ya shimteta lir. Tsüngremji ochi aser ochiba mapa ajanga dang Tsüngrem külemtsü akok. Ochi inyakbaji Tsüngrem külemba lir. Ochi sendokbaji Tsüngrem sendokba lir. Ochi nung noktakba aser inyakba ajanga dang kija taküm aser alima nung yimchiyimjung alitsü aser terenlok bener arutsü akok. 

Yihuda chubatem Yotham, Ahaz aser Hezekia tendak Kibuba o Mika ainkar dangi jungkai adok ta Mika 1:1 nungji shia angur. Ibai Assyria yimli kanga merenba mapang ka atalok. Mika mapang alima ochi samar teraksa tebenja temenen agi sünga liasü. Rongsen meimba agi raratep jenti liasü. Ochi inyakba ajanga Tsüngrem tushir ta amadok. Tsüngrem melen, ali rongsen külema aküm. Iba mapang, Mika ainkari Israel aser Yihuda nüburtem anema ochi sendokra mangyim ajurutsü aser meshi meshia samatsütsü ta shin. Temulung meyipa ochi dangi meyipra Tsüngremi tanaben Yihuda moatsütsü indanga shinba angutsü.  

Mika tekong 1:8  nung ochi ya tema tazütsü inyakba mapa masü, saka nisung mulungjang taroktiba nungi adokba mulungsentsü koba agi nisung aser Tsüngrem naprongla peladaktsür aser itemji  “Ochishia inyakba, yimlibilem aser temeim, aser Tsüngrem den ajemalua jajatsüba” shia angutsü. Item jaklaji makara ochi meinyaktet. “To act just”, tetezü ochishia inyaktsü indang ashir. Anogoshia kechisarena nung, jembishinü aser inyaksangshi ajak nung ochi alitsüba indang ashir. Kodang ochi nung lidir tamajung bilemba, tangar ajemmoka yutsütsü bilemba, pei tajangzük asoshi ochi nempanga yutsüba, tiyazü aser ochimashi mapatem anema noktaktettsü. Ochi agi lokti ka wazüka ayutsü aser ajungkettsü atema noktaker aser inyaker. Mika tendak ochishia inyaktsü/inyakba ta asüba ya shitak aser tiyazü bendangteta jangja jangjaa metetba nisungtem ta angatettsü akok. Asen nübur yimchiyimjung, temoatsü aser takok nung linüra ochiba nem yimsü südaktsütsüla  kechiaser Laishibai ashir Nai temulung telungtiba nung ochi aginür. (T. Ken 51:6).Tsüngremi  kechi inyaktsü mulunger, akhanger ta sürapang OCHI ya lir,  Ochi inyakra asen lima aser takum jenjangi tangar menepa akümtsü.

Tesasatsüka meimchirtemi aiben Ochi ya talisa election mapang tiyazü agi meyipsa amshir.   Hau, temeim agi sünger aliba Tsüngremi kodanga meimchiri takzüba tensa aser mapang nung obendang magütsür. Asen Aortemia Election mapang nung Tsüngrem tenzükertemi ochi sayutsüngiba amajok kümdakja, asen tensa asoshi ya “shitak” ta tangatetba nung tiyazü seret aisü nung amshia lenisüba menden nung amenertem aser nütsüng ajak sakoko lia arudar. Karibo Yisui masü, saka center den sentaktepa aliba political party-i dang terenlok bener arutsütsü ta tashi jembiogo. Saka ochi jendokba ajanga Nagaland tanü tashi light aser tzü, lenmang maka lir.  Kenü anogo Tsüngremer tatasaba taochi süitemadokra pai ain adoka asen tiyazü seretji meküptoktsüra, alima rangben matsungdang asen Aortem tanela, tamang, shisatsü, rongsen ketsüng, yimsüsüba kechisarena ajak nung mangsa akümba tia ajurutsü.  Anungji item maksü teraksatsüba tetsübutsü tia nungi kümzüktsü asoshi asenoki tiyazü seret koba yimya balala nung amshia arudar aji ochi agi melentsü nüngdak.

