Mokokchung nung ‘Sakhi One Stop Centre’ ki 6th June, 2022 nü Commissioner & Secretary Dept of Social Welfare & Administrator, NSSWB (GoN), Martha R. Ritse-i meraketa lapoktsüogo. Iba ki tasenba Mokokchung Town Baptist Arogo, Associate Pastor, Yanglo Pongen-i meshiteta sarasademtsü.
Martha R Ritse-i iba ki lapokja jembidang, Mokokchung nung ‘Sakhi One Stop Centre’ ki tajung sütetba atema tamasa tenüngsang agütsüba den Mokokchung Centre ajanga tanga district-tem dang tatishitsü sayutsüsa junga inyaktsü imlar, ta lai ashi.
Tetsürtem kümzüka ayuba mapatong takok angutsü asoshi district administration-i anir stakeholder kwika lir ajaki nungita yaridaktsünür, talisa Watsü Mungdang ajanga iba teyari ya nungdakbapurtem tongtettsüsa osang perokshidaktsünür, ta lai mepishia metetdaktsü. Tetsürtem atema nisung shia ambassador kaka akümtsü asoshi laisa ayongzük.
Iba centre ya Mokokchung district songjen atema lir, anungji, tetsürtemi tebilemtsü balala ajurudang yangi arua iba maongka agitettsü akok, aji oda, iba teyari ya aikati memetet asünung, iba indang ya tetsürtem nem angateta ashitsüla, ta Mokokchung D.C, Shashak Pratap Singh IAS-i jembidang metetdaktsü.
Sakhi One Stop Centre Mokokchung Majakong Ward kübok IMDH Nurse Hostel anasa lir. Mokokchung SOSC ya March 2019 küm amenoker külen tanü tashi arudang Mokokchung district nung tetsür tebilemtsü dak sentakba case 50 shi aruogo, ta osang ajanga metetdaktsü.
Iba sentong nung Sakhi OSC Mokokchung nung Centre Administrator, Wangshinaro Yaden menden liasü. Sakhi OSC ki asüba indang osang tatsüka SDO (C) & Sakhi OSC Mokokchung Nodal Officer, Sentilong Ozüküm-i lemsatep.
*****
The Nokinketer 