~Temsü Jamir

Sangküm election matongdang, Naga yimten tebilemtsü ken-o telemtetba kati arutsü asoshi jembir, saka shirnokisa Naga yimten latetta ayubaji aginer? Naga nüchiso asoshi nüchiso bushir telok paikati adokba ya jangratemtsü asü tebilemtsü? Nagaland sorkar tatar yimsüsürtem aser nüchiso bushir teloktem, parnok asoshibo Naga yimten solution malibaji solution tajungtiba ta jembiba o ya olulu asü ochi o?

September 6 anogo ya India Sorkar aser Naga nüchiso bushir tsüngda CEASE FIRE yimjung tenangzüktepba agir, joko 58 buba Indo-Naga Cease Fire Day taküm amungtsü. Saka asen Naga nunger otsüji asenoki süoki yia bilemer asü mebilemer? Metet asü memetet? Telok paikati akümba ya ka akümtsü asoshi aser telemtetba kati arutsü asoshi koba tashi süoki yia inyaker aser sarasademer?

Asen linük otsü tatalokbatem kar reprangdangdi:

  1. 1881 nung Naga Hills ya British India küpok aküm.
  2. 1918 nung Naga Club tenzük aser iba ya mezüngbuba British sorkar anema apusoba temaitsü liasü.
  3. 1929 nung Simon Commission India-i arudang Naga Club-i memo ka Simon Commission dangi zülu aser Naga nunger temeten aser pei sasa yimsü asüba yimya nungji toktsütsü ashi.
  4. February 2, 1946 nung Naga National Council (NNC) tenzük. (A. Z. Phizo-i anir tenzük)
  5. June 29, 1947, anogo nung Assam Governor Sir Akbar Hydari-i 9- point agreement ka signed asü. (Yimchung atema tenzükba)
  6. August 14, 1947 anogo nung Angami Zapu Phizo lenisüba küpok Naga limaji Independent State ka ta sangdong.
  7. 1951 NNC-i küm Sovereign Naga State akümtsü telemtetba agi aser referendum ka agiba 99% Naga nungeri mulunga agizük.
  8. March 22, 1952 nung Phizo-i underground Naga Federal Government aser Naga Federal Army tenzük. Naga lima azü tokshitsü tenzük.
  9. 1956 küm Naga Hills-ji Disturb Area ta sangdong, aser India sepaitem yok
  10. 1958 küm Armed Forces (Special Powers) Act sangdong.
  11. 1963 küm Assam kübok Naga Hills District-ji statehood agütsü,  aser Tuesang area ya NEFA nung aliba Nagaland nung tendaktsü.
  12. Küm 10 tema azütokshia arur külen, 1964 Nagaland nung mezüng buba General Election agiba küm Arogoi yimjung atema ola adok. Rev Longri Ao (Man of Peace) aser Kenneth Kerhuo lenisüba kübok January 31 nungi February 2 tashi Wokha nung 3 buba NBCC Convention agiba mapang Naga nunger 5,000 tema atenshia Peace Talk resolution ka India sorkar aser A. Z. Phizo tsüngda yimjung yanglutsü renem. Aser India sorkar dang India nunger  lenir   Jaya   Prakash   Narayan,   Assam   Chief  Minister Bimala Prasad Chaliha, aser Anglican Arogo nungi yimjung atema aruba Rev Michael Scott, teyari meshia Naga lima nung teküraba nung yimjung arutsü atema jembitsü takhangba agütsü.
  13. September 6, 1964 anogo nung Naga nunger nüchiso bushir aser India sorkar tsüngda yimjung tenangzüktepba agi.
  14. 1967 küm Peace Mission anentsüsa aküm. Trokben Naga political tebilemtsü atema jembi saka tangatettep kati maru, maneni azütokshitsü tenzük.
  15. November 11, 1975 nung Shillong Accord meyong nema ayu.
  16. 31st January, 1980 anogo nung NSCN tenzük. Peace treaty yangluba nung memulungba lenirtem Isak Chishi Swu, Thuingaleng Muivah aser S. S. Khaplang parnoki anir telok balaka tenzük.
  17. April 30, 1988 anogo nung NSCN (IM) aser NSCN (K) ta lemdang. Iba lemdangba ajanga Naga nunger tsüngda azü tokshiba tali aküm.
  18. 2001 küm NSCN (K) India sorkar den ceasefire sign asüba March 2015 nung raksa aser maneni azü tokshitsü tenzük.
  19. Cease fire raksaba ken-o mangatettep ajanga S. S. Kaplang-i jentokba Y. Wangtin Konyak lenisüba nung April 6, 2015 anogo nung NSCN (Reformation) tenzük.
  20. 2007 küm NSCN (IM) ceasefire signed asüba, 2015 küm Naga Peace Accord sign süogo. Ibai Naga political tebilemtsü telemtetba ka agitsü asoshi nükmen ka asütsü ta teimla nung inyak, saka tanü tashi telemtetba kati marui lir.
  21. 2018 küm NSCN (K) telok ana küma pakdang. Telok ka Khango Konyak aser telok kaji Yung Aung-i anir telemdang adok.
  22. Taküm (2022) Nagaland sorkarji opposition maliba sorkar ka kümtetogo. Longjemba oji tanganütsü ka saka koba nükjidong nung longjem, aser tashishir mali leniba sorkar jagi nüburtem mashioktsüli ma ta tebilemdangtsü tulu lir. Naga Political ken-otem asoshi Parliamentary Committee tenzük. Iba Parliamentary Committee nung Nagaland Legislative Assembly member 60 den MP 2 ajak lir. Iba Core Committee yagi, tanü Naga lima ochimashi teraksa nung aniba ama, Naga yimten tebilemtsüji Naga nunger tebilemba metongtetdi teraksa tali adokdaktsütsü tebilemdangtsü lir.
  23. Naga nunger temeten wako (flag) aser temzüng ozüng (constitution) balaka alitsü meshir. Naga nüchiso telok tamentakdak tesayuba nungji ajemtaker yangluba temzüng ozüngji Naga nunger asoshi tapet asütsü asü masütsü? Lokti mandate kong ali?
  24. Evangelical Christianity aser revolutionary socialism meyoktepba tesayuba ya asen nüburtem asoshi tapet aser tagizüktettsü asü?

