Minister, Tongpang Ozüküm-i Alempang Ward Yimden office ki tasen ka lapoktsür külen yimden tenzükertem den ki meshitettsür Pastor Rev. Temsu S noksa nung angur.

Minister, PWD (Housing & Mechanical) Govt. of Nagaland, Tongpang Ozüküm-i 3rd Aug nü Alempang ward yimden office ki tasen ka lapoktsüogo. Iba ki ya Tongpang Ozüküm’er kibongi senotsü teperi agüja sütsüba lir. Alempang Baptist Arogo, Pastor Rev. Dr. Temsu S-i iba ki meshitettsü.

              Tongpang Ozüküm-i iba ki lapokba sentong nung jembidang, ki junga yangertetba asoshi Alempang yimden nem tenüngsang agütsü. Iba ki ya tatar salang aser ward yimden tenzükertemji tatartem mesüka lir, anungji, iba kidang nübur tejakleni yimjiyimjung nung anitsü lemtet tajung agia aotsü imlar, ta moaja ashi.

              ULB election dak sentakba olen kar shioktsüdang, Urban Local Bodies (ULB) koba tesem nungsa maginür item nungji agitsübasa ta mekangshir, saka koba nungsa aginür – item nungjibo asenoki sota mayutsüla, ta ashi. “Taginür atemabo lenmangji sadema lapoktsütsüla”, ta paisa shisem.

              ULB election agira yangi tajangzük/terenlok aika sentaka lir, ULB election magitetba ajanga rongsen tarulen maka, yongji Mokokchung town akonger (merenloker) aser MLA/Minister-temia ajakbo mayimjemteter, anungji, alima den tsüngkang medema ULB election-ji agibasa tajungba asütsü, ta paisa tebilemba ka lemsatep.              

Iba sentong nung Alempang ward yimden Secretary – Purzülu menden liasü, Alempang ward Chairman – Lemasashi-i melepzüng o lemsatep aser construction committee convener – Dr. Meyiwati-i ki asüba osang metetdaktsü. Alempang Ward yimden executive Redongnukeni tenüngsang agüja sarasademer sentong tembang.