Food & Civil Supply Asst. Director, Jamonger-i Mokokchung – Leh Ladakh “Motorbike Expedition” flagoff sür yokdang tangokba noksa nung angur. Mokokchung, 20th September, 2022  (www.nokinketer.com)    

Mokokchung nungi Leh Ladakh tashi bike nung or arutsü atema 20th Sept nü Mokokchung nungi biker par pezü apusoa ogo.

Iba ‘Motorbike Expedition’ ji tanep Mokokchung Asst. Director Food & Civil Supply, Jamonger-i Mokokchung police point nung flagoff sür yokogo. Ainlen jajaba tepiyong Tsüngremer tadenba lidakjang ta Mokokchung Town Baptist Arogo, Associate Pastor, Rev. Temsuwati-i sarasademtsü.

              Mokokchung nungi biker-temji; Anungba, Yanger, Moatemjen aser Nchumthung Humtsoe par pezü lir. Iba motorbike expedition ya “strength lies in differences, not in similarities” omen dak rangloker aor.

“Onok kodang meyiptsü meshiteter, saka tajemba agi anogo 20 shi ainlen jajatsü imlar”, ta Mokokchung IMDH Chaplain, Nchumthung Humtsoe-i iba osangbener den jembidang metetdaktsü. Iba expedition mapang parnok Nagaland tourism ajungkettsütsü aser meimchir/kin tsüngta satanga benshiba (racial discrimination) maparen anema osang peroktsü, ta paisa shisem.

              Tetushi tesemdanger Jamonger-i mapang tatsüka agidang, iba ama mapa ka inyaktsü  atema tasü tait aser temulungtetba nungdaker. Lenmang nung jajadang medemer tajung den tajangshiba balala ajurutsü, aser tongtibangsa ibai Tsüngrem ajuruba mapang ka asütsü pai lemsatep. “Nenok den Mokokchung nüburtem lir”, anungji, kecha timtem meli-i pei talidaki meyipa shilangtsü asoshi pai moatsü.