4th Oct nungi tenzüka anogo pezünü tashi yangi Multi-Purpose Sports Complex, Mokokchung nung 12 buba Luke Sasong Memorial Volleyball Trophy 2022 asaya-a mungogo.
Tesüsabuba asaya MH-10, Kohima aser Changtongya Volleyball Association (CVA) na asayaba, MH.10-i 25/18, 25/19, 20/25, 25/21 agi CVA madak takok tulu ngua taküm iba asayamung marok parnoki bener ogo. Tawa tembangba 15 buba Imchaba Master Memorial Nagaland Open Volleyball Trophy nunga final nung tena ajurutep aser yangjia MH-10-isa CVA madak takok ngua liasü.
Takoker mezüng jenjang nem senpet trophy den sen 70,000/- aser atongdakba nem 40,000/-, aser semifinal nung tsüker Kumlong Sporting Association ‘A’ aser Longkhum Students’ Union nema 10,000/- agütsü. Nija senpet; Best Spiker – Reshitemjen (MH. 10), Best Setter – Tongpangsünep (MH. 10) aser Man of the Tournament – Imkongsanen (CVA) par asemi agizük.
Iba asayamung ya Mangmetong Kaketshir Telongjem akhüm nung Luke Sasong Sporting Association-i ayongzük. Taküm iba asayamung nung Kohima aser Wokha district nungi team kaka densema telok 12-i shilem agia liasü.
Mangmetong nunger Asür Luke Sasong ya par yimer rongnung mezüng shisa aneter aser nüngtugu nisung ka lir. Iba asayamung ya pa nüngtem asayar aser ibai küm ana nung khen asayar. Mezüngbo ibai Mangmetong yimdak dang asayaa aru saka taküm nungi district HQ Mokokchung nung ayongzük.
Iba asayamung shibangba sentong nung Nagaland Legislative Assembly, Speaker, Sharingain Longkumer tetushi tesemdanger ka ama arua merakettsü.
The Nokinketer 