Tanü Naga nunger nüchiso telok toku (9) aser Nagaland sorkar tatar yimsüsürtem, aser Naga nungertemi kechi aginer? Tanü Naga nunger teimbai Naga yimten indang ken-otem memetet. Naga nungertemi kechi aginer, ibajia mejangjai kümogo. Atangji asenok Naga nungeri kechi aginer?

Naga nunger aliba tesemtem ajak – Assam, Arunachal Pradesh, Manipur aser Myanmar nungi “Greater Nagalim” akümtsü akanger. Saka Assam, Arunachal Pradesh aser  Manipur-i asen Naga nunger dang kechi ashir?

Nagaland Legislative Assembly-i Greater Nagalim demand atema endorsed sütsübaji December   1964,   August   1970,   September 1994, December 2003 aser tatemsa July 27, 2015    nung    sütsüogo.    Kong   tempangtsü? Asenokia    kechi    aginer?    Iba    ya   political tebilemtsü asenoki ajangshia aruogo aser ano ajangshia aotsü.

Naga political otsüji tai makaba azü aika tokshia zülua lir. Indian army ket nung azü aika tokshiogo. Tashiyim agi tetsür aika raksatsüogo. Yim ajunga rongtoktsür kanga kangshiogo. Yim yim Grouping süogo  aser asen tsürapurtemi tebang agi meshitetba timtem ajuruogo. Tangar bendangertemi asen lima tashiyim agi inyakbaji, asenok akoktsü mechi, ola  matoki  lidaktsütsü  asoshi,  par  kübok  asenok  ayutsü  asoshi inyak. Saka kechiba asenok o asenoka na rarateper? Asen nüchiso atema rara dang, asenok o asenok na anemtepba, raratepba, telemsa adoker, kati ka yimtong nung azü ak an arishia kaseter ama azü jenti tokshiogo.

Ya shisadangdi! Rev Longri-i 3 buba NBCC Convention Wokha nung amungdang jembidang yamai ashi, “Our paths are now stained with the blood of the innocent people. We do not know the way of peace. There is no fear of God in our heart…there seems no one who understands God and his righteous ways…The Nagas have been most unfaithful to a faithful God. They will, therefore, not go unpunished….” Rev Longri-i iba o jembir külena, asen lima nung azü tokshiba manen, maneni azu jenti tokshiogo. Tsüngrem-i asen Naga nunger den jembiba ‘hau’ ta mali lia aruogo.

