Nagaland Minerals & Mines Proprietor, Temjenmoa Jamir-i 26th Sept aonung yangi Imkongmeren Sports Complex Mokokchung nung basketball court tasen ka lapoktsüogo. Iba court ya pai tenla tulu agüja yanglutsüba lir.
Iba mapa inyaktsü maongka ngutetba asoshi pelaba den Mokokchung nung lanur sempet aketer jenti angur saka sabang maka, aser lanurtem sempetbo lir saka machimajemtsü nung amdaker tezülen jajartem aika lir, anungji, iba mapa tila ka ajanga sempet aketer jenti adokba den Mokokchung ya basketball district ka akümtsü nükla ayutsü Temjenmoa-i iba court lapokja mapang tatsüka agidang metetdaktsü.
Nükla tulu yur aser Mokokchung district nüburtem basketball asaya tsütsü ajungshitsü asoshi kanga dang nungdaka aliba basketball court ka yanglutsüba asoshi tetenlar Temjenmoa Jamir dang BAMD tenüng nung basketball court yangluba luden tayonger, Jamonger-i pelaba metetdaktsü.
Mokokchung nung küm 20 sülen basketball court ka asangsang yanglutetogo. Mokokchung nung iba ama mapa tajung nija kati inyakbabo aika mangashidang, anungji, tetenlar dang Jamong-isa tenüngsang agütsü.
Mokokchung nung taoba mapang Mayangnokcha Govt. Hr. Secondary School anasa basketball court ka liasü, saka iba court to P. Shilu Ao Park yangludang bentoktsüsa aküm. Aji sür Mokokchung nüburtem basketball court makai küm 20 shi aruogo. Mokokchung nüburtemi moa aser lanurtem nungdak ajiteta Temjenmoa-i iba court ya yanglutsüogo. Temjenmoa ya Nagaland RD Minister, Metsübo’r jabaso lir.
Iba basketball court lapoka Basketball Association Mokokchung District (BAMD) o Mokokchung nung basketball meimer tsüngta exhibition match ka asayaa liasü.
The Nokinketer 