(Ao oshioben aser kaketkeno nung tongti shilem agir kar ASLB-i tushi)

ASBL-i ayongba 6 buba Ao Arangtet Tatidang takoker nem kulikaket agütsüba sentong takok ngua agir külen, tenyim balala nung takokertem den Ao Senden Tir, Wb. Chubawati Longchar aser ASLB ketdangsürtem noksa nung angur. Mokokchung, 8th July, 2022    

Ao Senden Literature Board (ASLB)-i ayongzüka 6 buba Arangtet Tatidang (AT) nung takok angur nem kulikaket agütsüba (convocation) sentong 8th July, 2022 nü yangi Ao Senden conference hall nung takok ngua kaogo.

Taküm Arangtet Tatidang tenyim (course) balala nung parnok 83-i takok ngua liasü. Takoker rongnung Certificate angur parnok 19, Diploma angur 35 aser Post Graduate Diploma angur parnok 29 liasü.

Iba sentong nung tongti o jembir Ao oshioben aser kaketkeno sangmongpi Padmashree T. Senka Ao-i jembidang, Ao oshi ya India nunger official oshi ka kümdaktsütsü asoshi India temzüng kübok eighth schedule-i idaktsütsü merangtsüla, kechiyong kodang iba jenjangi itetdir yangji tajangzük aika lir, ta metetdaktsü.

Oshi ka renloka tejakleni aotsü atema zülumen yayim (spelling pattern) ya kanga tongtibang lir aser zülumen lirumedemna nungji tapu aika sentaka lir. Ao oshioben aser kaketkeno rajang akümba ya taoba mapang asenok tsüngta zülumen tsütsü meputepba ajanga liasü, ta paisa tesüiba otsüren kar lemsatep.

Osep (dictionary) kecha tabensaba mali, ibai tensa den apet melenshia aser renloka aoba maparen ka lir. Anungji, tang Ao oshi nung adoka aliba ‘Arok Osep’ koba adoka lir, iba nungjia metokmeperi alibatemji taruba adok nung tajungba yanglushia aotsüla, ta paisa shisem.

Arangtet Tatidang ajanga kechi shisatsütemsa angazükogo, itemji timi amshitsüla aser Ao oshi renlokba wadang nung temulung agüja sayutsü asoshi paisa takokertem nem tayongzükba ka agütsü.

Ao Senden tir Wb. Chubawati Lcr-i jembidang, AT takokertem nem tenüngsang agütsüba den külemi Ao oshi tsütsü wadang aika lir, anungji, item khurettemji angateta inyaktsü asoshi ajungshia liasü. Tarutsü nung “Ao Riju (Academy)” tenzüka aotsü tebilemba lir, anungji, Ao kin telungjem nung item maparentemji inyakyonga aotsü tayongzükba agütsü.    

Iba sentong nung ano Aor kaketkeno aser oshioben tsütsü tongti shilem agir; Padmashree T. Senka Ao, Prof. A Wati Longchar, Wb. I. Temjentoshi Lkr, Rev. Dr. Mar Pongen, Wb. T. Nungsang Lkr, Wt. R Mapukala Pongen, Wb. Marlepden Jamir, Wb. Sentilong Ozüküm NCS, Guru Chubatongzük, Guru Pangyang Ozüküm aser Wb. Sama Jamir parnok nem ASLB-i tetushi nüngyu kaka renema senpettsü.

ASLB mendenbuba Dr. L Temjen Jamir, ASLB tezülur Wb. Temjen Tzüdir, ASLB züngsem; Wt. Toshisangla, Dr. Medemmayang, Wb. S Wati Ozüküm parnokia sentong nung shilem balala agi. Iba sentong nung Ao Senden Tongror Luden züngsemtem den ASLB züngsem den ASLB kübok aliba loknu balala nungi züngsemtem, Watsü Mungdang, Ao Kaketshir Mungdang, Mokokchung Town Lanur Telungjem aser Mokokchung town telungtet nung school-tem nungi Ao tesayurtem arua aden.

Iba anogo Padmashree T. Senka Ao-i züluba “Tensenyim” kaketnu ka sayaa liasü. Iba kaketji Ao zülumen lirumedema amshitsü atema school nung textbook ka ama amshir.

Mokokchung Town Baptist Arogo (MTBA) lanurtemi Ao ken tajung ka tena tesentepertem saksalemdaktsü. Ngati Baptist Arogo Pastor Wb. Sentiyanger den Tsüngrem temoatsü meshia sarasademer tenzük aser Marepkong Baptist Arogo Pastor Wb. Mar Aier den tenüngsang agüja sarasademer sentong tembang.  

(Source: Tir Yimyim)