Ungma Primary Health Centre (PHC) nung 11th June, 2022 nü metsümeshidak ka aser laboratory jenjang ajungketba den tashitak tapu balala tendangba Semi Auto Analyzer kol ka lapokba sentong ka parnok PHC nung agi. Ungma Baptist Arogo Pastor, Rev. Dr. Noklen Longkumer-i item temoatsütem meshitettsü.
Semi Auto Analyzer kol aser Laboratory jenjang ajungketba (up-gradation)-ji Soyim Gazetted Officers’ Association (SGOA)-i tenlaa yanglutsü aser metsümeshidak (toilet) tajung ka Ungma nunger anükabang Agriculture Minister, G. Kaito Aye-i tenla. Iba den jangratemtsü osang tajung kaji Nagaland Legislative Assembly Speaker, Sharingain Longkumer-ia pa itasen ita ana (2 months) Ungma PHC nung nüngdakba inyaktsü tenla agütsüogo.
Semi Auto Analyzer kol yagi item tashitak; complete blood count, glucose estimation, urine routine examination, liver function test, kidney function test, lipid profile, ABO grouping, malaria, wide test, covid test, HIV, VDRL itemji tendangteter. Anungji, nüngdakbapurtemi item maongkaji agitsü akok.
Tanü iba sentong nung tetenlartem; NLA Speaker, Sharingain aser Agriculture Minister, G Kaito na adentsüba liasü, saka ajungben yimden maparen kar ajanga tena marutet. Aji süaka, tena meyonga Speaker indang PRO, Longjakrep aser Ministerba tanük Nokzenkaba nati shilem agitsü. Soyim Gazetted Officers’ Association (SGOA) nungi tongti zülur, T. Mayang-ia mapang tatsüka agia jembi.
Sentong nung Ungma Village Council Chairman, R. Nungshi Jamir Tatar; Ungma Health Centre & Management Committee Chairman, Lim Tatar; Ungma PHC MO, Dr. Sholongba T Jamir; Watsü Mungdang Ungma Unit tir, Imyangerla Jamir; UBA Assoc. Pastor (W), Talijungla; UBA Youth Director, Toshi Longkumer parnokia shilem balala agia liasü.
(Source: Tir Yimyim)
The Nokinketer 