Electoral roll nung ochimashi inyakba ya tamajungtiba rongnung ka. Aor yim ajak yangji jenbua mali. Tat. agi., Tzükong ka nung arogo züngsem ajak agi nisung 6587 tamangertem dang, saka eroll nungbo 11530 tetezü 4959 talila. Yim ajak, tzükong ajak nung arogo züngsem aser erollji medemdangang, kanga dang tepila angutsü. Iba dangi Tsüngrem tsüngdang tiyazü seret ammba ta shitetdi. Tsüngrem tsüngdang asenok ajak yazür kümdakja lir. Ibai meindok tashi asenok Tsüngrem dang sentsüh tulu lir. Tasür tejak angutsü mapang tajungtibaji aser tasürtem aika shia arubaji election mapang ta metetdi. Ya Tsüngrem tsüngdang kangasa taaktsü teshinem menemba  rongnung ka lir. Aseni sen tera talila ngunüdang electoral tudaktsütsü asoshi farm house ajak kilen kümdakja tiyazü census yanglua, tenüng talila inokyongbo iba jagi asangsang nung kodanga terenlok bener marutsütsü. Sakasa asenok Aortem küm shia tasoba dang nungi tasübaang teimba akümer, researchertemi yamai dang orapang putu ka nungbo Ao kin samadoktsü ta asadangba mapang.

2013 NLA election mapang coup sür yimtsüng 66 liasü aser iba sülen general election agiba mapang 36  liasü. 2018  election nung yim 30 coup sür agütsü, item nungji 5bo tangari arua coup asüba lir. Saka tanungba 25 jibo candidate aliba yimer dak sendakba lir. Coup asüba ya yimya ana agi asür.  Tashiyim ajanga tangar marudaktsüi kari dang meyongnem agüjadokba, aser tanabuba nung free poll amai saka yimdeni mulungba nung ajak meyongnem agütsüba. Election agiba yimya nungbo temelenshi terabo lir amai sayur, saka ano ochibo mesayuteter kechiaser tang tashi pei meyongnem magütsüteti yim aika nung tangari  proxy agüjadoker aliba tatalokba aika lir.

Külen candidate sen endokba aser nüburtemi chitsüba ya bilemdangra tesüngmangtsüka. Dec 17, 2018 Youthnet nungi osang agütsüba agi candidate 35 kijai one hundred ninety one crores and ninety lakhs endok ta sangdong. Nagaland ajunga nung sen teimtiba endokbaji tanga nung masü, saka asen Mokokchung district nung endok. Item ajakji tulutemi parnok office nung inyakdang nübur terenlok sen auya aliba ta meteter. Sen paikaji shibai meshi? Shiba  pocketi ai. Party leader kar pocket-i ai. Nagaland merenlokbaji sen maliba agi masü, saka yimsüsür aser tulurtemi ochi mashi inyakba ajanga aser nüburtemi pei meyongnem ayokba agi lir ta metetdi.

Item ochi masüba inyakyim ajak atema sentsüh ya shibai otsütsü? Tsüngremia peladima? Alima dangi terenlok bener arutsüdi ma? Tangar den asen talila kar ta sayunüdang tanü ajung asaa bilemba, inyakba item memerükba tzü ajak ya asen yimti dangi yimoka aiter. Election kodang arur nisung aika ni sür shiba ali, “kya hai” ta asüküma, hospital-i khen aoba bill madoksatsüba sürnung angati sen ishikaji pocket nung semer iba jagi taküm piyong chia-ajemtsü ama asatena tangar tenüki mongui jajar. Asen tamanger rongnunga yamaiji kar danga ali asü? Khen shisadangdi, tesüiba mapangtem toh khen shilua reprangshidi. Item mazükmaru yimya, aser ochimashi mapaji doktsür Tsüngremi asenok dang ochishia alitsü akhanger. Ochi inyakra alima tejekleni aotsü. 

Angati anguba mesüra ochimashi rongsen agi tanur züngtetdaktsüba mangutsü, ne temang metsütem dak tartsüji ilanglang, ochimashi sen agi yangluba kitem nungji  na aser ni meliteti doktsür asen taküm tempangtsü shibai metet. Ochimashi rongsen ajak künübosa samatsü,  election nung tangar sentsüh atsüa asen pocketi itdaktsüba jagi talangkabo maotsü. Ali taküm tatsüka alidang Kibubai ochi  inyaka alitsü  akhanger. Tsüngrem den ochi nung jajadi, ochi jembidi, ochi inyakdi, süra nübur ajak ajangzüktsüsa asen lima nung terenlok mapa inyaktet.  Ochi mapa ajanga alima tejakleni odaktsür ta nokdakti.

*****