Nationalist Democratic Progressive Party (NDPP) 26 Aonglenden Assembly Constituency pur party tenzükertem lokti senden ka Marepkong Community Hall nung mungogo.
Iba lokti senden nung party tenzükertemi renemba kaji; taruba 2023 nung Nagaland state general election-ji agira, tang teinyakdak Nagaland Legislative Assembly, Speaker – Sharingain Longkumer-sa shimtsü lemtetogo, ta NDPP 26 Aonglenden Assembly Constituency ketdangpurtemi osangbenertem den jembidang metetdaktsü.
Tanü iba senden nung 26 Aonglenden A/C nungi adoksang NLA Speaker, Sharingain Longkumer-i jembidang, politics asünung oluluji aika adoktsü, saka taruba election-ji agira lemteta akaba ama, NDPP-BJP menden lemsaba (40-20) yimya nungji aotsü, anungji, constituency sangertem shinga memangmangtsü asoshi pai jangjashitsü.
“NDPP-BJP alliance-ji akanga-akanga lir, oluluji mopung aoner amai onjen aotsü saka asenok iba nemji mekokdaktsütsü” ta paisa shisem.
Nagaland Chief Minister, Neiphiu Rio aser NDPP tir, Chingwang Konyak nati Naga yimden tebilemtsü atema ya kanga süoki ia agir, solution ji arok asoshi kanga tongtibang lir. Naga yimden tebilemtsü ya tatembang kati arura, Naga nunger asoshi mangdang aser otsü tasen ka asütsü, anungji, iba maparenji tatembang kati maru tashi asenoki election-ji khen mejembi-i süngjema atatsü asoshi paisa mepishia metetdaktsü.
Paisa party worker-temi mapa meranga inyakba asoshi pelaba den alima tensa kechi koda asütsüar meteta maka, anungji, election ji agitsüsa kümra maparen ajak renemer atatsü asoshi paisa tayongzükba ka agütsü. “Pei tesep junga benteta atatsüla”, ta paisa shisem.
Nagaland nung A/C rongnung Aonglenden ya balaka tangari akhüm tsübur aser asenok nungi kanga imlar. Anungji, maparen ajak nung temelenshi bener aruba constituency ka asütsü asoshi paisa ajungshia liasü.
Terenlok kisüng atema masü saka meimchir sempet renlokdaktsütsü (human resource development), loktiliba aser rongsenketzüng ajungkettsü asoshia asenoki nükla yudi, ta paisa ayongzük.
Iba sentong nung Aonglenden A/C nungi Region-i yoker Mokokchung Region NDPP tir – N. Bendang Jamir, Mokokchung Region NDPP Women Organization nungi tatong tir – Sulemtula, Mokokchung Region NDPP Youth Organization tir – Bendang Walling par asemia mapang tatsütsü agia jembi. Sentong nung NDPP 26 Aonglenden A/C tir – Nungsangmeren, NDPP 26 Aonglenden A/C tatong tir – Kikumsungba aser NDPP 26 Aonglenden A/C tongti zülur – Sütsüng parnokia shilem balala agia liasü.
26 Aonglenden A/C kübok unit ajak agi 7 lir itemji yim asem – Ungma, Settsü aser Küpza, aser Mokokchung town kübok ward 4 lir – Dilong, Arkong, Sangtemla aser Marepkong.
The Nokinketer 