Dr. S.C Jamir

‘Framework Agreement’ koba 3rd Aug, 2015 nü India sorkar o NSCN-IM na tsüngta sign sütepa lir, iba nungji nüchiso, Naga litsü lungjemtsü (integration), wako balaka aser temzüng balaka indang kecha shia mali, ta 20th May, 2022 nü Dr. S.C Jamir-i par kidang Mokokchung nung osangbener senden ka nung metetdaktsü.

              Küm 20 tashi jembia arudangji Naga yimden tebilemtsü dak sentakba keno nung tejembirtemi peria jembir asütsü. Tatishitsü agi; Simon commission, plebiscite, 16 point agreement itemji tatongi jembir alitsü. Anungjiang, 2015 küm 3rd Aug nü India sorkar o NSCN-IM na tsüngta India Prime Minister aser Home Minister densema ‘framework agreement’ ji yanglu, ta pai ashi. Iba framework agreement yangludangji telok anapronglai teka matena salemteper ang agizüktepa sign sütep, memulungibo yamaji meinyaktsü südi, ta pai ashi.

              Mapang talangka parnoki framework agreement indang document-ji telok dang mesayui aru, saka kodang parnoki ibaji temai bener adoka sayu tenzük, yangto – nüchiso (sovereignty), Naga litsü lungjemtsü (integration), wako balaka (separate flag) aser temzüng balaka (separate constitution) indang zülua maliasü, ta pai metetdaktsü.

              Iba den külemi 17th Nov, 2017 nü India sorkar meyongertem o NNPGs na ‘Agreed Position’ tejangja zülur sign sütepogo aser nübur nema metetdaktsüogo aser iba nungjia Naga nüchiso aser Naga litsü lungjemba indanga kecha shia mali, ta kuli kar bener arua lemsatep.

              Ibaji meten süa Naga yimden dak sentakba nung India sorkari 31st Oct, 2019 nü NSCN-IM aser NNPGs lenirtem Delhi-i jaoka keno ajak tembanga jembiogo, ta paisa ashi.

              Pai India Prime Minister den anaben aser Home Minister den khen ajurutepa Naga yimden tebilemtsü keno dak sentakba nung sensaksemdang, India sorkar tenoktakdakji kanga tejangja; “India ji linük ka dang, anungji, India lima temzüng aser wako ka dang asütsü ta shiogo”, ta Jamir-isa metetdaktsü.   

              Manipur nung aliba Naga nungerji libuyimpur (indigenous) sensotem lir, yamaji Nagaland nung alir Naga nungertemjia kasa libuyimpurtem lir, aser Arunachal Pradesh nung alirtema yamaji… Anungji, terataba kecha meli-i joko Nagaland-a anisüngzüka yimjiyimjung nung alitsü tim, ta paisa ashi.

              Naga nunger tebilemtsü ya telok-telok (factional) tebilemtsü ka masü, ibai Naga nunger tebilemtsü, ibai jurila company ka indanga masü, ya Naga nunger meyong, joko Naga yimden tebilemtsü tatembangleni arur asünung, taoba otsü mejembi-i kati ka taoba ta bilema tarutsü atema asayameyanga jembitsüla, ta paisa shisem.

              Tang ama mapang ka nung o tajung jembitsü melena nisung arishiba yabo tim masü. Nübur meima lira aser tarutsü Naga nunger atema bilemra, shisa tajung agüja Nagaland tajungtiba yanglutsü aser yimjiyimjung asoshi inyaktsüla, ta paisa ashi.

              Nagaland nung aliba lanurtem dak tashi lir, Nagaland temelenshi bener arutsü parnok dak tashi lir. Saka tia maka tanü Nagaland ya mesüngjemba agi süngogo, yimsüsüba telaor dang lir, tensa tiajia reprangdangra nüburtem sademrabo masü, saru onsara…iba ama tensa ka nung state kodasür renloktsü, ta paisa asüngdanga ashi. Nagaland ya Christian lima, anungji, Christian yimsü tamendakdak sür yanglu mesüra tarutsü putuji ayatai asütsü, ta paisa tekümdangtsü olen ka metetdaktsü.

Tanü lenirtemi tesüiba indang dang jembir, anungji, state ka tejakleni onüra tanü kechi inyakteter ta asübaji tongtibang kechiyong tarutsü tesangwa atema atemaji tanü ya kanga tongtibang lir, ta paisa shisem.  

Telungpur aser temapur lenirtem dang temepishiba o ka ashidang, tilateri nung kati ka mebangsentepi asenok ka küma lungjemer Naga nunger dak aliba jakla tajung, ochishiba, tasü tait, temulungtetba, taremzük shisatsü alitsü asoshi tayongzükba agütsü.

              Nagaland Legislative Assembly nung Naga integration atema aiben telemtetba agiaka mapa mekümtetba indang osangbenertemi SC Jamir dang asüngdangdang, asen kidanger state-tem (Assam, Manipur & Arunachal)-i mulungra tebilemtsü mali, saka iba onük jembidang item state jagi ali tila kata agütsütsü mulunga maliasü, aser iba dak sentakba nung centre dak tashi mali, ta pai jangjashitsü.

              Solution-ji koba tashi nung tembangtsü ama? ta metetnüa asüngdangdang, anogojibo ashitsü makok saka taruba election matongdangsa solution ji arutsü imlar. Kechiyong BJP nükjidong (manifesto) to ‘election for solution’ liasü, anungji, parnoki nangzükba amaji inyaktsü tim aser inyaktsü imlar. Political party ka atema election nükjidong ji kanga tongtibang lir, parnoki jembiba ama meinyakra parnok nübur tsüngta tamakoker ka asütsü, anungji, parnoki ibai süoki ia agitsü tim, ta paisa metetdaktsü.   

*****