Ao Senden tir, Wb. Chubawati Longchar-i pa takdang nung osangbenertem den jembidang.  Pa den par külem ketdangpurtem aser tongror luden kar noksa nung angur.  Mokokchung, 22nd September, 2022   

Tsürabur ka ama yimli dak rangloker Mokokchung – Mariani NH702 (D) lenmang yanglutsü asoshi Ao Senden-i anogo 20 atsülangtsür, ta Ao Senden tir, Chubawati Longchar-i 22nd Sept 2022 nü pa indang office nung osangbenertem den jembidang metetdaktsüogo.

              Anogo 20 atsülangtsübaji 22nd Sept, 2022 nungi taruba ita 10th Oct, 2022 tashiji alitsü. Iba anogo tashi nung gari jajatettsüsa lenmangji meyanglura, Ao Senden-i tapet mera agitsü, ta pai shiogo.

              NH702 (D) Mariani – Mokokchung lenmang dak sentakba nung Ao Senden-i 12th Sept, 2022 nü General Manager (P), National Highway & Infrastructure Development Corporation Ltd. (Ministry of Road Transport & Highways, GoI), PMU-Mokokchung dangi 20th Sept, 2022 tashi nung gari senzütettsüsa lenmangji yanglujang ta takangba ka agütsü.

              “Takangba agütsür külen onoki asemben tashi mapatem repranga jajaogo, aser lenmangji kechi tia nung lir onoki nguogo, parnoki inyakba mapa jagi khenyongi temulung masür,” ta paisa ashi. 

              “Aor tebu ka ama, onoki iba dak sentakba maparen nung tatsü talang ajak asadangogo, aser yimli dak rangloker anogo 20 tsüngta nung gari jajatettsüsa lenmangji yanglutsü mapang atsülangtsütsü lemtet”, ta paisa shisem.

              Iba lenmang nung khu abenba gari ton 20 dak tali abenba garitsüng aika aketba garitem mejajatsü atema Mokokchung Deputy Commissioner ajanga koba tawa order ka agütsüogo, iba nungji Ao Senden-ia sashisashia nungiter. Iba lenmang ya gari tulu senzüba lenmang masü, ta paisa jangjashitsü.

Ao Senden-i lemtetba kar lemsatepdang, tang sürbo contract agizüker dak alaka tangar kar nem sub-contract magütsüdaktsütsü. Mokokchung district kübok contract mapa balala atema tender agütsüdang, sen ajema agütsür mapa agizükba (lowest bidder) iba inyakyim ya anendaktsütsü, kechiyong iba ama maparen ajanga mapa junga meinyakteter, ta tirisa metetdaktsü.  

“Tsürabur lokti ka ama anogo 20 yimli agütsür, saka nübur taginüba mataloktsüra, Ao Senden-i tapet mera agitsü”, ta paisa metetdaktsü. 

“Iba maparen dak sentakba nung onoki lenla ajaklen asadangogo. Lenmang yangluba mapatem repranga jajaogo. Saka parnok mapa agi onok temulung masür. Onoki agidi süra meraji agitetba, saka tsürabur ka ama taochi/yimli agütsür.”, ta paisa shisem.

“Ao Senden-i item telemtetba ajak ya nübur ajungtsü asoshi lemtetba lir, anungji, nüburtem nungi amalitep nungdaker”, ta Ao Senden-isa metetdaktsü. Iba contract mapa ya Mr. Tenumeren Walling M/S Trident Enterprise-i agizük. Lenmang yanglushitsüba kilometer ajak agi 63 lir.