Sept 5 nü Aor Kile nung Watsü Mungdang tir S. Arenla Longkumer-i tanurtem atema Ao oshi melamela angzüktsüren video ka sayatsür külen sentong nung adenertem külemi tangokba noksa nung angur.          

Ao Senden Literature Board (ASLB)-i achayanga yangluba video ‘tanurtemi Ao oshi melamela angazükdaktsüren’ tanü Watsü Mungdang tir, S. Arenla Longkumer-i Sept 5 nü Aor Kilem nung meraketa sayatsüogo. Iba video ya YouTube nung “Ao Senden Literature Board” ta ajener reprangtettsü. 

              Tanü tensa den apet tanurtemi Ao oshi melamela angazüktettsüsa iba video adoktetba asoshi ASLB dang pelar, aji oda, iba video ajanga jenti pur lenmang aisü nung temoatsü angutsü aser video adokba nükjidong ataloktsü imlar, ta ashi.

              Tanü iba sentong nung ASLB mendenbuba Dr. L Temjen Jamir, ASLB tezülur I. Temjen Tzüdir aser Ao Senden Tongror Luden züngsem M. Zulu Ozukum parnokia mapang tatsütsü agia o jembi.  

              Iba video ya Ao Senden-i temelaba agütsür adokba lir. Tangji zülu kar tangar oshi nungi apuzüka amshiba angutsü, saka taruba adok nung Ao temeja agi aser tabensaba nung adoktsü maparen inyakdar, ta ASLB ketdangpurtemi metetdaktsü.

              Iba ya mezüngbuba adoker asünung metokperi karbo alitsü, anungji, iba dak sentakba nung tajungba adoktsü asoshi tebilemba kar danga lira ASLB den tongteprateptsü mepishir, ta ASLB ketdangpurtemisa metetdaktsü.