Hill Theatre aser Art and Culture Department Govt. of Nagaland den yaritepa Sangeet Natak Akademi-i ayongzüka Oshi Yim (the language village) ta sür jilushi tajung ka yangi Mokokchung town hall nung sayua liasü.
Iba jilushiji oshi ka sama nungbo koma süla aser koba tia ka nung alitsü ta asüba yimdangjema pei maitsü aser oshioben wazüka ayutsü nükla nung yangluba ka liasü. Iba jilushi ya Bendang Walling-i direct asü aser asst. director, Kilangtemsü Imsong aser Thoudam Victor Singh aser Jadumani Singh parnoki yaritepa yanglu. Iba jilushi nung oshi pungu; Ao, English, Nagamese, Gibberish aser Hindi amshia liasü.
Iba sentong nung tetushi tesemdanger Mokokchung D.C, Shashank Pratap Singh IAS-i mapang tatsüka jembidang, jilushi ya sütoksünemba (entertainment) ka masü saka ibai arokaroka bilema inyakba maparen ka lir, ta ashi. Jilushi ajanga lokti ka indang tia, jenjang aser sobaliba tuteta sayur, ibai nüburtem den jembiba maparen ka lir, ta shisem.
Naga nungerji art/craft talisa teka mapa kechisarena yangluba nung kanga tajung, saka jilushi luyim (performing art) nungbo ajema lir, tang ang Bollywood movie ka nung shilem agiba angur, anungji, iba luyim tsütsü ngujem kanga lir asünung, lanurtemi iba tsütsü temulung agütsütsüla aser ajungshitsüla, ta tayongzükba ka pai agütsü.
Nagaland nunga yimden, lokti aser rongsenkettsüng tsütsü melenshitsüba/tatalokba jenti lir, anungji, item dak sentakba nung jilushi yanglua temai adoka sayutsüla, ta paisa inyakdaktsünüba o ka ashi.
Hill Theatre aser Art and Culture Department Govt. of Nagaland den yaritepa Sangeet Natak Akademi-i ajanga May 16 nungi tenzüka anogo 30 nü Mokokchung Art & Culture office Ungma nung jilushi dak sentakba nung tesayuba (workshop) sentong ka agia liasü. Iba jilushi tesayubaji tembanga taonung parnoki “Oshi Yim” ta asüba jilushiji sayua liasü.
Source: Tir Yimyim
The Nokinketer 