~ Ayutemjen

Asiria Chuba Sennakerib-i ashi,

“Ne Tsüngremi Asiria chuba ket nung Yirusalem magütsütsü ta shia na tashiokdaktsü.”

Koba tetezü Tsüngremi Asiria Chuba Sennakerib ket nungi shinga mekümzüktettsü.

2 Chubatem 19: 10; Isaiah 37:10

RSS-BJP Leniri Ashi,

“Yisu-i masü saka BJP ajanga dang terenlok bener arutsütsü.”

Yisui ashi,

“Lenmang atangji aser Taküm ni lir.”

Yohan 14:6

Item tebilemtsü agi ali meimchir ratamata-a alidang Khristantemi kechi ashir? Item rongnung naia kechi ashir? Nai koba o amanger?

Yisui asenok dang asüngdanger,

“Nisungtemi Nisung chir shiba-a ta ashir?

… saka nenoki ni shiba-a ta ashir?” Mati 16: 13, 15

Temeim Adianu/Adianutsür, Nai koma langzür?

 Hezekiah Tendak Sennakerib Aser Tanü RSS

ihuda nung Chuba Ahaz jabaso Hezekia küm 29 (716-687) Yihuda nung chuba liasü. Pa chubatsü tenzükdang küm 25 tain liasü, (2 Chubatem 18:1-2). Pai yimsü asüba indang 2 Chuba 18-20; Isaiah   36-39; 2 Puti 29-32 nung shia lir.

Laishiba Nung Temesüktep Tapu Ana Nung Tongtipang Tatalokba:

Laishiba nung tapu (chapter) ana kanga mesüktepba alibaji 2 Chubatem 19 aser Isaiah 37 ya lir. Yangi tatalokba tongtibangji: Hezekia chuba yimsüsüba küm terpezübuba nung Asiria chuba Sennakeribi Tsüngrem aser Hezekia chuba anema inyakba aser jembiba tatalokba shia lir. Sennakerib temerangertemi atsü atsüa aliba Yihuda yimtitem anema atu aser item yimtitemji agi aser maneni Hezekiah amokmerenba indang 2 Chuba tapu 18 nung shia lir. Item amokmeren otemji tatsü agi yamai shia aliba angur.

Na ya kechi nung temulung lemer tamang akar, 18: 19 Nenoki pei scü achitsü aser pei natzü ajemtsü, 18: 27

Hezekiah-i nenok tekülakokdaktsü, aser pai nenok Sennakerib ket nungi mekümzüktettsü. 18: 29

Yamala o aika ayimokja Hezekia aser par yimli nüburtem amokmerena liasü. Iba dak sentakba nung tatalokba indang iba temesüktep taputem nungji angur.

Iba ama tetamatsü sensamasa aser amokmeren o angashidang Hezekiah chubai pei süoshi shisa aser anem sü agi meyir Kibuba kidangi ao. Hezekia-i par tanishirtem ainkar Isaiah dangi yoka iba khuret lemsatep. Idangji Isaiah-i ashi, “Yamai Kibubai ashir, Nai angashiba otem koba agi Asiria chuba tenzükertemi Kibuba atalatsü, aji nai  tsübua teli. Atangji ni pa dak tanela ka enoktsütsü, aser pai olulu ka angashitsü aser pai pei limai meyipa aotsü, aser par lima nung nok agi ni pa laodaktsütsü.” 2 Chuba 19: 6, 7; Isaiah 37: 6, 7

Sennakeribi  Maneni    Tsüngrem    Atalaba    Aser    Tsüngremi Pa Merenshiba:

Sennakeribi maneni 2 Chubatem 19: 10; Isaiah 37:10 nung Hezekiah aser pai tenzükba Tsüngrem kanga mezüngmeshia sensamasaja jembiba angur, “Yamai nenoki Yihuda chuba Hezekia dang jembia shiang, Nai temulung alemba ne Tsüngremi Asiria chuba ket nung Yirusalem magütsütsü ta shia na tashiokdaktsü.”

Hezekia chubai kodang iba sensamasatsüba aser amokmerenba osang tanaben angashi, pai Kibuba kidangi atu aser iba osang tezülubaji Kibuba madang lemdaka ayu aser sarasadem. (2 Chuba 19: 14-19; Isaiah 37: 14-19). Tsüngremi iba sarasadem angashi aser Kibuba tenyar ao  aser Asiria nunger tanendak sepai 1,85,000 tepset. Anungji Asiria chuba Sennakerib kanga aoksar apusoa Nineve-i meyipa ao. Yangji pa tsüngrem Nisrok kidang pai külema alidang par jabasotemi nok agi pa tepset.

Sennakerib aser Hezekiah nungi Tangazüktsü:

Sennakeribi pa tashi uluba aser pa akaba dak tamang tulu yur mezümeküma Tsüngrem aser pai shimtetba Chuba mezüngmeshi. Idangji Hezekiah-i bendanga agüja teyari aser tekümzük meshia sarasademba Tsüngremi langzüba agi tsükchir Sennakerib-i aniba sepai teloki Yirusalem amokbanger asüküma aliba laodaktsü.

Sennakeribi taküm Tsüngrem mezüngmeshia jembiba ama tanü asen tendak RSS lenisüba nung BJP lenir kari jembiba angashia aruogo. Sennakeribi ashi, “Nai temulung alemba ne Tsüngremi Asiria chuba ket nung Yirusalem magütsütsü” tetezü Tsüngrem dang nungi Sennakerib tuluba ta ashi. Iba mesükba BJP leniri ashibaji, “Yisu-i masü saka BJP ajanga dang terenlok bener arutsütsü.” Yabo tamanger ka o-bo masü. Ya taküm Tsüngrem atalaba o lir. Iba dak alaka BJP lenir kari pai abena aliba sü dak aketba lotus naro sayua ken ka yamai aten:

Pa lenten labu-naro, Anepdang petinu;

Meyirjang ter rongnung Pasa tajungba

Kodang iba ama yimya nung “Pa Lenten Labu Naro” ken tena election compaign mapang BJP nem vote agütsütsü tayongzükba agütsüba angu aser angashi, ni kanga dang temulung shiranga liasü. Osangtajung ken süiren nung ashiba agi, 1881 küm iba ken William Charles Fry-i zülu.

