Mokokchung S.P, Aotula T. Imchen IPS-i 2022 MDFA trophy tenzüktsür külen sentong nung shilem agirtem, tayongertem aser mezüng match asayatsüpur SSS o Revenant FC den külemi tangokba noksa nung angur. Mokokchung, 11th October, 2022   

Ajaki yongyaseta ataba 2022 MDFA Trophy yangi Imkongmeren Sports Complex nung 11th Oct nü Mokokchung Superintendent of Police, Aotula T. Imchen IPS-i tenzüktsüogo. Iba asayamung ya Mokokchung District Football Association (MDFA)-i district nung football asaya nung sempet aketertem ajungshitsü nükla yur ayongzüka akar.      

Asayamung tenzüka mezüng asaya Sports Society Suyim aser Revenant FC na asayaba goal 1-1 nung shingaia mekoki tembang. Mezüng goal ji 1st half nung SSS nungi Suyimmayang-i minute 34 nung idaktsü. Aji saka, iba goal ji 2nd half nung Revenant FC nungi Talijungba-i minute 58 nung küptoka iba asaya draw asü.     

Mokokchung SP-i iba asayamung tenzükja jembidang, Mokokchung district asoshi iba ya konang tulu aketba trophy ka lir aser ibai teküboktiba jenjang (grassroot level) nung alirtem sempet ajungkettsü sabang tulu ka lir, anungji, jenjang balala nung asayatsü nükla yur asayatsü ayongzük.

Tsüngremi nisung shia nem sempet balala moaja lir, iba ama asayamung ajanga lanurtemi pei sempet tali jangja meteter aser parnok asoshi ibai tapet sabang lir. Anungji, “meranga asayang aser iba nung takok angutsü merangang”, ta lai ajungshia liasü.

 Tanü iba asayamung nung chief match patron-ji Nagaland DGP, T. John Longkumer jaoker liasü saka mepaitoktetba maparen kar ajanga pa iba sentong nung medentettsüsa kümatok. Anungji, pa melena Mokokchung SP, Aotula T. Imchen IPS meyonger arua renema akaba sentong tobur junga agia liasü.

Asayamung tenzükba sentong nung Mokokchung DC aser District Sports Council (MDSC) President – Shashank Pratap Singh IAS-i tarurtem pelaa agizükba o jembi aser organizing committee convener – L Yanger Ltr-i tepela o den tournament secretary – Imnayanger ajanga asayartem tenangzükba agia liasü.

Taküm iba asayamung nung telok 11-i shilem agitsü. Group 4 küma lemsaa lir. Goup ‘A’ nung – Sports Society Soyim, Revenant aser Legendary Yeomanly Misfits. Group ‘B’ nung – Marepkong Youth Association, Mongsenbai FC aser Longpa Lomuden FC. Group ‘C’ nung – Moanungsang Memorial Sporting Club, Youngsters Team aser OCYU. Group ‘D’ nung Telongjem FC aser Sparious FC na dang lir. Iba asayamung ya 26th Oct tashi asayatsü.

*****