~ Puryapang, Pastor

Yimyu Baptist Arogo

Okila

Clean Election Movement ya NBCC nungi tenzϋk aser ABAM-i anir local Arogo tashi nung committee balala tenteta kϋm ishika inyaka aruba sentong ka lir. Oda, iba movement ya takok ngua tatembang ka matong tashi inyaktsϋ temulungtetba lir. iba Clean Election Movement ajanga asen Ao Arogotem nung temelenshi terabo adokba angur, saka ano ibai mapa tuluba nung inyaktsϋ anendaka lir. Anungji, amangbapurtemi sarasadem nung yaria Moral Support sϋdaktsϋnür. Tanü, Nagaland Assembly Election (2023) asen jakdang anasa anendaka lir. Tesϋiba election-tem nung sen agi tongpang tulutibaji koketetba angashia aruogo. Nϋbur ajaki ibai majung ta jembir saka kasa tatidang nung alanga tamakok aluba angur. Anungji, ni iba ocet nung asen amangbapurtemi election nung sen ketdangsϋba nung koda ochi shia shilem tajung agitsϋ, aser Tsϋngremi mulungba lenir tajung shimtsϋ indang tatsϋ agi lemsatepnür. Ojang karbo Ao oshi nung tejengja maliba agi ni English nung zϋluogo, anungji yimlibilema ajaki ya kechiba ta mebilemi zϋngdaktsϋnür.

Sen ya kechi?

Mezϋng meimchir-i sen meyanglutetba mapang oset-tsϋset ajanga dang melenzϋktepa lia aru (Barter). Saka meilongi meimchir-i sen yangluteta shishilembaba tenzϋka aru. Iba sen yanglutetba otsϋ reprangdangra ya asenok takϋm libaliru tajungba aser temelaba asϋtsϋ  atema yangluteta amshia aruba oset ka dang lir. Iba sen ya meimchir ajaki nüngdaker, sen melira meimchir takϋm ka melitetsϋ mesϋra takϋm jenjang tajemzϋkba tia nung lirepa litetsϋ. Oda, alima nung iba sen ya chubai anir meshi-metsϋr ka tashi agi nüngdaker. Yamaji, meimchir ka iba alima nung ali tashi sen-ji tongtibangtiba shilem ka lir.

Sen dak tashi tulu lir, shibai iba sen mashikoshi sϋa amshidir lokti, kibong, aser kija takϋm ajak takoksa tulu nung anioktsϋtsϋ. Kechiyong, iba lima nung ya-bo sen agi malizϋktetba jenti ka-bo mali. Ashiko, iba sen yagi, kari sentsϋ tulu tsϋoka toktsϋtsϋ akok, kari maka-maiter indang agizϋka chitsϋtsϋ akok, mesϋra sen mechi adianu tepset-teptsϋ akok yamala tepangkatsϋ otsϋ atalokdaktsϋtsϋ. Sen dak tesϋngmangtsϋ mapa kaji iba lima nung meimchir shinga-a sen agi tenϋk mesϋngdang. Kechiyong, kecha putu nunga senkar-i nibo periogo ta meshidang ano mashitsϋ amai bilemer. Multi millionaire John D. Rockefeller dang yamai asϋngdang “Sen kwiji tepiri?” pai tatsϋka bilemdanger yamai langzϋ “Ano tera talila inoksemner”. Yamaji, sen nung asenok meimchir-i merumeru-a talila teti bushir.

