~ Rev. Ayutemjen

Inkishi Tebilemtsü: Okila

Asen Aor tetsü-tebou putu mapang nungi yim ana tsüngda mangatettep tulu adokdang “Inki ashiba” kanga bulua liasü. Inki ashiba nungji yim ana tsüngda khenyongi amalitep makatsüsa kati ka jendokadokba “Total cut-off” lir. Sürabangla Inki ashiba ajanga nübur kechi tajangzüksa bener arutsür, koda yari? Laishibai kechi ashir? Aor ajak Khristan yimsü agizüker asü nung iba “inki ashiba” ya maneni benshia aotsü tim asü masü” Inki ashiba dak sentakba nung Laishiria kechi ashir?

Iba Inki ashiba tebilemtsü khuret indang Yanglushidi Sensaksem Sabang (YSS) nung sensaksemdang, züngsempur tamanger tajung ka aser Tsüngrem tenzüker ka ama pei tangatetba lemsatepbatem ka küma bendena zülur.

Tangar sobaliba inyakyim melenshiba nungi tangazüktsü

Inkishi sobaliba ya asen Aor dang masü saka alima ajonga nung yamala mesükba tenoktangba aika lir. Item rongnung tongtibang kar bendena Wb. Imli P. Lemtur, Pastor Jorhat  Ao Baptist Arogo, pai yamai zülu:

Sati: Hindu Nunger Sobaliba

Sati tetezü kinungbo tasümang den külemi kinungtsü arongba/aremba dang ajar. Ibai Hindu nunger sobaliba ka liasü. Par sobaliba nung amtsürji kecha jenjang mali liasü. Kodang kinungbo südir, kinungtsüjia kinungbo den külemi taküm arong/arem, Iba dangji Sati ta ajar. Saka nisungji sobaliba asoshi yanglu masü saka sobalibaji nisung asoshi yanglu ta angatetta, William Carey, Raja Mohan Roy nungeri anir, iba sobaliba anema apuso aser Governor-General of India Lord William Bentinck ajanga December 4, 1829 küm Sati ya agien/anendaktsü (abolished). Tangbo Hindu nungeri iba sobaliba mamshir.

Amitsür Kibalembu: Hindu Nunger Sobaliba

Hindu nunger sobaliba nung, amitsürji tanaben kibong akümtsü memela liasü, saka teburbo kwiben kibong kümnüdir aküm. Anungji, nisungji sobaliba asoshi yanglu masü saka sobalibaji nisung asoshi yanglu ta angatetta July 26, 1856 nung Lord William Bentinck ajanga amitsüra tanaben kibong akümtsü asoshi ozüng ka yanglu, koba dang Hindu Widow’s Remarriage Act 1956 ta ajar. Joko tanübo Hindu nunger sobaliba nung tetsüra, tanaben kibong kümtetter. Koda jangratemtsü.

Slavery: Alar Ayuba Sobaliba

Linük teimba ka nung alar ayubaji sobaliba ka ama benshia aru. Saka alima tangateba leni aoba ajanga, nisungji sobaliba asoshi yanglu masü saka sobalibaji nisung asoshi yanglu ta angatetta, America nung Tir Abraham Lincoln mapang 1865 küm alar ayubaji agien/anendaktsü (abolished). Ao lima nunga alar ayuba yimya missionarytemi anir anendaktsü.

Triple Talag: Islam Sobaliba nung Balaba Ozüng

Talag tetezü balaba. Triple Talag tetezü, Islam nunger sobaliba nung kinungbui kodang pa bang nungi talag ta asemben atonga shidir (Talag Talag Talag), joko ibaji balarba lir. Idangyongjisa balatsü (instant divorce). Shingaia ibaji meyipa agitsü makok. Kinungtsüji joko ki doktsür aotsüba dang. Muslim nunger tebur dak iba sobaliba tashi aliba ajanga Muslimtsür aika tekübok jenjangi ai. 2016 küm Muslim tsür ka Shayara Bano, lai iba ozüng anema court nung case agütsü aser nüburtemi, nisungji sobaliba asoshi yanglu masü saka sobalibaji nisung asoshi yanglu ta angatetta, 2019 küm, The Muslim Women (Protection of Rights on marriage) Act 2019, ajanga iba Islam nunger sobalibaji India nung agien/anendaktsü (abolished). Yabo tawa atalokba lir.

Polygamy: Kinungtsü ka dak Tali Yutetba Sobaliba

Sobaliba aser yimden yimsüsübaji tebur meyong ta mapang talangka angatetta aruba yong, teburi kinungtsü asütsü asoshi tetsür ka dak tali yutetbajia kin aika nung sobaliba tajung ama aru. Saka, nisungji sobaliba asoshi yanglu masü saka sobalibaji nisung asoshi yanglu ta angatetta, 1956 küm India lima (Muslim nunger maden, saka tetsür pezü dak tali magitettsü) nung polygamyji agien/anendaktsü (abolished). India  nung teburtem kanga jashiteper alitsü südi.

