NDPP MkgRegion ketdangpur aniokba sentong ‘Just A Venue’ nung meraketa agir külen, tasen shimertem den sentong nung tongti shilem agirtem külemi tangokba noksa nung angur. Mokokchung, 21st May, 2022 (www.nokinketer.com)       
Metsubo Jamir, Minister (nokinketer.com)
Imnatiba, Advisor & MLA (nokinketer.com)
Tongpang Ozukum, Minister (nokinketer.com)

Nationalist Democratic Progressive Party (NDPP) Mokokchung Region pur ketdangpur aniokba (office bearers’ installation) sentong 21st May, 2022 nü ‘Just a Venue’ Mokokchung nung meraketa agiogo.

              Tanü iba sentong nung RD Minister & NDPP Mokokchung Region In-charge, Metsübo Jamir-i jembidang, NDPP party ya tenzüker küm ishika dang saka nüburtemi kanga sapua kümdaki, anungji, iba party ya terayanga aotsü asoshi meranga inyaktsüla, ta ashi.

              Mezüng tenzükdangbo nübu ishika dang liasü, saka tanübo joko nübu tulujunga kümogo, ya asoshi nüburtem dang pelatsü tim, aji oda, asenoki mezüng party tenzükba nükmenji mamatoktsü asoshi paisa shisema liasü.

              NPF MLA shirnoksa NDPP nung denogo, parnok denji amalitepa akok tashi yaritepa aotsü asoshi paisa ayongzük. NDPP ya party tajung ka lir, anungji, asenoki iba party ya meimtsüla aser tanga party-tem anir arua züngsemdaktsüba den joko NPF party ya tesamaleni arur asünung, NPF nung alirtemjia anir arutsü ajungshia liasü.

              NLA Speaker, Sharingain Longkumer-ia NDPP party ya nübur nem teimla agütsüba party ka südaktsüba den nüburtem nem iba party nükjidong kanga angatetdaktsütsü asoshi ayongzüka liasü.

              Mokokchung district nung koba party terayangdaktsütsüla mesüra koba meyangdaktsütsüla aji metettsüla, ta Advisor & MLA, Imnatibai metetdaktsü. Party karbo asenok dak mapet lir, anungji, itemjibo asen limai maitdaktsütsüla aser political party kaji nükjidongji tejangja akatsüla, ta paisa shisem.

              Akhi aser tanü putu na balala, anungji, tanü putu den sütepa aoba political party ka asütsü asoshi pai ayongzük. NDPP party ya Mokokchung district asoshi temoatsü party ka sütettsü, teyangdaktsütsü aser lenir tajung adokdaktsütetba party ka asütsü asoshi Imnatibaisa ayongzük.

              Naga nunger atema Naga yimden tebilemtsü keno ya kanga toingtibang lir, anungji, iba dak sentakba nung sorkaria süoki ia bilemer aser meranga inyaka arudar, ta Minister Tongpang Ozüküm-i mapang tatsüka agidang metetdaktsü. Tang ya Naga yimden solution atema jembiba mapang ka asünung, taruba state election ji agitsü/magitsü’ar mapangi bener arutsütsü, saka asenokbo renemer atatsüla, ta pai ajungshia liasü.

              Tanü joko NDPP nung adener telok tulu kümogo, anungji, election mapang ticket alemdang ashiko mepetmesü adoktsüa akok, saka timtem tulu madoktsüsa kati ka dang atsüanem kateptsü renema lidaktsünür, ta paisa shisem.

              Nagaland NDPP General Secretary, Mayangnungba-i NDPP Mokokchung Region ketdangpur aniokba (office bearers’ installation) maparen ketdang asü. Artang Baptist Arogo Pastor, Dr. Bendang Longkumer-i team tasen pur asoshi temoatsü meshia sarasademtsü.

Sentong nung Nagaland NDPP Vice President, Imtiyanger; Nagaland NDPP Vice President, Aolepden; NDPP Mokokchung Region President, N. Bendang Jamir; NDPP Mokokchung Region Vice President, Lipokzülu; NDPP Mokokchung Region general secretary, Repameren parnokia shilem agia jembi.

Iba sentong nung NDPP central office den Mokokchung Regional office aser Mokokchung district kübok constituency 10 nungi NDPP party lenirtem adenshia shilem agia aden.