Temeshi lai nung sen indang Paul-i Timoti dang yamai ashi, I Timoti 6:9-10 “Saka shirnok takar kϋmnϋr parnok tatitang nung aser sang nung, aser tamashi aser takoksa azϋabungba nung tsϋker aser tesama nung araksetdaktsϋr. Kechiyong sen meimbaji tamajung tapu ajak tera lir; aser aji bushi nung nisung kar tamang nungi mashileni ao, tejashi jenti agi pei sasa ateta atsϋng.” (Ao Laishiba 1980) Adianutem, Paul-i sen ya temenen ta mashi saka sen meimba ajanga temenen mapa ajak tenzϋkdaktsϋba indang jembiba lir. Laishiba nung amshiba ojang ‘araksetdaktsϋr’ ta alibaji Greek oshi nung ‘bythizo’ lir, koba tetezϋ tzϋ tarok nung tanemi ponglang leni lua arϋksetdaktsϋba tatishitsϋ amshiba lir. Atangji, sen meimba ajanga meimchir ka mero-mero ajungmesodaktsϋr aser temulung mesϋ-i kϋmdaktsϋr. Kodang temulung mesϋi lidir tangar indang nϋkshitsϋ aser pei akaba nung tenϋk mesϋngi talila bushitsϋ. Tanϋ putu nung iba sen meimba ya wara ka ama yakta menaloker aoer aser meiluingi senji Tsϋngrem kϋmdakja kϋlemer. Sen agi yamaji asen meimchir putu ajak nung anishi-a aru. Tanϋ, Election (2023) koba asen kishi nung akoshidar iba election sen agi asen nϋburtem jenjang temaba ka nung raksatsϋtsϋ amai bilemer. Kechiyong, Election aru shia mapa tamajung renloka aoba angur.

1.  Election Mapang Angati Jenti Angur

Nagaland Assembly Election mapang Ao lima nung angati rongsen jenti angur, gari, kimong, Cell phone, Proxy vote meyong sen angur, mim mozϋ (Drugs) aser temesepba chiyungtsϋ talobusa angur, ano employment agϋtsϋtsϋ nangzϋkteper, etc. Yamala tesempatsϋ mapa tamajung jenti asenoki kϋm jenti inyaka aruogo. Kodang-ang asen nϋburtemi iba amala mapa tamajung dang Tsϋngrem tenϋng nung temenen-a ta ashitsϋ? aser ochi shia election  nung shilem tajung agitsϋ. Item mapa tamajungtem odang inyaka zϋindaktsϋra asen lima nung election sen meimba ajanga, teyazϋ jembiba, ashioktsϋtepa, aoyatepa, Drug Addiction, Alcoholics, aser nisung tepsetba jenjang tuluba nung asen tenϋk agi ngua adoka aotsϋ. Temeshi Laishiba nung tansϋtsϋ otsϋ ka (II Chubatem 5:15-27) Naman zϋtsϋra agi  shiranga  alidang ainkar Elisha ajanga anebtsϋ. Namani tepela tulu agi sempet jenti bener Elisha semdang saka  pai sempet-tem magizϋk. Kodang Elisha kilir Gehazi-i iba indang metet, pai yakta apusoa oa senpet-tem meshizϋka ayu. Elishai iba mapa tamajung inyakba meteta Gehazi dang yamai ashi “Naman zϋtzϋra ne dak aser ne metsϋ dak teti alitsϋ.” Adianutem, nai meinyakba aser ma- azϋkba rongsen dak teranglok aser nϋkshia tereprang. Kechiyong, item rongsentem agi ne nem kechi temoatsϋ aser atakatem bener arutsϋtsϋ-ar nai memetet. Khen asoshi tajung asϋtsϋ akok saka item rongsentem agi asen akϋmli khu taretba-ang kϋmdaktsϋra koda tesasatsϋ ka asϋtsϋ.

2.  Sen Yong Vote Ayokba

Mark Tawin-i ashiba agi “Nisung kari Rank kϋlemer, nisung kari Hero kϋlemer, nisung kari god kϋlemer, parnok ajak shisatsϋ tangatetba balala nung telungjem ka nung meliteter. Saka parnok ajaki senbo kϋlemer.” (1935) Adianutem, Election mapang asenoki sen meima kϋlemba ajang teraksa tulu adoktaktsϋr. Election mapang Khristan tajung aikati vote   shipanger