Sabbath Ozüng: Yihuda Nunger Sobaliba

Yihuda nunger sobaliba ozüng nung, anogo troknü tashi mapa inyaktsü aser tenetnüji Sabbath anogo, temeshi anogo, Amungnü, Kibuba-a anisüngzükba anogo. Anungji Yihuda nunger ajak mapa meinyaktsüla ta kanga sashia benshia aru. Shibai Sabbath raksadir tepsettsüla aji par sobaliba. Yisui Amungnü shirangertem anebtsüba ajanga Farisitemi Pa dak tai aputsü merang. Saka Yisui yamai langzü, “Meimchir asoshi Amungnü yanglu saka Amungnü asoshi meimchir meyanglu” Mark 2:27. Tetezü, Amungnüji nisung meimchir dang nungi tuluba/tongtibangba masü ta ashirba.

Akhi mapang nungi yimsüyimbong/sobaliba balala kanga metsünga reta amshia aruba aika liasü. Saka koba sobaliba meimchir libaliro aser tensa den mapeter, itemjibo khenyongi dang toktsüba/melenshiadokba angur. Nisungji sobaliba asoshi yanglu masü saka sobalibaji nisung asoshi yanglu ta aiben tetshia zülua alibaji asenoki mamadokli aser temelenshitsü tim melenshidi. Sobaliba tajung aika lir itemji maneni benshitsüla aser wazüka ayutsüla.

Alima otsütemji reprangdangra, kin balalai, par tendak aser pei tendak apet sobaliba balala kanga metsünga reta benshia aruya liasü. Saka sobaliba koba ajanga nisung ka taküm timtemdaktsür aser kin ka tekübokba tiai anir alur, item sobalibatemji agienba/anendaktsüba mesüra melenshidaktsüba asenoki angur.

Inkishi: Aor Sobaliba

Kodang kinunger o kinunger, lokti o lokti mesüra yim o yim tsüngda maremzüktettsüsa mangatetep adokdir item mapang asen Aor sobaliba nung temerenshi agütsübaji:

  • Ki Adangba
  • Senso nungi jentokba
  • Keyin mechitepba
  • Inkishi

Item temerenshitemji pei pei sasep nung mesüktepa dang lir. Temerenshi ka ama iba mapa inyakba ajanga telok tilaba mesüra tashi tilaba ka mesüra anapronglaji kanga timtemdaktsür aser takoksa jenti adokdaktsür.

Inkishi Inyakyim

Iba inyakyim nung akang akanga amshiba tebilemtsütem:

  1. Inki Ashiba yimer den Yimten ken-o kecha nunga amalitep makatsü.
  2. Inki Ashiba yimer litsü ajanga senzütsü makok.
  3. Inki Ashiba yimer den kecha shishilempba masütsü.
  4. Inki Ashiba yimer den timtem mapang meyariteptsü.
  5. Inki Ashiba yimer den kibalembu masütsü.

Yamala tenoktangba aika lir…

Aor yimten yimsüsüba inyakyim tarensen nung yim ana tsüngda “Inki ashiba” ya tematiba temerenshi lir. Inki ashiba ya tai metoktetba tamaitsü. Ya pei-i angatetbaji dang shitak ta bilema pei tashi agi tangar tashi ka amokbanga azüoktsü merangba mapa ka ta ashitsü akok. Saka yangi teshipangtsür aser teshipangsang anaprongla takoksaji kasa amai dang lir. Idaki tajangzükji shingai magiteter aser tebilemtsüjia tasakba tasakba dang akümer. Yimtisangerjia nokjusanger medeni sadok-sadoka melitettsü aser nokjusangerjia yimtisanger medeni sadoka melitettsü. Asen tsürabur mapang nungbo iba yagi mapa aika koktet amai züngshia liasü saka tanübo ibai mepeti kümogo. Yamala mapa yagi tejakleni aotsü melen tesüleniang atsür alur. “Inki ashiba” mapa yabo teti atema mamshitsü tangatetba kati aru nung ajungtsü.