Israel chirtemi Tsüngrem anema inyakba agi Tenangzükba Limai aitsü küm atsüng-langa akümba ama, asen Naga nungertemia Tsüngrem anema temenen mapa aika inyakogo. Pei adianu azü asen teka nung lir. Asen limaji Ochimashi nung nüngtoko lima kümogo. Iba yongji asen Naga nunger alizüng atongtsü atsülanger alitsü südi ta bilemer. Joko alizüng atongtsü tebilemtsü mali kümogo. Mangdanga mali kümogo. Pei ajung asa-a dang alitsü merangteper.

Tamangba tsütsü koda? Tamangba tsütsü asenok takhang tamentakdak ka mali aser mejangjai liteper. Iba yongji Naga nungertemi Yisu Khrista masü yimsü dang agizük ta jembir. Ibaji adangji masü na? Baptist tamang tamentakdak ya Laishiba tesayuba nung ajemdaker latetta ayu. Iba ya junga memetetba agi asenok ya makmakshimakba Khristantem (confused Christians) ama liteper. Sola Scriptura Laishiba dak alaka tanga bangdak kecha mali ta züng zünga soter, saka Naga nungertemi Laishiba tesayuba nem masü saka arogo yimsü nem arogo anidaktsür. Lokti mandate ajanga ochi nungi pilar pei temeten yanglur aor. Kin kidong sensosanger lokti bangjemer sorkar bangtak ozüng aser Laishiba tesayuba alemdanga or par senso temeten yanglur.

Tanü tamangba yimsüji commercialize süa aoba mapang ka lir. Naga lima independent ministry aika tenzüka lir, aser item ministry ajanga arogoi mawajemtetba nübur aika tongtetta inyaker. Kanga junger. Saka pei  tepok atema, survival atema ministry tenzükbaji tebilemdangtsü lir. Israel chirtem Ijip lima nungi odang anir atok masü, saka Tenangzükba Lima atongtsü asoshi anogo 40 nü agi küm 40 kümdaktsü. Ijip lima nungi atoker teintet rokotem nisung ana dak alaka ajak azüngmeyakdak sama. Tanü asen Naga nunger nüchiso bushitsü tenzükertem kati-a asangsang nung political nüchiso mungui ka khen, ka khen ta nüburtembo alar tia nung yutsür loktokma-a odar.

Yosef lanuwa mapang, Tsüngrem-i pungmang mangdang agütsü. Temenen mojingi iba mangdangji samatsütsü aser raksatsütsü merang. Tedi nungertemi tenük merem. Ongken tarok nung inoktsü. Alar asütsü Ismail nung shishilembartem dang ayok. Tiyazü kuli agi tsüngden chiokdak puoka ayu. Tsüngrem-i Yosef nem pungmang mangdangji  odang agütsü masü, saka asangsang nung atalokdaktsü.

Naga nunger nem nüchiso pungmang mangdang odang angütsü masü. Saka kechiba mataloker? Kechiba Naga nunger rongnung mangdangji sama-adok? Asenok temenen nung sadok sadoka aliba agi masü na? Cain-i pei tenu Abel tepseta yur sadok sadoka aliba ama, asenoki azü jenti tokshir temenen nungdang sadok sadoka alibaji tebilemdangtsü tulu lir. Abel azü-i mangyangtsü ola adokba ama, Naga nunger temenen ajanga asenok temenen taitsüba nung lir. Nagaland for Christ ta kechiba nemadanga amshir aka?

Asenok atema osang tajung ka lir. Ibri 12:24 nung shia aliba ama, Abel azü dang nungi Yisu senti zü tuluba. Abel azüji tai makaba azü. Yisu azüjia tai makaba zü. Saka Abel zü jagi taitsüba aser mangyangtsü ola adok. Yisu azü jagi taochi, tatok agütsüba ola adok. Temenen taitsüba dang nungibo Tsüngrem taochi tuluba. Anungji asen Naga nungertemi menen bushitsüla aser tatok nangzüktsüla, aser temenen nungi pilatsüla. Tsüngrem jak bushitsü kangasa nüngdak.

Pei linük asoshi Nehemia-i sarasademba ama sarasademdi aser ola atokdi. Asen temeten ola atokdi.