(Coup), vote ayoker, proxy vote agϋtsϋtsϋ temulung ulur aser ibai shitak mapa ka ama odi-odia inyaker. Kodang aseni vote sen agi yokdir aser iba amala mapa tamajung inyakdir asenok iba indang alar akϋmer aser alena ayur. Election tembanger kϋlen aseni shimtetba lenir-i asen majurutetra mesasali, lenmang majungba indang menemnemli, lanurtem mapa manguba indang mesasali. Kechiyong, asenoki asenok tangutsϋ aliba ajak agizϋka election mapang agiaogo ta angatetdi. Nagaland Post osangset ajanga 2022 January ita nung sangdongba  agi tanϋ Nagaland nung lanurtem parnok 92,302 zϋnger mapa mengui register sϋa lir, ano Indian sorkari ‘worst performing state’ ta tenϋng agϋja lir. Adianutem, item mapa tamajung ajak asenoki Election nung sen tali meimba aser ochi meinyakba ajanga lir. Nai-a tsϋrabur ka ama ne chir-nur tarutsϋ putu senmang yoka chitsϋba ya sasa bilemtsϋr asϋ masϋ? Anungji, adianutem asenok ajaki longjemer asen temeten ‘My vote, My right aser ‘Clean and Fair Election’ dak rangloka mapa kϋma renloka odaktsϋdi. Lipok 25 nung Esau-i tenu Yakob dang pei senmang ayok aser iba temoatsϋ kodanga pai meyipa mangu. Tsϋngrem-i temoatsϋ asen jakdang jenti renemja lir saka khen jangratem aser tepela aginϋ dang election nung sen yong asen nϋchi aser temoatsϋ yokadoker. Asen tangutsϋ aliba senmang zϋpa-zϋpa bilemer aser Tsϋngrem metsϋbui sen meimba lenmang nung jajar. Paul-i ashi ama sen meimba ajanga asen temenen mapa agi asen sasa ateta atsϋngtsϋ aser tzϋ ponglangtiba tashi lua araksettsϋ.

3.  Election Nung Ochi Mashi Sen aser Lokti Temenen

Rev. Dr. Noklen Longkumer, Pastor, Ungma Baptist Arogo pai ashiba agi “Ni Election nung sen amshir den sensaksem dang, kari ashiba agi Mokokchung District nung Nagaland General Assembly Election nung Aor constituency kar nungbo sen croer 50 tema indokba angazϋk.”  Ano, reprangdangra candidate-temi ishiba agi sen croer 20 tashi bo-sa General Election ka nung endoker. Candidate ka election nung adok-yonga madok-yonga iba sen pai kolen nungi bendentsϋ mesϋra menoktsϋ? Adianutem, Election nung elect asϋrtemi asen nϋburtem senpong nungi-sa agizϋka agitsϋ. Kechiyong, Election nung elect asϋrtemji asen sen aser mapatem nung yariteptsϋ atema dang shim. Election nung amangbapurtemi sen yamai mashi- koshi nung lalushiponga amshir.

Asenoki candidate shimdang senkar aser tulur dang bushir, ya asen nüburtemi mashilen mapa tamajung ka election nung inyaka aruba mapa ka lir. Kechiba asen Aor-i candidatemji nübur meimba aser ochishir mebushir mesϋra mesapur ta sasa bilemer. Ajak  dang  tematiba aser temerϋk yimsϋsϋba menden ka tulur aser takar nem dang agϋtsϋtsϋ mulungteta jangra- bangra-ba ya koda? Item mapa ajak sen meimba ajanga lir, nisung ajaki majung ta metet saka tatembang tongpangji sen ajanga chirepdaktsϋr.

Asen-i shimtetba lenirtemi asen mapa nung Percentage aser Share indang jembir aser agir. Ya tepangkatsϋ mapa tamajung ka lir. Saka oda asenoki iba mapa tamajungtem jakdaka inyaka aoba angazϋker. Ano, ya asen neburtemi tanϋ putu yimya ka amai pelashishia dang

agizϋker aser shitak amai sapua inyaker. Sen agi kodang o jembi tenzϋkdaktsϋdir ochi tebang alena yutsϋr aser ochi pokhümer tepseta yutsϋr. Iba kasa jenjang nung asenok kϋm ishika jajara asen lokti aser Arogo nung yakta rongrong tulu adoktsϋ aser nisung arishitepa-a tali majungtsϋ.

