Ao Baptist Arogo Mungdang (ABAM) Executive Secretary, Rev. Prof. Dr. Mar Pongener-i 31st Oct, 2022 nü Impur Mission Centre nung ‘J.N Aier Prayer Tower’ ta sür sarasademba mitza ka meshiteta lapoktsüogo.

              ‘J.N Aier Prayer Tower’ ya taoba minister Yajang ‘C’ nunger Dr. Benjongliba Aier-er kibongi yanglutsü. Naga tenemi Yisu Khrista yimsü arur küm 150 ajungba den külemi Tsüngremi par kinunger jakzük asem tashi metitemi meimba Pa temoatsü bilemteta iba sarasadem mitsa ya yanglutsü. Iba mitsa ya ABAM nem bendanga amoktsüogo.

              Jakzük asem Jepdakyangba, Ngangshikaba Aier aser Dr. Benjongliba Aier tashi Impur nung azüngba den Tsüngremi par kinunger moatsüba indang otsü kar iba mitsa nungji zülua angutsü.

Iba sarasadem mitsa ya ki tatem 3 lir, iba ya meta penzütsü tesem kanga tajung. Mitsa talak nungi temenungratsüka Mokokchung town aser yimtsüng aika angur. Ibai sarasadem ki ka dang masü limapenzür puatsüsa yim penzütsü tesem tajung ka lir.

              Tanü iba sentong nung sarasadem mitsa yanglutsür Dr. Benjongliba Aier, ABAM finance & Property Secretary Rev. Wati Longchar, Yajang ‘C’ village Council Chairman, M. Onen Aier, ABAM tir Senior Pastor, Rev. Sentisashi parnokia o tatsütsü jembia liasü.