District Education Officer (DEO) Mokokchung, Sentinenla-i Soul House Academy Mokokchung pur website – www.soulhouseacademy.in tanü 28th Oct, 2022 nü Soul House Academy kilem Tongdentsüyong ward nung sentong ka agidang lapoktsüogo. Mokokchung Town Baptist Arogo, Associate Pastor, Rev. Chuba-i iba website meshitettsü.

              Tila tanur reprangtsüba ya mapa temela masü, küm 6 tashi iba riju ajanga tanurtem kanga junga anishiba den education tajung agütsüba ngua principal-i anir tesayurtem dang pelaba Mokokchung DEO-i website lapokba sentong nung jembidang metetdaktsü.

              Tila tanurtem asoshi shisaliok nükmen (foundation)-ji kanga tongtibang lir, anungji, school ketdangsür aser tesayurtemi iba nungji tongtibang agütsütsü asoshi lai ajungshia liasü. Tanü joko shisaliok tajung agütsüba den külemi taküm liyonga aotsü asoshi tasa balala (life skills) sayutsü kanga nungdaker, ta laisa shisem.

              Soul House Academy ya taoba mapang “Treehouse” ta jar 2016 küm tanurtem nem shisaliok tajung agütsütsü nükla yur tenzük. Iba ya Xseed sentong agütsüba school ka lir. Yangi nursery nungi grade 4 tashi lir aser 2023 küm nungibo grade 5 ajungkettsü sentong lir. Iba school nung jangratemtsü kaji; English, Environmental Science, Math aser Hindi sayuba den ano optional Ao subject sayur aser primary section pur atema Basic Computer sayutsü sentong lir.

Subject balala sayuba dang masü yangi ‘Literary Day’, ‘STEM (Science, Technology, Engineering and Math) Day’ aser ‘Annual Day’ nungertem amunger. Iba den music class, indoor games, martial arts aser drama amala sentong balala agir. Yangi tesayurtemji Xseed certified-tem dang lir. Soul House Academy ya school jenjang ajungkettsü asoshi tang maparen teinyakdak lir, ta angazüker.

Soul House Academy indang tali metetnüra parnok website – www.soulhouseacademy.in nung osang ajak angutsü.