Lenir-i lenmang nung temulung agütsüdaktsünür

~ Meren Pastor (Waromung)

Nübur ajak asoshi nüngdak tulutibaji lenmang, tzü aser tesangwa (electric city) ya lir. Lenir ka tashi ait asü masü, tajung asü masü, lokti meimba lenir asü masü, ibaji item asem mapatemji inyakteter asü masü ta asüba dak keta lir. Itemji nüburtem asoshi kanga tongtibang ta metetdi. Nagaland nung temelenshi bener arutsütsü ‒ “Change is Coming” ta NDDP-BJP party ayima election agi aser CM-bai Govt. kümtetli yimjak nung küm ka tsüngda nung Kohima aser Dimapur nungi tenzüka Nagaland ajunga nung lenmang tajung yanglutsü ta nangzükba ajaki angashiogo, saka tanü tashi meyanglutsü. Nagaland lenmang India nung tamajungtiba jenjang nung lir, aser nübutem mesenzüteti kümogo. Jaka kar nungbo arem, kar nungbo ayong ama kümogo. Tang Rio-i aniba Govt. ya India nung most corrupted ta sangdongogo aser nübur dang nangzükba aser nübur rongdak tulutiba lenmang sendoka yutsüba Govt. ka ta ajaki shitet. Tanü nüburtemi lenmang meyanglutetba Govt. aser lenir nüngdak asü masü ta asüngdangtsü tim.

Jangpetkong Pastor aser Asso. Pastor telongjemi anir arogopurtemi/nüburtemi Jangpetkong lenmang yanglutsü ayongzükdang, arogoji tanela mapa inyaktsü dang aja. Lenmang yanglutsübaji arogo mapa masü, sen sarutsü nüngdak mali, magütsütsü ta kari shiakasa, Yisu Khristai nungloktsüba tenyaba mapa ya bendang lima (ora nung) arogo tenzüktsüba mesüra pulpit nungi tanela chiyungtsü agutsüba ya dang masü, saka nüburtem shi temang rangpen atema inyaktsü tim ta angateta arogotemi lenmang yanglua arudagi. Asen atepzüng nung shiranger hospital-i anir ao majung lenmang mali yur bendang lima mission mapa nung dang temulung agütsü nungbo tim masü aser ya Lai tesayuba masü. Shi temang aser tanela rangpen kümzüka ayuba nung arogoi shilem agitsü Lai tejangja tesayuba agüja lir. Anungji Jangpetkong arogoi tenzükertemi anir inyakba ya tamashi mapa ta mangatetdaktsüner.  Yaa tenzükba mapa nung shilem ka ta angatetdi.

Aor sobaliba nung “Lokti lir külenang kija alir” ta jembia aru aser iba tangatetba nung kija/kibong shiat lokti/arok atema mulungsoa nübu aser rongsen tenla aru. Timtem mapang pei sasa chitem tember bendang lima tashi oa yaritepa aruba kin. Pei kija dangbo kodanga merenloker, aser telok kaji kodanga tejakleni maor ta angateta tenla tulu agütsüba Aor otsü nung jembir. Jangpetkong otsü nung arogo nung tenzükertemi anir mezüngbuba yim ajak lungjemer, lenmang yangludi, temulungeri tenladi ta apusobaji mezüngbuba lir. Jangpetkong lenmang majungbaji Naga nunger/Aor ajak makzü, Jangpetkong lenmang maka yutsür, Nagaland nung smart city jembibaji maksü ta angateta, Jangpetkong nungeri dang masü, saka ABAM Executive Secretary, Sangtam nunger, iba lenmang nung mejajar tanga tzükong nungia, aser bendang lima azünger student tashi agi tenlatepba ngua, Naga nunger sobaliba tajung ya tesüngmangtsü ta Tsüngrem tenüng asanger. Lokti ajungtsü atema, mesüra sensaker atema nai tenla agütsüba jagi na kodang sensaka makümtsü. Lokti kechi mapa südir süang, pei akaba mulungsoa tenlaba jagi telok tejakleni aor ta metetdi aser lokti meimba tanela sayur ta angatetdi. Songjen tajangzük atema pei akaba lemsatepba Aor sobaliba tajung kodanga mesamadaktsüli. Lokti ajak ajungtsü tenlaba jagi temoatsü tali angur ta angatetdi.

Arogoi anir Jangpetkong nüburtemi lenmang yangluba nübur ajaki süioki ia bilemdangtsübaji olen ana shisemer:

(1) Ochishir aser lokti meimer lenir shimtettsüla. Tatishitsü agi, Jangpetkong aser Japokong nungi state ngur term kar dak alaka minister dang lia aru. Saka state ngur küm 60 tema nungi tzükong lenmang piyong nungbo black topping moudang. Jaka kar nung aobaji, ita ishika tsüngda nung tzünglui ponger oadok. Tang aliba Govt. nung Ao lima nung BJP nung adokba aliba MLA-ji item tzükong ana nungi dang, saka sanction aruba, chiadokba olulu, sanction tangai divert süadok, inyaktsütsü sanction renemdar ta olulu jembiba dak alaka lokti asoshi inyakba mali. Iba ama tiyazü olulu ya temalen lenir nungi jembia aru, aser tanüa jembir. Ochishir aser lokti meimer lenir meshimtetra, alima tejakleni aotsü makok. Naga nunger aser Aor ajak asoshi tansütsüji Jangpetkong ta ashitsü akok. Nüburtem saksalemdi. Ochi dangi meyipdi.

(2) Election nung ne meyongnem mayoktsüla. Ao lima tejakleni maobaji pei meyong ayokba ya ka lir, talisa Jangpetkong tejekleni maobaji pei meyongnem ayokba ajanga lir. Naga lima sen temtiba endokbaji Ao lima aser iba rongnung Jangpetkong ya ka lir. Candidate shiai crore 20-30 indokba otsü lir. Ne meyongnem ayokba agi nisung kar gari, TV, mobile, refrigerator, washing machine, etc ali. Kija, party worker kar tajangzük angu, saka lokti atema kecha meinyaktet. Electioni air sentsühtsür aküm, aser tadoker sentsüh aotsü aser taruba election nung vote alitsü bendenba ajanga lokti terenlok mapa meinyaktsüsa aküm. Iba süngjangji tanü nüburtemi ajurur. Ne meyongnem ayokbaji temenen aser iba temenen taji nüburtemi tanü ajurur. Election mapang meyongnem shishilembatepba jagi yim shia JCB kaka aser Dumper kaka alir ali nungbo koda alima tejakleni or lila ta bilemer.

Ita ishika lir election arutsü. Party masü, pei yim, kidong ta masü, saka ochishir, tasü tait, mangdang akaba, lokti meimba lenir shimdi ta ayongzüker.

*****