Laishiba Nung Taitok Indang Tesayuba

Tsüngremi meimchir yanglur Eden nung alidang mezüngbuba ozüngji “tajung o tamajung metetba süngdong nungi nai machitsüla, kechiaser koba anogo nung nai aji chidir na asütsü.” Lipok 2:17. Tsüngremi kodanga tiyazü mejembir ta asnoki metet. Adam aser Eve-i aibelenba atema tasübaji agütsür lila saka Tsüngremji temeim agi sünga aliba TSüngrem asü nung iba tasüba melena Eden-tsüki nungi aridok. Tena aibelenba tai temenen abentsü aser tasüba nungi teti taküm agütsütsü asoshi Tsüngrem ajaso chir agütsü. (Yohan 3:16). Aibelenba asoshi tai atoktsübaji Lai tesayuba lir, kechiyong Laishibai ashir, “Temeimbatem, nenok sasa mang teyang, saka Tsüngrem ain adokba ata-a liang … kechiyong Kibubai yamai ashir, “Mangyangba kü meyong lir, ni shia agütsütsü.” (Rom 12:19). Tali rajemtsü asoshi tai adokba indang Lai tesayuba kar lemsateper:

  • Yosefi tedi nunger nem tatok agütsüba, Lipok 50: 15-21
  • Saul chubai Dawid tepsettsü bushi saka Dawidi Saul tepsettsüsa maongka nguaka pai Saul metepset. 1 Samuel 23-24.
  • Ne tajichi tenibong nung mara ne tabelena tendakang Mat. 5:39
  • Ne tsükchir dang meimang, Mat. 5:44
  • Neterben tenet (70X7 times) taitok (tanen makai tai adokba indang sayur),  Mat 18: 21-22
  • Sentsütsür dang tai adokba, Mat. 18: 21-35
  • Tenük melen tenük, tepu melen tepu ozüng nungi teti tatem makai tai adoktsü indang Yisui sayu, Luke 24: 19-21
  • Yihuda nunger o Samaria nunger keyin mechitepi liasü saka Yisu-i (Yihuda nunger) Samariatsürla den sensaksemba ajanga tekümtet angu. Yohan 4: 1-25
  • Nenok medemder o medemer na meimtepang, Yohan 15:12
  • Nüktapangtatsür lung agi onseta endoktsü aliba Yisui kümzük.  Yohan 7: 53-8:11

Item Lai otem jagi kati ka dang tai adoktsüba indang sayur. Kibuba Yisui sayuba sarasadem nung “ozüi kechi koda pi dang tai toka lir aji oda ozü dang tai tokangma” Mat. 6:12 ta sayua lir. Asenok yimya tamanger (nominal Christian) aikati nisung denbo yimjung mali yur Tsüngrem matsüngdangbo temeten aginüba jakla Yisui ngua iba sarasadem pai sayu. Anungji iba sarasadem nung, meimchiri kati ka dang tamasa tai toka yur ang Tsüngrem dang tatok meshitsüla ta sayur.

Yisu Alimai Aruba Nükjidong

Yisu Khrista alimai aruba ya meimchir o Tsüngrem tsüngda, meimchir o meimchir tsüngda inki shia aliba lapoktsü aru. Yisu Khrista dak amangertem tsüngda nungbo Yihuda nunger-Greek nunger, yimsopur-bendanger, kibur-alar, takar-makar… yamala kecha tebendang mali.  Tatsüba agi tesendaktep raksar majuruteptet aliba (due to one party’s mistake) putepdaktsütsü asoshi aru.  Ao limai Yisu Osangtajung marudang inki ashiba ya yim o yim na tsüngda mangatettep, kar aibelen nung atsüanem makatetba, tashi mangatepba agi inyaka aru. Yisu arubaji item tashi mait sümedemtsütsü aru.  Anungji,  tamangertem atemabo inki ashiba ya mapet. Ya Lai tesayuba masü.  Inki ashiba ya tatok magütsütetba mapa agi sayuba lir. Asen Aori yamai inyakra Yisui inyakba putepdaktsüba (reconciliation) mapaji Aor asoshi tetezü maket kümdaktsür. Inki ashiba agi yim ka kechi tajangzük angur,  tanga yimbajia kechi akoksar? Iba mapa yagi Yisui ne kiyonger dang pei ama meimang ta ashiba toa matalokdaktsür.  Tamangertembo sobaliba yimsü-ozüngi kechi sayur aji masü saka Laishibai kechi ashir aji-ang amettsüla.  Laishiba ya sobaliba dang temaba ta angatettsü tongtibang lir.

Tatem Nung

Joko asenok Khristan yimsü Osangtajung agizüka amanger küm 150 ajungba Jubilee amungtsü yongyaseta renemdagi. Anungji teintet tamanger ka ama ajak nung atsü-anem akatsüla. Taitok agütsütepba mapa agi sayutsüla, kechiaser “mapa melira tamangji tasü” ta Tsüngrem Oi sayur, (Yakob 2: 14-17). Temeim mapa inyaktsüla, temeim mapa nung tangar aitsüba mali. Asenok ajaki alima dang Khristan ayak tejangja sayutettsüla.  Akhi sobaliba nung inkishi amala, kobai Khristan ayak samatsür ibaji melenshir Laishibai melaba sobalibaren  inyakyim nung yimsü süra ibaji meraket yimsüsüba aser Tsüngremer yimchiyimjung asenok den teti alitsü.

*****