Nϋbur vote alizϋkba dang masϋ, parnok elected membertem tsϋngda nung nϋbo alizϋktepba angazϋker. Ano, party nung teret majang Opposition Less Government yangluba. Item mapa tamajung ajak ya sen aser Power meimba ajanga dang lir. Tanϋ asen Naga lima tanishir aika pei asoshi dang makmanϋa rongsen bendentsϋ aser Power nung alitsϋ dang merangba lenirtem aika lir. Nϋburtemi kodang iba tamashi mapa metettsϋ (Realize) aser ochi pokhüm nung noktaktsϋ?

Senso candidate shimba ajanga nisung shia pei temeten (Rights) shipanga yutsϋr. Democracy o-jang ya shisadangra, asen tsϋrabur mapang nungi benshia aruba mapa tajung ka amai bilemer. Koba nung tulu-tila, takar-makar, kecha tebendang mali, saka ajak asoshi saku shilem agϋtsϋr. American President Abraham Lincoln-i definition agϋtsϋba “of the people, by the people, for the people” koba tetezϋ nisung shia pei tangatetba aser nisung ajak kasa. Iba mapa tajung sen meimba aser ampangyim agi asenoki Democracy inyakyim tepeseta ayur. Asen nϋburtem ajaki pei temeten vote agϋtsϋtsϋ aser temeten mapa inyaktsϋ ajungmosϋtsϋla.

Rom 6:23 Kechiyong temenen taahji tasϋba lir… Temenen mapa inyakba ajanga meimchir ka asoshi tanela nung tasϋba bener arutsϋr. Kodang, aseni temenen mapa nung talangka noktakdir asen temulung ulur aser iba mapa tamajung nungi shilanga maruner. Yamaji meilungi tanela asϋba dang masϋ saka asen shi temang nema tasϋba bener arutsϋr.  Adianutem, Election mapang angati sen bushiba aser mapa tamajung inyakba ajanga meilungi asen lokti aser Arogo nem tasϋba bener arudaktsϋtsϋ. Ano, aseni item mapa tamajung jangrabangra inyakba ajanga asen chirnur aser lanu putu alar kϋmja nokdanga yutsϋtsϋ.

Otem

Ni iba ocet nung asen nüburtemi temenen mapa jangrabangra inyakaba kar tuteta zϋluogo, ashiko meperiba aser mabensaba alitsϋ akok saka metongshia dang zϋngdaktsϋnür. Ni amanger, item mapa tamajung ya asen nϋburtem teimbai meteta asa-a dang inyaker sϋdi, saka yimtsϋng nung alir kari memeteti züba-zϋba inyak ya alitsϋ akok. Iba ajanga asen lima nung Nagaland General Assembly Election kanga mejungi raksatsϋogo. Tanϋ, asen lima reprangdangra ya koleni aor ta rataseta bilemer, aser iba temenen inyakyim ya kodang tembangtsϋ ta yongyaseta atar. Adianutem, ya asenoki yanglutetba mapa ka lir, anungji  asenoki dang iba temelenshi bener arutettsϋ. Oda, asenok amangbapurtem ajaki teka amteper iba temenen mapa asoshi ayimtentsϋla aser noktaka jembitsϋla. Temelenshi aser nüchiba adokdaktsϋtsϋ asoshi Practical Steps agitsϋla aser Attainable asϋtsϋla. Tang Arogoi koba Awareness sentong ka ama Programme balala yanglua agia arudagi iba asalentong nung lokti

balala (NGOs) ajak dena maneni inyaka apusotsϋla. Iba mapa nungbo nϋbur ajak adentsϋla, kechiyong, yamala mapa yabo kϋlemi dang arok asoshi nϋkjidong ka yur inyaker. Anungji, asenok amangbapur ajaki iba tongpang rara nung ochiba ola adoka adentsϋla aser yariteptsϋla. Nϋburtemi temenen anema ola adoka ayimtenba nung Tsϋngremi tashi itakja aser tasϋ itakja aniangma.

*****