28 Koridang A/C NDPP ketdangpur aniokba sentong takok ngua agir MLA Imkong L Imchen den NDPP ketdangsürtem külemi tangokba noksa nung angur. Mokokchung, 15th September, 2022  (www.nokinketer.com)    

28 Koridang Assembly Constituency Nationalist Democratic Progressive Party (NDPP) pur ketdangpurtem aniokba den repsema tenüngsang agütsüba sentong ka 15th Sept anogo Mokokchung town kübok Yimyu Ward nung Pangertoshi’r kidang agiogo.

              28 Koridang A/C NDPP President – Imtinungsang Imchen, Working President – Waisangba, General Secretary – Dr. Rongsen, Treasurer – Pangertoshi, parnok den ano Vice President 17 aser Secretary par 14 anioka liasü. Ketdangpur aniokba aser tenangzükba mapa, Tali Pongen President, Agri & Allied Org. ajanga ketdangsüa agi. Ketdangpur tasen aniokertem asoshi Yimyu Baptist Arogo Pastor, Yapang-i temoatsü meshia sarasademtsü.  

              Iba sentong nung 28 Koridang A/C nungi adoksang MLA Imkong L Imchen-i jembidang, Naga yimden tebilemtsü latettsü asoshi NDPP nung adentsü asüngdangba ama, parnok NPF MLA 25 rongnung 21 aden aser UDA sorkar yangluogo, ta metetdaktsü. Parnok MLA 21 nemji taruba election nungji NDPP ticket agütsütsü kuli sütepa lir, ta paisa shisem.

              BJP-i taruba election nungjia seat 60 nungi 20 lemsateptsü mepishi nungji, hai haura katepa lir. Iba jagi sayur, “taruba election jia NDPP-i aniba sorkarsa akümtsü aser küm punguji bener aotsü ongko tejangja adokogo, aser ibaji BJP den mesüra medeni aotsü (with or without BJP)”, ta paisa metetdaktsü.

              Imkong L Imchenisa Naga yimden tebilemtsü dak sentakba keno kar den Mokokchung nung gari lenmang majungba indang tebilemtsütem lemsatepa liasü.   

              Tanü iba sentong nung  Mangyangnungba, General Secretary CEB & Convener Reorganization Committee menden liasü. Bendang Walling, President Youth Org. NDPP Mokokchung Region-i tarur pela-a agizük. President shimsang Imtinungsangi mapang tatsüka agia menden agizükba o jembi. CEB Vice President – Imtiyanger-i NDPP Mokokchung Region koda tenzüka aru, iba indang otsü tatsüka lemsatep.

Sentong nung NDPP Mokokchung Region President – N. Bendang Jamir, NDPP Central office nungi Vice President – Aolepden, NDPP Mokokchung Women Org. President – Arenla Pongen, 28 Koridang A/C Kimen – Pangertoshi parnokia shilem balala agia liasü. 26 Aonglenden A/C choir ajanga “Facta non verba” ta sür ken tajung ka tena tesentepertem ajungmeso.           

*****