Kaket zülur Tiala Imchen-i züluba “Lanur Longzük” (Biography of Rev. R J Amen Longchar) kaket 30th Oct, 2022 nü ABAM Executive Secretary, Prof. Rev. Dr. Mar Pongener-i sayatsüdang tangokba noksa nung angur.

Nüngtugu kaket zülur Tiala Imchen-i Ao oshi nung züluba Rev. RJ Amen Longchar indang taküm otsü “Lanur Longzük” kaket 30th Oct, 2022 nü Rev. RJ Amen-er ki Kumlong Ward, Mokokchung nung Ao Baptist Arogo Mungdang, Executive Secretary, Rev. Prof. Dr. Mar Pongener-i meshiteta sarasademer sayatsüogo.

              Iba kaket nung Toshi Sanglir, Rev. Dr. Noklen Longkumer, Prof. Rev. Dr. Mar Pongener, Rev. Dr. Wati, Rev. Dr. Takatemjen Ao, Rev. L.K Tsanglao, Rev. M Asangba Longkumer, Rev. Lima Sangtam, Kikum Longkumer, Rev. N. Sheipa, Meren Mollier, Takosunep Longkumer, Eunice (Lanusenla) Longchar parnoki Rev. R J Amen Longchar indang kuli agütsüba o semlok angutsü.

              Tsürabur Rev. R J Amen Longchar ya Waromung nunger Rongsenmeren Longchar aser Tebuchila Aier na jabaso lir. Pa ya ABAM nung Youth Secretary küm talangka inyak aser pa lenisüba mapang ABAM Youth Ministry (taoba mapang ACYE) nung mapa tasen jenti inyakba shia angur. Iba kaket nung tanur tain ajak atema mulungdangtsü otsü aika shia angutsü.

              Iba kaket jenjang 350/- aser iba ya Mokokchung nung Clark Literature House, MTBA Complex aser Dimapur nung Tir Yimyim Office Super Market nung angutsü.   

              Iba sentong nung Kumlong Baptist Arogo Pastor Kikim Longkumer menden liasü. Kaket zülur Tiala Imchen-i kaket rajem o tatsüka ashi. Rev. RJ Amen Longchar-i mulungnen o kar lemsatep. Taoba Associate Youth Secretary ABAM, Arenla Imchen-i Rev. RJ Amen den inyakdang bilemtetba o kar lemsatep. Anükabang Dr. Along Ozükümi tepela o metetdaktsü. MTBA Associate Pastor, Rev. Chuba Jamir den temoatsü meshia sarasademer sentong tenzük aser Dr. Sünep Imchen den tenüngsang agüja sarasadema tembang.  

              Tiala Imchen ya Mangmetong tsür aser la ya theologian ka lir. Lai tang tashi nung kaket 9 zülua lir. Item rongnung ‘Ao Lima Nüktzü’, ‘Ao Kin Dangi Khrista Yimsü Aruba’, ‘Ao Pioneers Taküm Otsü’, ‘ABAM Arürkhudong’ itemji nüburtemi kanga sapua azünger. La ya Aotsür rongnung kaket zülur tetangshi ka lir. Lai züluba kakettemji Naga limai Khristan yimsü arur küm 150 ajungba ABAM Sesquicentennial mapang Impur nung kaket ayokdak angutsü.

*****