(Changki tsür asemi iba konang tetushi senpet agizük)
Aoli Pongen Mungdang pur 3 buba konang tetushi senpet agütsüba ‘Academic Excellence Award’ sentong ka yangi parnok kimen – K. Rongsenwati Pongen, Aongza Ward Mokokchung kidang meraketa agiogo. Iba tetushi senpet ya Nagaland Board of School Education (NBSE)-ketdang süa agiba HSLC (class 10) tatidang nung top 20 jenjang tongteter nemsa agütsür.
Taküm iba tetushi senpetji; 2018 küm top 10th adokla Changki tsür Kr. Yangerjungla Pongener (D/o Lanusungkum & Alemla), 2019 küm top 12th adokla Changki tsür Kr. Endiyala Pongen (D/o Imtitemsü & Lanumongla) aser 2021 küm top 8th jenjang nung adokla Changki tsür Kr. Imlitula Pongener (D/o Lanusungkum & Alemla) par asemi agizüka liasü. Kr. Yangerjungla aser Kr. Imlitula na ya adianu lir.
Iba sentong nung tetushi agütsüba mapang Jubilee Memorial School (JMS) Vice Principal, Wapangnaro-i agidang, tanü alima ya kanga dang tetoktepba agi süngogo, anungji, pei dak temulung talira melemi nendaknendak alizüng matong tashi tanen makai meranga azüngtsü ajungshia liasü.
Tsüngrem tama südaktsür ajemalua züngra, pai kechisarena moatsütsü, ta Laishiba nungi o kar atishia ajungmeso. Ibai tetenzüker ka dang lir, anungji, tarutsü nung ano takok tuluba bener arutsü nükla yur meranga azüngtsü laisa ajungshi. Aoli Pongen Mungdang-i iba ama sentong ayongba ajanga kaketshirtem ajungshir, ta laisa pelaba olen ka lemsatep.
Tanü iba sentong nung Kr. Yangerjungla Pongener, Delhi nung aliba ajanga iba senpet agizüki marutet saka lai salem osang shiokba metetdaktsü. Kr. Endiyala Pongen aser Kr. Imlitula Pongener nati snepet agizüker külen tepela o tatsütsü lemsatepa liasü.
Iba sentong nung Education Trust Board nung Co-convener – K.Imtituba, MTBA Assoc. Pastor – Yanglo Pongen, Aoli Pongen Mungdang Tir – Sakuwati Pongen, APM Kimen – K. Rongsenwati Pongen parnoki shilem balala agia liasü. Taküm iba sentong ya “kidong ka telongjem tashiji linük asoshi” nükjidong dak rangloker agi.
The Nokinketer 