Tesayur anogo den repsema 4th Immakmangyang award agütsüba sentong takok ngua agir tongti o jembir Dr. Sentila den award agizükla tesayur Sentisola, tesayurtem aser Chuchuyimlang VEC züngsem noksa nung angur. Chuchuyimlang, September 5, 2022 (www.nokinketer.com)

School Management Committee Chuchuyimlang ajanga tesayurtem anogo den repsema ‘4 buba Immakmangyang Award for excellence in teaching’ ta sür alakteta sayur nem konang tetushi agütsüba sentong ka GMS, Longzung nung ayongzüka liogo.

              Iba sentong nung Mokokchung DFO, Dr. Sentila IFS-i tongti o jembidang, tesayurtem anogo amungba ya parnoki aahzükba anogo ka lir, parnoki meranga aser nentaka inyakba yong tanü alimai tesayurtem nem tetushi agütsür, ta ashi.

              Kaketshirtemji tarutsü alima yanglurtem lir, anungji, tarutsü nung kaketshirtemi pei tesayurtem menungra bilemtettsüsa maneni nentaka sayutsü asoshi lai tesayurtem ajungshi.

              Dr. S. Radhakrishnan ya alima asoshi tatishitsü süa sempet jenti aketba nübu ka liasü, yamaji tsürabur Immakmangyang otsü angashidang paia alima asoshi shilem tajung agiba ngua pa taküm aser mapa ajanga tajungshiba angur, ta lai tsürabur tenüng sanga ashi.

              Tesayur mapa ya tamaren aser akhüm aketba mapa ka lir, ibai temoatsü aser maongka aliba mapa ka, aji oda, temoatsü denji tetia agia khuret anitaker, alima nung mapa (profession) rongnung tesayur mapa ya kheni balaka lir, ta lai shisema liasü.

              Laisa tesayurtem dak lidaktsünüba jakla tajung kar lemsatepdang, tesayur shia dak tejangraba mulungjang den bendanga agütsüba aser nükjidong akaba (goal oriented) tesayur kaka südaktsünür, ta laisa tesayurtem nem tayongzükba ka agütsü.    

              4 buba Immakmangyang Award-ji taküm Govt. Primary School, Mongta nungi tesayur Sentisolai agizük. Iba award ya Chuchuyimlang telungtet nung aliba sorkar school nungi nentaka sayur tesayur tajungtiba/tajungtila ka shima agütsür. Tesayurtemi tamaren mapa inyakba asoshi tushitsü nüngdakba ajiteta Chuchuyimlang VEC-i iba award ya agüja arur.

Tsürabur Immakmangyang ya Chuchuyimlang nunger Punasütsüng aser Rongsenkümla na jabaso. Pa Oct 1916 nung aso aser 1982 küm asü. Pa yimdak mission school, Impur aser Jorhat high school nung azüng. Pa ya tenendak tesayur ka liasü. Taoba mapang VEC Chuchuyimlang-i Immakmangyang (1916-1982) indang taküm otsü kaket tenüng agi “A Pioneer in Education Development” ta sür ka adoka lir.

Pa Jorhat high school nung zünga lia putu yimsüsürtemi pa dang pei yimtsüng nung tesayur inyaktsü asüngdang. School züngnüseta pai yimsüsür o meintoktsütetba den paia pei nübur tenzüktsü mulungteta yimdak aruagi tesayur mapa inyak. Pai talisa shisaliok (education) tsütsü shilem tulu agiba den lenla balala nung temelenshi jenti bener arutsüba angazüker.              

Iba sentong nung GPS Mongta, GPS Impang, GMS Longzüng nungi school tanurtemi tesayurtem tushia shilem balala agia liasü. Chuchu Town Baptist Arogo Assoc. Pastor (W), Narola Lemtur-i tesayurtem asoshi temoatsü meshia sarasademtsü.

*****