Tembar tajung meyi aika liaka, teyarir tajung meyi aika liaka, khuret agi neneter  alidang tesüneptsür meyi aika liaka item ajak dang Yisu tajungba ta atenba ken lir. Khristantem asoshi Laishiba nung Labu-naro tetezü keta amshir, Hindu yimsü nung lotus-naro tetezü aketba naro ka lir. “Pa Lenten Labu-naro” ken,   alima   nung   aliba Khristantem asoshi tekülem ken tajung rongnung ka aser temoatsü süa küm 140 tema tena aruba joko Hindu nunger tekülem ken kümdaktsür no? Labu- naro (Lily) aser Lotus naro asenoki bendangtetdi. Chichiba tamangertemi ya kanga junga shisadangtsü nüngdak. Asen tamang kimong masetshitsüla.

Shirnoki Tsüngrem atalar aser Pa anema inyaker, temulung memeyipra Tsüngremi pa/la Sennakerib ama merenshitsü.

Rev. Dr. Meyu Changkiri, Pastor Shillong Ao Baptist Arogo, pai RSS-BJP ASER YIMTEN indang kanga rajema züluogo aser Rev. L. Lima Jamir, Pastor Dimapur Ao Baptist Arogo, pai osemlok züluba nung RSS aser BJP koda sentaktepa lir aser parnoki kechi inyaker itemji asenoki angur. Parnoki inyakba aser tatalokbatem ajanga parnoki asen tamangertem samatsütsü meranger ta ajang ajanga sayur. Sürabangla aseni kechi atema vote agütsür. RSS-bo par mission kanga dang takok ngua odar, asen Naga lima nunga tamanger jenti anir odar. Election mapang nisung aser rongsen dak dangbo meranglokli.

Tawa tanü tatalokba:
Asen kidanger Assam nung Guwahati tsütsü Amri Karbi lima Merangkong Godhula Mission nung Tsüngremi mapa tulu inyaka kanga takok ngua aruogo. Joko Arogo aika amenteter par mungdang tenzüka kanga tashi ita odagi. Iba terenlok ngua Assam nung RSS-BJP lenir kari, parnok Hindu liasüba kodaser Khristan aküm ta bushiba angur (Ref. http://fb.watch/dpzG7R9Dba/). Asen Naga lima nunga Naga nungeri anir Durga Puja amung tenzükogo. Yoga Day amungtsü tenzükogo. Naga Khristantemi kodanga Durga Puja, Yoga Day ama munga maru. 2014 nungibo Post Matric Scholarship Theology azüngertem nem agütsüba anenogo. Naga nungeri item süoki ia mebilemer. Theology azüngertem tazünger rongnung joko mezüngoki kümogo. Iba yagi Theology azüngtsü menüngdak ta sayur. Yabo Khristantem temejai akümba Nagaland Government-i danga agütsütettsü koka lir saka Naga lenirtemi züngoka maliba angur. Yamaisa maneni ora küm ishika tsüngda yim shia nung Mandir amenloktsüsa akümtsü. Jungjunga sarasadema bilemdangdi.
Sennakeribi ama tanü asen Khristantem atalaja amokmerenba mapang asen lima nunga Hezekia Chubaji shiba asütsü. Hezekia ama chichia Tsüngrem dak amangra aser sarasademra Tsüngrem asen  tsütsü alitsü. Aseni tongpangji akoktsü. BJP anema jembiba aser züluba ya mangatertemi tai ta ashitsü akok, tanga party ka pukhümer ta ashitsü akok, saka BJP majung ta ashiba kuliji tanga kecha masü ya asenok Khristan anemba telok kobai Khristantem rishikangshir aser samatsütsü meranger. Aji agi taküm Tsüngrem anema inyakba jagi yabo majung  ta ali süoki ia angajemtsü asoshi zülur. Talisa asen Aori anir Naga nungeri Center nung ruling den adentsüba dangbo memerangtsüla. Asenoka pei tangatetba takang akaba yimden ka, iba lokti (Party) tejangja alitsüla. Seplasepshiba party menüngdak.

India lima ya yimsü balala amangertem külemi aliba lima ka lir. Yimten yimsüsübaren Hindu, Muslim, Sikh, Khristan ta  melemdangtsüla. Lenisüba nung shiba tetemsü pai/lai yimsü asüba agi linük nübortemji tiptema yimsü sütettsü. Temzüng nung Indiaji  “Secular State” ta Indian constitution preamble nung zülua lir, koba tetezü tamangba yimsü shinga mesentoktsü, nisung shia  pei amangnüba amangtsü temeden agüja lir. Tanübo RSS-BJP-i ibai melenshia tanga yimsü kecha makai tekaratiba nung “Hindu lima” (Hindu Nation) “Hindu Rashtra” kümdakja nübur ajak Hindu kümdaktsür, iba yimsüyimbong nung yimsü asütsü meranger.

Sürabangla asenok tamangertem asoshi item tetsübutsütem tejanga metetsümonga aseni parnok nem vote agütsüra na shiba asütsü?

MANENI LEPSHIDI!

Yisui asenok dang asüngdanger,

“… saka nenoki ni shiba-a ta ashir?”

Mati 16: 15

Temeim Adianu/Adianutsür,

Ne Telangzüba Kechi?