Sentong nung tongti shilem agirtem
Mokokchung DEO Sentilai ANHTU Mokokchung Unit pur jubilee souvenir sayatsüdang
GHS Sumi kaketshirtemi shilem agidang
Senayangba GHSS kaketshirtemi ken atendang
ANHTU Mokokchung Unit jubilee sentong lapokdang

All Nagaland Hindi Teachers’ Union Mokokchung Unit tenzüker küm 25 ajungba jubilee den repsema ‘29 buba State Level Hindi Diwas 2022’ sentong 16th Sept nü yangi Aongza ki Mokokchung nung ayongzüka mungogo.

              Iba sentong nung Nagaland Higher Education and Tribal Affairs minister, Temjen Imna Along tongti tesemdanger jaoker liasü, saka ajungben yimden nüngdak tulu adokba ajanga pa iba sentong nung medentet. Aji süaka, renemer akaba sentong ajak tobur junga aser takok ngua agia liasü.

              Sentong nung 23 Assam Rifles Commandant – Col. Viplove, Mokokchung SDO (C) – Sentilong Ozüküm, Mokokchung DEO – Sentinenla, All Nagaland Hindi Teachers’ Union (ANHTU) President – Ruchunlo Tep, ANHTU AGS – Vongthunglo, ANHTU Mokokchung Unit President – Chuba, Planning Committee Convener – Tajung, Planning Committee Secretary – A. Atsüla Yimchungrü aser Souvenir Committee Convener – Senzüngmar parnoki shilem balala agia liasü.

              Tanü libuyimpur (indigenous) oshi aika sama-a odar. Oshi samara sobaliba tesama, kechiyong oshiji sobaliba aser maitsü (identity) lir. Küm ishika lirbo alima nung ya oshi 5 dang anüngtsü ta oshi bushir mongintemi bushiteta lir, item oshi 5 rongnung Hindi-a densema lir, Hindi ya takar oshi ka lir, anungji, linük oshi ya ajungkettsüla, ta SDO (C), Sentilong Ozükümi jembidang ashi.

              Naga nungeri subject tsübuba anaji; Maths aser Hindi ya lir. Anungji, iba dak sentakba nung tanurtemi Hindi subject junga angazüktettsüsa tesayurtemi khuret bena tajungtiba nung sayutsü asoshi Mokokchung DEO, Sentinenla tayongzükba ka agütsü. Mokokchung DEO-isa ANHTU Mokokchung Unit pur jubilee nüngtem adokba nüngyu kaket ka sayatsü.

Senayangba GHHS Ungma aser Govt. High School Sumi kaketshirtemi ken aser tsüngsang ken ajanga tesentepertem saksalemdaktsü. Artang Baptist Arogo Pastor – Rev. Dr. Bendang Longkumeri temoatsü meshia sarasademer iba sentong tenzük aser Tenyimia Baptist Church Mokokchung Pastor – Tiyalo den tenüngsang agütsür iba sentong tembang.   

              Tang Nagaland nung Hindi tesayur (ANHTU züngsem) ajak agi 2350 lir aser Mokokchung Unit kübok Hindi tesayur parnok 266 lir, ta osang ajanga metetdaktsü. 30 buba state level Hindi Diwas sentong sangküm Kohima yimtiba nung akatsü, ta All Nagaland Hindi Teachers’ Union tir-i metetdaktsü.

*****